Josh. 6 - Bhaibheri Rakachena muChindau

Kuwa kweJerikho

¹ Zvino Jerikho raiya rakakonywa kweshe mukati nokubanze ngendaa yevaIsuraeri; akuna munhu waibuda kubvamwo, nokuti waipoteremwo.

² NaMambo Mwari wakaereketa kunaJoshua echiti, “Wona, ndapa munyara dzako Jerikho, pamwepo namambo waro, nevarwi vehondo.

³ Munozotenderera dhorobha, varwi vehondo munozohamba kuritenderera kamwe. Munozoita kudaro mazuva matanhatu,

⁴ nevapristi vanomwe vanozobata magwama manomwe emagondohwe vari pamberi pebhokisi rechitenderano. Ngezuva rechinomwe munozohamba kutenderera dhorobha kanomwe, vapristi vechiridza magwama.

⁵ Naapo vechizoridza magwama mukuwo wakareba, naapo mwazwa bope remagwama, vanhu veshe vanozodaidzira ngokudaidzira kukurutu; norukumbati rwedhorobha runozowa pashi, nevanhu veshe vanozopotera kubva apo pevari.”

⁶ Ndizvo Joshua mukororo waNuni wakadaidza vapristi, akati kwavari, “Torai bhokisi rechitenderano, nevapristi vanomwe ngavabate magwama manomwe emagondohwe vari pamberi pebhokisi rechitenderano chaMambo Mwari.”

⁷ Naye wakati kuvanhu, “Pindai mberi muhambe kutenderera dhorobha, naavo vakapakatira zvokurwa ngavapinde pamberi pebhokisi rechitenderano chaMambo Mwari.”

⁸ Naapo Joshua aiya apanga vanhu, vapristi vanomwe vakabata magwama manomwe emagondohwe vapinda pamberi paMambo Mwari, vakaridza magwama; nebhokisi rechitenderano chaMambo Mwari rechivateera.

⁹ Nevamuna vaipakatira zvokurwa vakahamba vari pamberi pevapristi vairidza magwama, nevarindi vaiteera ngesure kwebhokisi rechitenderano. Naapo vapristi vakaangira kuridza magwama.

¹⁰ NaJoshua waiya akapanga vanhu echiti, “Musazodaidzira nokuti kuita kuti izwi renyu rizwike, musazobudisa izwi narimwe ngomuromo wenyu, metsa zuva rendinozomupanga kuti mudaidzire. Zvino munozodaidzira.”

¹¹ Ndizvo bhokisi rechitenderano chaMambo Mwari rakahamba kutenderera dhorobha, rakaritenderera kamwe; navo vakahwirira kukamba, vakaata mukamba.

¹² Zvino Joshua wakamuka mangwanani maishi, nevapristi vakatora bhokisi rechitenderano chaMambo Mwari.

¹³ Vapristi vanomwe vakabata magwama emagondohwe manomwe vakahamba vari pamberi pebhokisi rechitenderano chaMambo Mwari, vakaangira kuridza magwama avo. Vamuna vakapakatira zvokurwa vakahamba pamberi pavo; nembungano yesure yakateera bhokisi rechitenderano chaMambo Mwari, vapristi vechihamba vechiangira kuridza magwama.

¹⁴ Ngezuva rechipiri vakahamba kutenderera dhorobha kamwe, vakahwirira kukamba. Vakaita kudaro mazuva matanhatu.

¹⁵ Ngezuva rechinomwe, vakafumira mangwanani mumambakwedza, vakahamba kutenderera dhorobha ngenjira imweyo kanomwe. Kwega ngeiro zuva vakahamba kutenderera dhorobha kanomwe.

¹⁶ Ngomukuwo wechinomwe apo vapristi varidza magwama, Joshua wakati kunevanhu, “Daidzirai! Ngokuti Mambo Mwari wamupa dhorobha iri.

¹⁷ Dhorobha nazvo zveshe zviri mukati mwaro, zvinozopirwa kunaMambo Mwari, zviparadzwe. Kwega Rahabhi chifebi unozopona, iye navo veshe vari mumhatso naye, ngokuti wakafisha vanengeri avo vakatumwa.

¹⁸ Asi imwimwi mudzingwarire kubva kuneizvo zvakatukwa, kuti musazodziita vakatukwa apo mwechiemura mwechitora chimwe chezviro zvakatukwa, nokuti kuita kuti kamba reIsuraeri riite rakatukwa, nokuriunzira madambudziko.

¹⁹ Asi sirivha yeshe nomukore, nezvidziyo zvethusi nezvesimbi, zvakachena kunaMambo Mwari; zvinozounzwa muupfumi hwaMambo Mwari.”

²⁰ Ndizvo vanhu vakadaidzira nemagwama akaridzwa. Naapo vanhu vazwa bope remagwama, vanhu vakadaidzira ngokudaidzira kukurutu, norukumbati rwakawa pashi kuti serere; ndizvo vanhu veshe vakakwira kupotera mudhorobha, munhu weshe kubvira paaiya apo, vakatora dhorobha.

²¹ Vakaparadza zveshe zvaiya mudhorobha ngokupinza kweshoti, veshe vamuna nevakadzi, vatsva nevasharuka, n'ombe, hwai nezvimbongoro.

²² Joshua wakati kuvamuna vairi avo vakanengera nyika, “Pindai mumhatso yechifebi, mumubudise uwo mukadzi, navo veshe vaanavo, kudai ngezvemwakapika kwaari.”

²³ Nevamuna vatsva vakanengera nyika vakapotera, vakabudisa Rahabhi, nababa ake, namai ake, nevakoma vake, navo veshe vaaiya navo; vakabudisa hama dzake dzeshe, vakavasia ngokubanze kwekamba yevaIsuraeri.

²⁴ Vakapisha dhorobha ngomuriro, nazvo zveshe zvaiya umwo; asi sirivha, nomukore, nezvidziyo zvethusi nezvesimbi, vakazviisya kunezvoupfumi hwemhatso yaMambo Mwari.

²⁵ Asi Joshua wakaponesa Rahabhi, nemhatso yababa ake, navo veshe vaaiya navo, naye unogara mukati mwevaIsuraeri metsa nanyamashi; ngokuti wakafisha vanengeri vaakatuma Joshua kuti vanengere Jerikho.

²⁶ Joshua wakavapikisa mhiko ngouwo mukuwo echiti, “Ngaatukwe uwo munhu pamberi paMambo Mwari unozoakisa dhorobha raJerikho! Unozoakisa matsikiro aro dangwe rake rechizofa, unozoemesa misiwo yaro mwana wake mudoko echizofa.”

²⁷ Ndizvo Mambo Mwari waiya naJoshua; nembiri yake yakaziikana mukati mwenyika yeshe.