Josh. 23 - Bhaibheri Rakachena muChindau

Mazwi aJoshua oKugumisira

¹ Ngesure kwomukuwo wakareba apo Mambo Mwari waiya apa kuzorora kuvaIsuraeri kubva kumagaa avo eshe akavatendenedza, Joshua waiya aamusharuka aanemakore mazhinji.

² Joshua wakadaidza vaIsuraeri veshe, vakuru vavo, vatungamiriri vavo, vatongi vavo nenduna dzavo, akati kwavari, “Ndaamusharuka waanemakore mazhinji,

³ nemwi mwakaona zveshe zvaakaita Mambo Mwari, Mwari wenyu kwaari eshe aya madzinza ngepamusoro penyu, ngokuti Mambo Mwari, Mwari wenyu ndiye wakamurwira.

⁴ Ndakamukoanisira ngokuita mabhigidha eshe aya madzinza asara, kuti aite nhaka yemadzinza enyu, kubvira Jorodhani, pamwepo nemadzinza eshe endakaparadza, metsa kuguma kuruandhle rukuru ngokumabirirazuva.

⁵ NaMambo Mwari, Mwari wenyu unozovadzinga, nokuvatinha kubva mukuona kwenyu; nemwi munozogara nhaka yenyika yavo, kudai ngezvaakagondisa Mambo Mwari, Mwari wenyu kwomuri.

⁶ Ndizvo itai vanoshinga kakurutu kuti mungwarire nokuita zveshe zvakanyorwa mubhuku rezvironzo zvaMosi, kuti musazopauka kubva kwezviri kuenda kumudyo nokuti kumuoshwe,

⁷ kuti musazobvengedzana naaya madzinza, anosara pakati penyu, nokuti musazoronza mazina ezvimwari zvawo, nokuti kuita mhiko ndizvo, nokuti kuzvishandira, nokuti kuzvigwadamira.

⁸ Asi namatirai kunaMambo Mwari, Mwari wenyu, kudai ngezvemwakaita metsa nanyamashi.

⁹ Ngokuti Mambo Mwari wakadzinga kubva pamberi penyu madzinza makuru anesimba; asi kwomuri kwaiya kusina munhu waikona kuema pamberi penyu metsa nanyamashi.

¹⁰ Munhu umwe wenyu unodzinga gumi remazana; ngokuti Mambo Mwari, Mwari wenyu ndiye unomurwira, kudai ngezvaakagondisa.

¹¹ Ndizvo ngwarai kuti mumude Mambo Mwari, Mwari wenyu.

¹² Asi kudai mwechizohwirira sure nokuti ngeiri njira, mwechinamatira kuneveaya madzinza asara pakati penyu, mwechizoroodzana nawo, nokupotera kwavari, navo kwomuri,

¹³ ziai ngegwinyiso kuti Mambo Mwari, Mwari wenyu aazodzingi aya madzinza kubva pakati penyu; asi anozoita murau nezvirimbana kwomuri, nemishwapu munhii dzenyu, neminzwa mumadziso enyu, metsa mupere kubva padera peiyi nyika yakanaka yaakapa Mambo Mwari, Mwari wenyu kwomuri.

¹⁴ “Zvino, nyamashi ndinoenda ngenjira yaveshe venyika, nemwi munozia ngomwoyo yenyu yeshe nomweya yenyu yeshe, kuti akuna nachimwe chakatamika kwezviri zveshe zvakanaka zvaakaereketa ndizvo Mambo Mwari, ngepamusoro penyu; zveshe zvakaitika kwomuri, akuna nachimwe chazvo chisikazi kuitika.

¹⁵ Asi kudai ngezvakaitika zveshe zvakanaka zvaakaereketa Mambo Mwari ndizvo kwomuri, ngokudaro Mambo Mwari unozounza padera penyu kushata kweshe, metsa mupere kubva padera penyika iyi yakanaka yaakamupa Mambo Mwari, Mwari wenyu.

¹⁶ Kudai mwechizopauka kubva kuchitenderano chaMambo Mwari, Mwari wenyu, chaakamupanga, nokushandira zvimwari, nokudzikotamisa kwezviri, ushungu hwaMambo Mwari hunozobaka kwomuri, nemwi munozokasira kupera kubva padera penyika iyi yakanaka yaakamupa.”