Josh. 24 - Bhaibheri Rakachena muChindau

Joshua Unoereketa kuneVanhu paShekhemu

¹ Zvino Joshua wakaunganidza madzinza eshe evaIsuraeri paShekhemu, wakadaidza vakuru vaIsuraeri, nevatungamiriri vavo, nevatongi vavo, nenduna dzavo; vakadzionisa pamberi paMwari.

² NaJoshua wakati kuvanhu veshe, “Unoronza izvi Mambo Mwari, Mwari waIsuraeri: Madzibaba enyu akagara ngoruseri rworwizi ngenguva yekare, ndiThera, baba vaAbrahama nababa vaNaho, navo vakashandira zvimwari zvimweni.

³ Zvino ndakatora baba enyu Abrahama kubva ngoruseri rworwizi, ndikamutungamirira mukati mwenyika yeshe yeKhenani, ndakawanza rudzi rwake, ndakamupa Isaka.

⁴ Ndakapa kunaIsaka Jakobe naEsau. Ndakapa kunaEsau nyika yemitunhu Seira, kuti agare nhaka yayo; asi Jakobe nevana vake vakadzaka Egipite.

⁵ Zvino, ndakatuma Mosi naAroni, neni ndakarova Egipite, ngeizvo zvendakaita pakati pavo; ngesure ndakamubudisa kubva apo.

⁶ Naapo ndabudisa madzibaba enyu kubva Egipite, nemwi mwakaguma kuruandhle; nevaEgipite vakarumbirira madzibaba enyu ngesure kwavo vanengoro nemahachi metsa vakaguma kuRuandhle Rwakatsvuka.

⁷ Naapo vachema kunaMambo Mwari, wakaisa chidima pakati penyu nevaEgipite, naye wakaunzazve ruandhle padera pavo, rwakavambonya; nemadziso enyu akaona izvo zvendakaita muEgipite. Ngesure kwazvo mwakagara mukati mweshango mukuwo wakareba.

⁸ Zvino ndakamuunza munyika yevaAmori, avo vaigara ngoruseri rweJorodhani; vakarwa nemwi; ndakavapira munyara dzenyu, kuti mugare nhaka yenyika yavo; ndakavapedza kubva pamberi penyu.

⁹ Zvino Bharaki mukororo waZiphori mambo wevaMoabhi wakamiruka akarwa navaIsuraeri. Wakatuma kudaidza Bharamu mukororo waBheo kuti amutuke.

¹⁰ Asi andizi kupurutana kunaBharamu, ndizvo iye wakaangirira kumufumisa; ndizvo ndakamununurira kubva kunyara dzake.

¹¹ Naapo mwaambuka Jorodhani, mukaguma Jerikho, vamuna veJerikho vakaambana nemwi, navaAmori, nevaPherizi, nevaKhenani, nevaHiti, nevaGirigashi, nevaHivhi, nevaJebhusi; ndakavapira munyara dzenyu.

¹² Ndakatuma mago pamberi penyu, akadzinga kubva pamberi penyu madzimambo mairi evaAmori, asi haiwa ngeshoti dzenyu nokuti uta hwenyu.

¹³ Ndakamupa nyika yomusikazi kuishandira, nemadhorobha omusikazi kuaka, nemwi munogara mukati mwawo; munodya michero yemivhini neyemaorivhi zvomusikazi kusima.

¹⁴ “Ndizvo zvino ityai Mambo Mwari, mumushandire musina ndemo ngegwinyiso; murashe zvimwari izvo zvakashandirwa ngemadzibaba enyu ngoruseri rworwizi nomuEgipite, mumushandire Mambo Mwari.

¹⁵ Zvino kudai zvechioneka kwomuri kuti zvakashata kumushandira Mambo Mwari, tsanangurai nyamashi uwo womunozoshandira; pamweni zvimwari zvakashandirwa ngemadzibaba enyu aiya ngoruseri rworwizi, nokuti zvimwari zvevaAmori, vomunogara munyika yavo; asi kwendiri inini nevemhatso yangu, tinozoshandira Mambo Mwari.”

