Josh. 5 - Bhaibheri Rakachena muChindau

¹ Naapo madzimambo eshe evaAmori vaiya ruseri rweJorodhani ngokumabirira, nemadzimambo eshe eKhenani, vaiya ngokuruandhle, apo pevakazwa kuti Mambo Mwari wakaomesa mvura yeJorodhani pamberi pevaIsuraeri metsa taiya taambuka, mwoyo yavo yakapera simba, zve, kwaiya kusichina mweya wokushinga kwavari, ngendaa yevana vaIsuraeri.

Kuchekwa paGirigari

² Ngouwo mukuwo Mambo Mwari wakati kunaJoshua, “Dzinasirire mapanga anopinza emapuwe, uchekezve vaIsuraeri ngokwechipiri.”

³ Ndizvo Joshua wakadzinasirira mapanga anopinza emapuwe, wakacheka vaIsuraeri paGibheathihaararothi.

⁴ Iyi ndiyo ndaa yakaita Joshua avacheke: vanhu veshe vevamuna vakabuda kubva Egipite, veshe vamuna vehondo vakafira mushango vari munjira, ngesure vaiya vabuda kubva Egipite.

⁵ Kunyazwi vanhu veshe vakabuda kubva Egipite vaiya vakachekwa, asi vanhu veshe vakabarirwa mushango vari munjira mukubva kwavo Egipite, vaiya vasikazi kuchekwa.

⁶ Ngokuti vaIsuraeri vakahamba makore makumi marongomuna mushango, metsa dzinza reshe varwi vehondo vapera kufa, avo vakabuda kubva Egipite, ngokuti avazi kupurutana izwi raMambo Mwari; avo vaakapika kwevari Mambo Mwari kuti aazovapangidzi nyika, yaakapika Mambo Mwari kumadzibaba avo kuti unozoipa kwetiri, nyika inoerera mukaka nouchi.

⁷ Ndizvo vaiya vana vavo vaakamirudza pandau yavo, avavo Joshua wakavacheka; ngokuti vaiya vasikachekwi, ngokuti vaiya vasikazi kuchekwa munjira.

⁸ Naapo vapedza kucheka dzinza reshe, vakagara mundau dzavo mumatende metsa vapora.

⁹ Mambo Mwari wakati kunaJoshua, “Nyamashi ndadusa kutsverudzwa kwemwakatsverudzwa ndikwo muEgipite kubva kwomuri.” Ndizvo zvino zina rendau iyo rakadudzwa kuti Girigari metsa nanyamashi.

¹⁰ Naapo vaIsuraeri vakaemesa matende avo muGirigari, vakangwarira Phasika madeekoni ngezuva rechigumi namarongomuna romwedzi, vari mumabani eJerikho.

¹¹ Navo vakadya zvomuminda ngechimangwani ngesure kwePhasika, zvingwa zvisina mumera, nekoroni yakakangwa ngezuva ndiro ndiro.

¹² Mana yakagumisira kuapo ngezuva revakadya zviyo zvenyika.VaIsuraeri avazi kuchazoa nemana; asi vakadya mirimwa yenyika yeKhenani ngeiro gore.

Joshua noMunhu Uneshoti

¹³ Kwakaitika apo Joshua aiya ari pasinde peJerikho, wakamirudza madziso ake, akaringira, akaona munhu akaema pamberi pake, aneshoti yake yakashwamurwa munyara yake. Joshua wakaenda kwaari, akati kwaari, “Uri umwe wedu here, nokuti umwe wemagaa edu?”

¹⁴ Wakati kwaari, “Haiwa; asi ndauya ndiri nduna yehondo yaMambo Mwari.” Joshua wakawira pashi ngehope, wakamudira, akati kwaari, “Unoronzenyi mambo wangu kunomuranda wake?”

¹⁵ Nenduna yehondo yaMambo Mwari yakati kunaJoshua, “Dusa magwada ako kubva kutsoka dzako, ngokuti ndau yewakaema yakachena.” NaJoshua wakaita kudaro.