Josh. 9 - Bhaibheri Rakachena muChindau

VaGibheoni Vanochengedzera VaIsuraeri

¹ Zvino apo madzimambo eshe azwa aiya ngoruseri rweJorodhani, ngouno, mumitunhu, nomumabani, nomuhumbikumbi yoruandhle rukuru rwakaringirana neRebhanoni, vaHiti, vaAmori, vaKhenani, vaPherizi, vaHivhi navaJebhusi,

² vakaungana pamwepo kurwa naJoshua navaIsuraeri, ngomwoyo umwewo.

³ Asi apo vagari veGibheoni vaiya vazwa izvo zvaakaita Joshua kuneJerikho naAi,

⁴ vakaita ngourimbwi, vakaenda vakadzinasirira zvokudya, vakaisa masaka akasakara pazvimbongoro zvavo, nenyede dzevhini dzakasakara, dzabauka, dzasonwasonwa,

⁵ nemagwada asakara anezvitembwe mutsoka dzavo, nezvokusimira zvasakara padera pavo; nezvingwa zvavo zvaiya zvatipapata nokuita matsekeneswa.

⁶ Vakaenda kunaJoshua ari mukamba reGirigari, vakati kwaari nokuvanhu vaIsuraeri, “Takabva kunyika iri kuretu; ndizvo zvino itai chitenderano nesu.”

⁷ Asi vamuna vaIsuraeri vakati kuvaHivhi, “Pamweni imwimwi munogara pakati pedu; tingaita maitirenyi chitenderano nemwi?”

⁸ Vakati kunaJoshua, “Tiri varanda vako.” NaJoshua wakati kwavari, “Muri vanaani, munobva kuri?”

⁹ Vakati kwaari, “Varanda vako vanobva kunyika iri kuretu ngendaa yezina raMambo Mwari, Mwari wako; ngokuti isusu takazwa mbiri yake neizvo zveshe zvaakaita muEgipite,

¹⁰ nazvo zveshe zvaakaita kumadzimambo mairi evaAmori, aiya rusere rweJorodhani, kunaSihoni mambo weHeshibhoni nokunaOgi mambo waBhashani, waiya muAshitharothi.

¹¹ Ndizvo vakuru vevagari veshe venyika yedu vakaereketa kwetiri vechiti torai munyara dzenyu mbuva yomuhambo wenyu, muende kooshongana navo, mwechiti kwavari, ‘Tiri varanda venyu: ndizvo zvino ita chitenderano nesu.’

¹² Ichi ndicho chingwa chedu chetakatora kuita mbuva yomuhambo wedu kubva kumhatso dzedu zvaiya zvichapisha ngezuva retakabuda kuuya kushongana nemwi; asi zvino ringirai, zvatipapata, zvaita matsekeneswa.

¹³ Neidzi mbudu dzevhini dzetakazadza dzaiya itsva; zvino ringirai dzapera kubauka, neizvi zvokusimira zvedu nemagwada edu zvapera kusakara ngendaa yomuhambo wedu mukuru.”

¹⁴ Ndizvo vamuna vakaashira zvokudya zvavo ngendaa yokuona mbuva yavo, vasikazi kubvunza chirikuda kwaMambo Mwari kubva kumuromo wake.

¹⁵ NaJoshua wakaiyana navo, akaita chitenderano navo, kuti vapone; nevatungamiriri vembungano vakaita mhiko kwavari.

¹⁶ Asi ngesure kwemazuva matatu, vapedza kuita chitenderano navo, vakazwa kuti vari vaakirwana vavo, kuti vaigara pakati pavo.

¹⁷ Ndizvo vaIsuraeri vakahamba, vakaguma kumadhorobha avo ngezuva rechitatu. Zvino mazina emadhorobha avo aiya Gibheoni, Khefira, Bheerothi naKiriathijearimu.

¹⁸ Asi vaIsuraeri avazi kuvarwisa, ngokuti vatungamiriri vembungano vaiya vakapika mhiko kwavari ndiMambo Mwari, Mwari waIsuraeri. Mbungano yeshe yakavhuruvhutira vatungamiriri.

¹⁹ Asi vatungamiriri veshe vakati kunembungano yeshe, “Takapika kwavari ndiMambo Mwari, Mwari waIsuraeri; ndizvo zvino atizovagwami.

²⁰ Ichi ndicho chetinozoita kwavari: Tinozovarekera kuti vagare, kuti ushungu husazoa padera pedu, ngendaa yemhiko yetakapika kwavari.”

²¹ Vatungamiriri vakati kwavari, “Ngavapone; asi ngavaite vatemi vehuni, nevacheri vemvura kunembungano yeshe, kudai ngezvevakagondiswa ngevatungamiriri.”

²² NaJoshua wakavadaidza kwavari echiti, “Mwakatichengedza ngenyi, mwechiti, ‘Tinogara kuretu kubva kwomuri,’ apo mwechigara pakati pedu?

²³ Ndizvo zvino mwatukwa, nevamweni venyu vanozogara vari hloko, vatemi vehuni nevacheri vemvura kumhatso yaMwari wangu.”

²⁴ Vakapingura Joshua vechiti, “Ngokuti ngegwinyiso kwakaronzerwa kuvaranda vako kuti Mambo Mwari, Mwari wako wakapanga Mosi muranda wake kuti unozomupa nyika yeshe, nokuuraya vagari vayo veshe kubva pamberi penyu; ndizvo ngokudaro taiya nokutya kukurutu ngendaa yokupona kwedu ngepamsoro penyu, ndizvo takaita ichi chiro.

²⁵ Zvino, ringira, tiri munyara dzako. Ita kudai ngezvinooneka kuti zvakanaka mukuona kwako.”

²⁶ Izvi ndizvo zvavakaita kwavari: Wakavaponesa kubva munyara dzevaIsuraeri, avazi kuvauraya.

²⁷ NaJoshua wakavaita ngeiro zuva vatemi vehuni nevacheri vemvura kumbungano, nepaarita raMambo Mwari, metsa nanyamashi, kundau yaanozotsanangura.