Josh. 8 - Bhaibheri Rakachena muChindau

Kubatwa noKuparadzwa kweAi

¹ Mambo Mwari wakati kunaJoshua, “Usatya, usapera simbazve; tora vanhu veshe vehondo uende navo, umiruke ukwire Ai. Ringira ndapa munyara yako mambo weAi, nevanhu vake, nedhorobha rake, nenyika yake.

² Newe unozoita kunedhorobha iri reAi namambo waro, kudai ngezvewakaita kuneJerikho namambo waro; kwega zvakachakatwa zvaro, nezvifuyo zvaro, munozozvitora kuita zvakachakatwa zvenyu. Ndizvo emesa vanohwarira ngesure kwedhorobha.”

³ Ndizvo Joshua wakamiruka, nevanhu veshe vehondo, vakakwira kurwa neAi. Joshua wakatsanangura varwi vanesimba makumi matatu emakumi emazana (30,000), ngwazi wakavatuma usiku.

⁴ Naye wakavapanga echiti, “Ringirai, munozohwarira muri pasinde pedhorobha, ngesure kwaro; musazoenda kuretu kubva kudhorobha, asi munozoita vakagara vakanasirira.

⁵ Inini nevanhu veshe vanogara neni, tinozokwedzera kudhorobha. Naapo vechibuda kurwa nesu, kudai ngokutanga, tinozotiza kubva pamberi pavo.

⁶ Vanozobuda kutirumbirira metsa tavakweya kubva kudhorobha; ngokuti vanozoti, ‘Vari kutiza kubva pamberi pedu kudai ngokutanga.’ Ndizvo tinozotiza kubva pamberi pavo.

⁷ Naapo munozomiruka kubva pomunonga mwakahwarira, mutore dhorobha; ngokuti Mambo Mwari, Mwari wenyu unozoripa munyara dzenyu.

⁸ Naapo mwatora dhorobha, munozoripisha ngomuriro; kudai ngokupanga kwaMambo Mwari munozoita. Wonai ndamupanga.”

⁹ Ndizvo Joshua wakavatuma kuti vaende; navo vakaenda koohwarira, vakagara pakati peBhetheri neAi, ngokumabirirazuva kweAi; asi Joshua wakaata ngouhwo usiku pakati pevanhu.

¹⁰ Joshua wakamiruka mangwanani maishi, wakaerenga vanhu, wakakwira, iye nevakuru vaIsuraeri, pamberi pevanhu kuenda kuAi.

¹¹ Vanhu veshe, vehondo vaiya naye vakakwira, vakakwedzera, vakauya pamberi pedhorobha, vakaemesa matende avo ngorutii rwedera rweAi; zvino raiyapo bani pakati pavo naAi.

¹² Wakatora vanhu vaida kuita makumi emazana mashanu (5,000), wakavaemesa kuti vahwarire ngepakati peBhetheri neAi, ngokumabirirazuva kwedhorobha.

¹³ Ndizvo vakaemesa vanhu vehondo veshe vaiya ngedera kwedhorobha, nevahwariri vaiya ngokumabirirazuva kwedhorobha. Joshua wakaenda ngouhwo usiku mukati mwebani.

¹⁴ Apo mambo weAi aona ichi, iye nevanhu vake veshe vagari vedhorobha, vakakasira kumuka mangwanani, kuenda kundau yakaemeswa kurwa nevaIsuraeri; asi aazi kuzia kuti vaiyapo vakahwarira ngesure kwedhorobha.

¹⁵ Joshua navaIsuraeri veshe vakaita kunga vanyiswa pamberi pavo, vakatiza ngenjira yomushango.

¹⁶ Ndizvo vanhu veshe veAi vakadaidzwa pamwepo kuti vavarumbirire; vakarumbirira Joshua vakakweyiwa kubva kudhorobha.

¹⁷ Akuzi kusara mwamuna muAi nokuti Bhetheri, usikazi kubuda koorumbirira vaIsuraeri; vakasiya dhorobha rakabeuka, vakarumbirira vaIsuraeri.

¹⁸ Zvino Mambo Mwari wakati kunaJoshua, “Tambanudza mukhondo wako uri munyara yako wakaringira Ai; ngokuti ndaripa munyara yako.” NaJoshua wakatambanudza mukhondo wake waiya munyara yake, akaringira kudhorobha.