¹⁶ Zvino vanhu vakapingura vechiti, “Mwari asatenda kuti tisiye Mambo Mwari nokushandira zvimwari zvimweni.

¹⁷ Ngokuti ndiMambo Mwari, Mwari wedu wakatibudisa nemadzibaba edu kubva munyika yeEgipite, kubva mumhatso youhloko, uwo wakaita izvo zvioniso zvikuru mukuona kwedu, wakatingwarira munjira yeshe yetakahamba ndiyo, nepakati pevanhu veshe vetakadarika ngepakati pavo;

¹⁸ naMambo Mwari wakadzinga kubva pamberi pedu vanhu veshe, vaAmori vaigara munyika. Ndizvo isusuwo tinozoshandira Mambo Mwari, ngokuti ndiye Mwari wedu.”

¹⁹ Asi Joshua wakati kuvanhu, “Amungashandiri Mambo Mwari, ngokuti iye uri Mwari wakachena; uri Mwari unendurumwa; aazomurekereri kupauka kwenyu nezvishaishi zvenyu.

²⁰ Kudai mwechisiya Mambo Mwari nokuenda kooshandira zvimwari zvenyika, naapo unozokunukuka nokumuitira zvakashata nokumupedza, ngesure apo akamuitira zvakanaka.”

²¹ Nevanhu vakati kunaJoshua, “Haiwa, asi tinozomushandira Mambo Mwari.”

²² Zvino Joshua wakati kunevanhu, “Imwimwi muri zvapupu ngokwenyu, kuti mwadzitsanangurira Mambo Mwari kuti mumushandire.” Navo vakati, “Eya, tiri zvapupu.”

²³ Naye wakati, “Ndizvo zvino rashai zvimwari zvipara zviri pakati penyu, muemese mwoyo yenyu kunaMambo Mwari, Mwari waIsuraeri.”

²⁴ Vanhu vakati kunaJoshua, “Tinozoshandira Mambo Mwari, Mwari wedu, tipurutane izwi rake.”

²⁵ Ndizvo Joshua wakaita chitenderano navanhu ngeiro zuva, naye wakavaemesera zviemeso nemipango vari muShekhemu.

²⁶ Joshua wakanyora aya mazwi mubhuku rezvironzo zvaMwari; wakatora buwe guru, wakariemesa apo pashi pomuti womuokhi, waiya pasinde pendau yakachena yaMambo Mwari.

²⁷ Joshua wakati kunevanhu veshe, “Ringirai, iri buwe rinozoita chapupu kwetiri; ngokuti razwa mazwi aMambo Mwari aakaereketa kwetiri. Ndizvo rinozoita chapupu kwomuri, kuti musazoramba Mwari wenyu.”

²⁸ Ndizvo Joshua wakatendera vanhu kuti vaende, munhu weshe kunhaka yake.

Kufa kwaJoshua naEreaza

²⁹ Ngesure kweizvi Joshua mukororo waNuni, muranda waMambo Mwari, wakafa, aanemakore zana negumi.

³⁰ Navo vakamuika munyika yenhaka yake muTiminathisera, iyo iri munyika yemitunhu yaEfuremu, ngorutii rwedera rwomutunhu Gaashi.

³¹ VaIsuraeri vakashandira Mambo Mwari mazuva eshe okupona kwaJoshua, nemazuva eshe okupona kwevakuru avo vakapona kupinda Joshua, avo vaiya vakazia mishando yeshe yaMambo Mwari, yaaiya akaitira Isuraeri.

³² Navo vakatsira muShekhemu magodo aJosefa, evaiya vakaunza kubva Egipite vana vaIsuraeri, mundau yaaiya atenga Jakobe kubva kunevana vaHamori baba aShekhemu ngezvigurwa zvesirivha zana; nayo yakaita nhaka yevana vaJosefa.

³³ NaEreaza mukororo waAroni wakafa; navo vakamuika muGibhea, dhorobha romukororo wake Finehasi, iro rakapuwa kwaari munyika yemitunhu yeEfuremu.