Josh. 3 - Bhaibheri Rakachena muChindau

Vanhu VaIsuraeri Vanoambuka Jorodhani

¹ Joshua wakamuka mangwanani maishi; wakathutha nevaIsuraeri veshe kubva Shitimu, vakaguma Jorodhani. Vakagarapo vasati vaambuka.

² Kwapera mazuva matatu vatungamiriri vakahamba pakati pematende,

³ navo vakapanga vanhu vechiti, “Apo mwozoona bhokisi rechitenderano chaMambo Mwari, Mwari wenyu, nevapristi vaRevhi vechiritwara, naapo munozomiruka kubva pandau dzenyu.

⁴ Muriteere kuti muzie njira yomunozohamba ndiyo, ngokuti amusati mwambohamba ngeiyi njira. Asi panozoa nenharauko pakati penyu naro, inoda kuita khiromitha rimwe muri sure kwaro; musazokwedzera kweriri.”

⁵ Zvino Joshua wakati kuvanhu, “Dzichenesenyi pachenyu; ngokuti mangwani Mambo Mwari unozoita zvishamiso pakati penyu.”

⁶ Joshua wakaereketa kuvapristi echiti, “Torai bhokisi rechitenderano, mudarike ngepamberi pevanhu.” Navo vakatora bhokisi rechitenderano, vakadarika ngepamberi pavanhu.

⁷ Mambo Mwari wakati kunaJoshua, “Nyamashi ndinozotanga kukukudza mukuona kwevanhu veshe vaIsuraeri, kuti vazie kuti ndinozoa newe kudai ngezvendaiya naMosi.

⁸ Ndiwe unozopanga vapristi vanotwara bhokisi rechitenderano kuti, ‘Apo mwaguma kuhumbikumbi yemvura yeJorodhani, munozoema mukati mweJorodhani.’ ”

⁹ Joshua wakati kuvaIsuraeri, “Kwedzerai pano, kuti muzwe mazwi aMambo Mwari, Mwari wenyu.”

¹⁰ Joshua wakati, “Ngeichi munozozia kuti Mwari unopona uri pakati penyu, ngegwinyiso unozodzinga kubva pamberi penyu vaKhenani, vaHiti, vaHivhi, vaPherizi, vaGirigashi, vaAmori nevaJebhusi.

¹¹ Wonai, bhokisi rechitenderano chaMambo Mwari wenyika yeshe rinozopinda pamberi penyu kuenda muJorodhani.

¹² Ndizvo zvino dzitsanangurirei vamuna vari gumi navairi kubva kumadzinza evaIsuraeri, munhu umwe kubva kudzinza rimwe ngarimwe.

¹³ Apo tsoka dzevapristi, vanotwara bhokisi rechitenderano chaMambo Mwari, Mambo wenyika dzeshe, dzoema mumvura yeJorodhani, mvura yeJorodhani inozogurwa, kubva kumvura inoerera yechibva dera; inozoema kuita rukumbati.”

¹⁴ Naapo vanhu vabuda kubva kumatende avo, kuti vaambuke Jorodhani, vapristi vakatwara bhokisi rechitenderano pamberi pevanhu.

¹⁵ Naapo vaitwara bhokisi rechitenderano tsoka dzavo dzapotera muhumbikumbi yemvura (ngokuti Jorodhani rinoteya kumahumbikumbi aro nguva yeshe yokukukura),

¹⁶ mvura yaibva ngedera yakaema yechikwira kuita rukumbati kuzadza kuguma kuretu, kuguma kudhorobha Adhamu, riri pasinde naZarethani; neiyo yaidzaka kubani, kuenda kuruandhle rweArabha, Ruandhle Rwakafa, yakapera, yakagurwa yeshe. Vanhu vakaambuka vakaringirana neJerikho.

¹⁷ Navapristi vaitwara bhokisi rechitenderano chaMambo Mwari vakaema vakagwinya pamavhu akaoma, vari pakati peJorodhani, nevaIsuraeri veshe vakaambuka pamavhu akaoma, metsa vanhu veshe vakapera kuambuka Jorodhani.