Mar. 1 - Bhaibheri Rakachena muChindau

¹ Chiprofeti. Izwi raMambo Mwari kunaIsuraeri kubudikidza ndiMarakhai.

Rudo rwaMambo Mwari kunaIsuraeri

² “Ndakamuda,” unoronza Mambo Mwari. Asi munoti, “Wakatida ngenjiranyi?” “Esau aasiri mukoma waJakobe here?” Unoronza Mambo Mwari. “Asi ndada Jakobe,

³ asi ndanyenya Esau, ndaita kuti nyika yake yezvimitunhu iite matongo nenhaka yake kuita rubaya rwemakava.”

⁴ Kudai Edhomu rechiti, “Taputsirwa pashi, asi tinozoakisa matongo,” unoronza Mambo Mwari wehondo: “Vangaaka, asi ndinozoputsira pashi, metsa vadaidzwa kuti, ‘Nyika yokushaisha,’ ‘Vanhu vaanonyangadzwa ndivo Mambo Mwari mhera nariini.’ ”

⁵ Madziso enyu emene anozoona izvi, nemwi munozoti, “Mambo Mwari mukurutu, kunyazwi nokubanze kwemigano yaIsuraeri.”

Mambo Mwari Unorambidza Vapristi

⁶ “Mukororo unoremeredza baba ake, nomuranda tenzi wake. Ndizvo kudai ndiri baba, amundiremeredzi ngenyi? Ndizvo kudai ndiri tenzi, amundiremeredzi ngenyi? Unoronza Mambo Mwari wehondo kwomuri, O vapristi, vanoshoora zina rangu. Nemwi munoti, ‘Takashoora zina rako ngenjiranyi?’

⁷ Ngokupira chingwa chakasvipiswa padera pearita rangu. Nemwi munoti, ‘Takarisvipisa ngenjiranyi?’ Ngokupinimidza kuti tafura raMambo Mwari chiro chinoshooreka.

⁸ Apo mwechipira mhuka dziri mapofu kuita mudiro, asikushatapi here? Apo mwechipa inokumhina neinorwara, asikushatapi here? Edza kuipa zvino kunomutongi wako; unozodakara ndiwe here, nokuti kukuashira?” Unoronza Mambo Mwari wehondo.

⁹ Nazvino kumbirai nyasha dzaMwari kuti atiitire nyasha. Kushata ngekwenyu. Unozoonisa nyasha kuneumwe wenyu here? Unoronza Mambo Mwari wehondo.

¹⁰ “O kudai umwe pakati penyu aizokonya misiwo, kuti musazobasira muriro padera pearita rangu pasina shwiro. Andidakari ndimwi, unoronza Mambo Mwari wehondo, neni andizoashiri munikero kubva kunyara dzenyu.

¹¹ Ngokuti kubvira mukubuda kwezuva metsa kupota kwaro zina rangu iguru pakati pemadzinza; nokundau dzeshe mutombo wokupisha unegwema rakanaka unozopirwa kuzina rangu, nomunikero wakachena; ngokuti zina rangu iguru pakati pevemadzinza, unoronza Mambo Mwari wehondo.

¹² Asi imwimwi munorisvipisa, apo munoti, ‘Tafura raMambo Mwari rasvipiswa; nemichero yaro, iri kudya kwake, inoshooreka.’

¹³ Munotizve, ‘Ringirai, A kurembesanyi kwezvinoita!’ Nemwi munofemba kwendiri, unoronza Mambo Mwari wehondo. Munounza chakapambwa nokuti chakaremara nokuti chinorwara; izvi munounza kudai ngeminikero yenyu. Ndinozoashira izvi kubva kunyara dzenyu here? Unoronza Mambo Mwari.

¹⁴ Ngaatukwe muchengedzeri, uwo unegondohwe pakati pemakwai ake, unopika kuripira, asi echipira kunaMambo Mwari chiro chinoshooreka; ngokuti ndiri Mambo mukuru, unoronza Mambo Mwari wehondo, nezina rangu rinoremeredzwa pakati pemadzinza.”