Josh. 7 - Bhaibheri Rakachena muChindau

Chishaishi chaAkhani

¹ Asi vaIsuraeri vakapauka ngendaa yezviro zvakatukwa, ngokuti Akhani mukororo waKhami, mukororo waZabhudhi, mukororo waZera, wedzinza raJudha, wakatora zviro zvakatukwa; noushungu hwaMambo Mwari hwakabaka kunevaIsuraeri.

² Joshua wakatuma vanhu kubva Jerikho kuenda Ai, iro riri pasinde peBhethiavheni, ngokumabvazuva kweBhetheri, naye wakaereketa kwavari echiti, “Kwirai muende koonengera nyika.” Nevanhu vakakwira koonengera Ai.

³ Vakapetuka kunaJoshua, vakati kwaari, “Usaita kuti vanhu veshe vakwireyo; asi ungaita kuti makumi emazana mairi (2,000) nokuti matatu akwireyo, vaparadze Ai; usatambudza vanhu veshe ngokukwireyo, ngokuti vashomani.”

⁴ Ndizvo vakakwireyo vanhu vaida kuita makumi emazana matatu (3,000); navo vakatiza kubva pamberi pevamuna vedhorobha reAi.

⁵ Nevamuna veAi vakauraya vanhu avo makumi matatu navatanhatu, ngokuti vakavarumbirira kubva pamberi pemusiwo metsa kuguma Shebharimu, nokuvauraya pamudzaswa. Ndizvo mwoyo yevanhu yakapera simba, yakaita kudai ngemvura.

⁶ Zvino Joshua wakabaura zvokusimira zvake, wakawa pashi ngehope yake pamberi pebhokisi rechitenderano chaMambo Mwari metsa madeekoni, iye nevakuru vaIsuraeri; vakaisa bukuta padera pemasoro avo.

⁷ NaJoshua wakati, “A Mambo Mwari, Mwari! Wakaambusirenyi ava vanhu Jorodhani, kuti utipire munyara dzavaAmori, kuti vatiuraye? Taizodai takakwaniswa kugara ruseri rweJorodhani!

⁸ A Mambo Mwari, ndinozotinyi apo vaIsuraeri vechifuratira misana yavo kutiza kubva pamberi pemagaa avo!

⁹ Ngokuti vaKhenani navo veshe vagari venyika vanozochizwa, vanozotitendenedza, kundau dzeshe, vanozodzima zina redu kubva padera penyika. Zvino unozoitenyi kunezina rako guru?”

¹⁰ NaMambo Mwari wakati kunaJoshua, “Miruka! Unoatirenyi pashi ngehope yako?

¹¹ VaIsuraeri vakashaisha; vakagura chitenderano changu chendakavapa. Vakatora zviro zvakatukwa, vakaba nokuchengedza, vakazviisa mukati mwenhumbi dzavo.

¹² Ndizvo vaIsuraeri avazi kukona kuemesedzana nemagaa avo, asi vafuratira misana yavo kutiza magaa avo, ngokuti vaita chiro chakatukwa ivo pachavo. Andichazoa nemwizve nakamwe, ngepabanze pokuti mwarasha izvo zvakatukwa kubva pakati penyu.

¹³ Miruka, uchenese vanhu wechiti dzichenesei mangwani; ngokuti Mambo Mwari, Mwari waIsuraeri unoronza, ‘Zviripo pakati penyu zviro zvakatukwa, A Isuraeri; amuzokoni kuema pamberi pemagaa enyu, metsa mwarasha zviro zvakatukwa kubva pakati penyu.’

¹⁴ Ndizvo mangwanani munozokwedzera kudai ngemadzinza enyu. Dzinza raanotsanangura Mambo Mwari rinozokwedzera kudai ngemhuri dzaro; nemhuri iyo yaanotsanangura Mambo Mwari inozouya kudai ngemhatso dzavo; nemhatso iyo yaanotsanangura Mambo Mwari inozouya pasinde munhu umwe ngaumwe.

¹⁵ Nouwo unozotsanangurwa unezviro zvakatukwa unozopishwa ngomuriro, iye nazvo zveshe zvaanazvo, ngokuti wakagura chitenderano chaMambo Mwari, ngokuti wakaita zvakashata muIsuraeri.”

¹⁶ Ndizvo Joshua wakamiruka mangwanani maishi, wakaunza vaIsuraeri ngemadzinza avo; nedzinza raJudha rakatsanangurwa.

¹⁷ Wakaunza dzinza raJudha; wakatora mhuri yevaZera: wakaunza mhuri yevaZera mhatso ngemhatso; naZabhudhi wakatsanangurwa.

¹⁸ Wakaunza mhatso yake, umwe ngaumwe; naAkhani mukororo waKhami, mukororo waZabhudhi, mukororo waZera, wedzinza raJudha wakatsanangurwa.

¹⁹ NaJoshua wakati kuna Akhani, “Mukororo wangu ndinokupota, irikidza Mambo Mwari, Mwari waIsuraeri, utende kwaari, undironzere icho chewakaita; usandifishira.”

²⁰ NaAkhani wakapingura Joshua echiti, “Ngegwinyiso ndakashaisha kunaMambo Mwari, Mwari waIsuraeri, ndakaita ichi neicho.

²¹ Apo ndakaona pakati pezviro zvakachakatwa nguwo yakanaka yeBhabhuroni, nemakhirogramu mairi esirivha, nechigurwa chomukore chairema kupinda rupande rwekhirogramu, naapo ndakazviemura ndakazvitora. Wona, zvakafishwa mumavhu, pakati petende rangu, nesirivha iri pashi pazvo.”

²² Ndizvo Joshua wakatuma vanengeri navo vakarumba kuenda kutende; wona, zvaiya zvakafishwa mutende rake, nesirivha yaiya pashi pazvo.

²³ Navo vakazvibudisa kubva pakati petende, vakazviunza kunaJoshua, nokwavari veshe vaIsuraeri, vakazviisa pamberi paMambo Mwari.

²⁴ NaJoshua pamwepo nevaIsuraeri veshe vakatora Akhani mukororo waZera, nesirivha, nenguwo, nechigurwa chomukore, nevakororo vake, nevanasikana vake, nen'ombe dzake, nembongoro dzake, nehwai dzake, netende rake, nazvo zveshe zvaaiya nazvo; vakazviunza kuBani raAkho.

²⁵ Joshua wakati, “Watitambudzirenyi? Mambo Mwari unozokutambudzawo nyamashi.” NavaIsuraeri veshe vakamuponda ngemapuwe, nokuvapisha ngomuriro, vapedza kuvaponda ngemapuwe.

²⁶ Vakaunganidzira padera pake murwi mukuru wemapuwe uripo nanyamashi. Zvino Mambo Mwari wakakunukuka kubva muushungu hwake hunotyisa. Ndizvo zina reiyo ndau rakadudzwa kuti Bani raAkho metsa nanyamashi.