Josh. 4 - Bhaibheri Rakachena muChindau

Mapuwe eChicherechedziso Anoemeswa

¹ Naapo vanhu veshe vaiya vapera kuambuka Jorodhani, Mambo Mwari wakaereketa kunaJoshua echiti,

² “Tsanangura vamuna gumi navairi kubva pakati pevanhu, umwe kubva kudzinza rimwe ngarimwe.

³ Uvapange wechiti, ‘Torai mapuwe gumi namairi kubva pakati peJorodhani kubva apo paiema tsoka dzevapristi dzakagwinya, muambuke nawo, muaise pandau yomunozoata usiku uhwo.’ ”

⁴ Zvino Joshua wakadaidza vamuna vari gumi navairi, vaaiya akatsanangura vevaIsuraeri, munhu umwe kubva kudzinza rimwe ngarimwe.

⁵ Joshua wakati kwavari, “Hambai pamberi pebhokisi rechitenderano chaMambo Mwari, Mwari wenyu, mupinde pakati peJorodhani, mutore munhu weshe buwe ariise papfudzi rake, kudai ngouwandu hwemadzinza evaIsuraeri,

⁶ kuti ichi chiite chioniso pakati penyu, kuti apo vana venyu vechizobvunza ngomukuwo unozouya kumadzibaba avo vechiti, ‘Biningidzo raaya mapuwe ngerenyi kwomuri?’

⁷ Zvino munozoti kwavari, ‘Mvura yeJorodhani yakagurwa pamberi pebhokisi rechitenderano chaMambo Mwari. Naapo rechiambuka Jorodhani, mvura yeJorodhani yakagurwa. Naaya mapuwe anozoita chicherechedziso kuvaIsuraeri mhera nariini.’ ”

⁸ VaIsuraeri vakaita kudai ngezvaakapanga Joshua. Vakatora mapuwe gumi namairi kubva pakati peJorodhani, kudai ngezvaakaereketa Mambo Mwari kunaJoshua, kudai ngouwandu hwemadzinza evaIsuraeri, vakaatwara kuenda nawo kundau pevakaata, vaatura vakaaisa pashi.

⁹ Joshua wakaemesa mapuwe gumi namairi mukati mweJorodhani, apo paiya pakaema tsoka dzevapristi vaitwara bhokisi rechitenderano, nawo aripo metsa nanyamashi.

¹⁰ Vapristi vaitwara bhokisi rechitenderano vaiya vakaema pakati peJorodhani metsa zviro zveshe zvaiya zvaitwa zvaakapanga Mambo Mwari kunaJoshua, vanhu vakakasira kuambuka.

¹¹ Apo vanhu veshe vaiya vapera kuambuka, bhokisi rechitenderano chaMambo Mwari, nevapristi vakaambuka, mukuona kwevanhu.

¹² VaRubheni, vaGadhi norupande rwedzinza raManase, vakaambuka vakapakatira zvokurwa pamberi pevaIsuraeri veshe, kudai ngezvaakaereketa Mosi kwavari.

¹³ Vaida kukwana makumi marongomuna emakumi emazana (40,000) vakaambuka vakapakatira zvokurwa pamberi paMambo Mwari, vakaguma marubaya eJerikho.

¹⁴ Ngeiro zuva Mambo Mwari wakakudza Joshua mukuona kwevaIsuraeri veshe; navo vakamuremeredza kudai ngezvevakaremeredza Mosi, mazuva eshe okupona kwake.

¹⁵ Mambo Mwari wakaereketa kunaJoshua echiti,

¹⁶ “Panga vapristi vanotwara bhokisi rechapupu, kuti vabude kubva muJorodhani.”

¹⁷ Ndizvo Joshua wakapanga vapristi echiti, “Budai kubva muJorodhani.”

¹⁸ Apo vapristi vaitwara bhokisi rechitenderano chaMambo Mwari vaiya vabuda kubva pakati peJorodhani, netsoka dzevapristi dzaiya dzakaema pamavhu akaoma, mvura yeJorodhani yakahwirira kundau yayo, yakaerera kudarika mahumbikumbi aro, kudai ngekaretu.

¹⁹ Vanhu vakabuda kubva muJorodhani ngezuva rechigumi romwedzi wokutanga, vakaemesa matende avo muGirigari, mumugano wokumabvazuva kweJerikho.

²⁰ Neawo mapuwe gumi namairi evakatora kubva muJorodhani, Joshua wakaemesa muGirigari.

²¹ Wakaereketa kunevaIsuraeri echiti, “Naapo vana venyu vechizobvunza madzibaba avo ngomukuwo unouya vechiti, ‘Biningidzo raaya mapuwe ngerenyi?’

²² Naapo munozoziisa vana venyu mwechiti, ‘VaIsuraeri vakaambuka Jorodhani iri pamavhu akaoma.’

²³ Ngokuti Mambo Mwari, Mwari wenyu wakaomesa mvura yeJorodhani pamberi penyu metsa mwaambuka, kudai ngezvaakaita Mambo Mwari, Mwari wenyu kuRuandhle Rwakatsvuka, urwo rwaakaomesa pamberi pedu metsa taiya taambuka,

²⁴ kuti vanhu veshe venyika vazie kuti nyara yaMambo Mwari inesimba, kuti imwimwi mutye Mambo Mwari, Mwari wenyu nariini.”