¹⁹ Nevahwariri vakakasira kumiruka kubva kundau yavo, vakarumba ngokukasira achatambanudza nyara yake. Vakapotera mudhorobha, vakaritora, vakakasira vakaripisha ngomuriro.

²⁰ Ndizvo vamuna veAi vakaringira sure kwavo, vakaona, penya chiushi chedhorobha chakakwira mudenga. Vaiya vasichina simba rokuti vatize apo, nokuti apo, nevanhu vaitiza kuenda mushango vakakunukukira kuneavo vaivarumbirira.

²¹ Naapo Joshua nevaIsuraeri veshe vaona kuti vahwariri vaiya vatora dhorobha, nokuti chiushi chedhorobha chaiya chechikwira, naapo vakahwirirazve, vakauraya vamuna veAi.

²² Nevamweni vanhu vakabuda kubva kudhorobha kurwa navo; ndizvo vaiya vaapakati pevaIsuraeri, vamweni ngeino; navamweni ngeino: vakavabaya, apana naumwe wakapona nokuti kupokonyoka.

²³ Vakamubata mambo weAi echizwa, vakamuunza kunaJoshua.

²⁴ Apo vaIsuraeri vaiya vapedza kuuraya vagari veAi veshe vaiya murubaya, apo pevakarumbirira, naapo vaIsuraeri veshe vakapetuka Ai, vakavauraya ngokupinza kweshoti.

²⁵ Uwandu hweavo veshe vakaurawa ngeiro zuva vamuna nevakadzi vaiya makumi emazana gumi namairi (12,000), vanhu veshe veAi.

²⁶ Ngokuti Joshua aazi kupfinyisa nyara yake yaakatambanudza ndiyo mukhondo wake, metsa aiya apedza yaamho vagari veshe veAi.

²⁷ Dzega n'ombe nezviro zvakachakatwa zveiro dhorobha, vaIsuraeri vakazvitora, kudai ngeizwi raMambo Mwari raakapanga Joshua.

²⁸ Ndizvo Joshua wakapisha Ai, wakariita murwi wematongo mhera nariini, eya, riri matongo metsa nanyamashi.

²⁹ Naye wakaturika mambo weAi pamuti metsa kwakasvipa; ngokukasira apo zuva rapota Joshua wakapanga kuti vadzase muiri wake kubva pamuti, nokuukandira pokupinda pamusiwo wedhorobha, nokuunganidza padera pawo murwi mukuru wemapuwe; aripo metsa nanyamashi.

Mupango Unoerengwa paMutunhu weEbhari

³⁰ Zvino Joshua wakaakira Mambo Mwari, Mwari waIsuraeri arita muMutunhu Ebhari,

³¹ kudai ngezvaakapanga Mosi muranda waMambo Mwari kuvaIsuraeri, kudai ngezvezvakanyorwa mubhuku remipango yaMosi, “Arita rakaakiwa ngemimhu yemapuwe, awo asikazi kutsetswa ngechokutsetsa chesimbi;” vakapira midiro yokupisha padera paro kunaMambo Mwari, navo vakapira mibairo yokunyarara.

³² Naapo Joshua wakanyora mukuona kwevana vaIsuraeri padera pemapuwe mazwi emipango yaMosi, aakanyora.

³³ Naveshe vaIsuraeri, vapara nevagari, nevakuru vavo, nevatungamiriri vavo, nevatongi vavo, vakaema ngorutii rwouno norweiyo rwebhokisi rechitenderano pamberi pevapristi, nevaRevhi, avo vaitwara bhokisi rechitenderano chaMambo Mwari; rupande rumwe rwairingirana noMutunhu Gerizimu norupande rumweni rwairingirana noMutunhu Ebhari; kudai ngezvaakapanga Mosi muranda waMambo Mwari pakutanga, kuti vafumise vanhu vaIsuraeri.

³⁴ Ngesure kwazvo zveshe wakadzidza mazwi eshe emipango, zvifumiso nezvituko, kudai ndizvo zveshe zvakanyorwa mubhuku remipango.

³⁵ Paiya pasina izwi narimwe reizvo zveshe zvaakapanga Mosi raasikazi kudzidza Joshua pamberi pembungano yeshe yaIsuraeri, kunevakadzi, vana nokuvapara vaiya pakati pavo.