Josh. 22 - Bhaibheri Rakachena muChindau

Joshua Unopetudza Madzinza oKumabvazuva

¹ Zvino Joshua wakadaidza vaRubheni, vaGadhi, norupande rwedzinza raManase.

² Wakati kwavari, “Imwimwi mwakangwarira izvo zveshe zvaakamupanga Mosi muranda waMambo Mwari, nemwi mwakandipurutana ngeizvo zveshe zvendakamupanga ngeizwi rangu.

³ Amuzi kusiya hama dzenyu mazuva mazhinji aya metsa nanyamashi, asi mwakangwarira mipango nezvironzo zvaMambo Mwari, Mwari wenyu.

⁴ Zvino Mambo Mwari, Mwari wenyu wakapa kuzorora kunehama dzenyu, kudai ngezvaakavagondisa, ndizvo zvino hwirirai muende kumatende enyu, nokunhaka yenyika yenyu, yemwakapuwa ndiMosi muranda waMambo Mwari ngoruseri rweJorodhani.

⁵ Kwega nasai kungwaridzira kumipango nezvironzo, zvaakamupanga Mosi muranda waMambo Mwari, kuti mumude Mambo Mwari, Mwari wenyu, nokuhamba ngenjira dzake dzeshe, mungwarire mipango yake, nokubatirira kwaari, nokumushandira ngomwoyo wenyu weshe, nomweya wenyu weshe.”

⁶ Ndizvo Joshua wakavafumisa akavaendisa, navo vakaenda kumatende avo.

⁷ Zvino Mosi waiya akavapa rupande rwedzinza raManase nhaka yenyika yaBhashani; asi kurupande rumweni rwaro Joshua wakapa nyika pakati pehama dzavo ngouno kworuseri rweJorodhani ngokumabirirazuva. Naapo Joshua avaendesa kumatende avo wakavafumisawo.

⁸ Wakaereketa kwavari echiti, “Hwirirai munepfuma yakawanda kumatende enyu, munen'ombe dzakawanda kakurutu, sirivha, mukore, thusi, simbi nezvokusimira zvakawanda; koveranai zvakachakatwa zvemagaa enyu nehama dzenyu.”

⁹ Ndizvo vaRubheni nevaGadhi, norupande rwedzinza raManase vakahwirira kubva kuvaIsuraeri muShiro, riri munyika yeKhenani kuenda munyika yeGireadhi, kunyika yenhaka yavo yevakapuwa, kudai ngokupanga kwaMambo Mwari kubudikidza ndiMosi.

Arita pasinde peJorodhani

¹⁰ Naapo vaguma kumigano yeJorodhani, iyo iri munyika yeKhenani, vaRubheni, vaGadhi, norupande rwedzinza raManase vakaaka apo pasinde peJorodhani arita guru mukuoneka kwaro.

¹¹ VaIsuraeri vakazwa kwechizwi, “Ringirai, vaRubheni, vaGadhi nevorupande rwedzinza raManase vaaka arita iro rakaringirana nenyika yeKhenani, mumigano yeJorodhani, apo paiya pokuambuka pevaIsuraeri.”

¹² Naapo vaIsuraeri vazvizwa, mbungano yeshe yevaIsuraeri vakaunganidzana pamwepo muShiro, kuti vaende koorwa navo.

¹³ Zvino vaIsuraeri vakatuma Finehasi mukororo waEreaza, mupristi kunevaRubheni, vaGadhi, norupande rwedzinza raManase, kunyika yeGireadhi,

¹⁴ pamwepo naye vatungamiriri gumi umwe kubva kuimwe yemhatso yemadzibaba mukati mwemadzinza eshe aIsuraeri; umwe ngaumwe wavo waiya mukuru wemhatso yemadzinza pakati pevaIsuraeri.

¹⁵ Vakauya kunevaRubheni, vaGadhi, norupande rwedzinza raManase, munyika yeGireadhi, vakaereketa navo vechiti,

¹⁶ “Inoronza izvi mbungano yeshe yaMambo Mwari yechiti, ‘Kupaukanyi uku kwomwaita kubva kunaMwari waIsuraeri, kukunukuka kuhwirira sure nyamashi, kubva mukuteera Mambo Mwari, ngokudziakira arita, kuti mumukire Mambo Mwari ngeiri zuva?

¹⁷ Kushata kwaPheori kuri kudodoko here kwetiri, ukwo kwetisati tashambidzwa kwokuri metsa nanyamashi, ukwo kwakaunza nhenda mukati mwembungano yaMambo Mwari,

¹⁸ kuti mukunukuke nyamashi kubva mukuteera Mambo Mwari? Kuti mukamukira nyamashi Mambo Mwari, mangwani unozotsenekera dzinza reshe revaIsuraeri.

¹⁹ Kunyazwi zvakanyadaro kudai nyika yenyu yakasvipiswa, ambukai muuye kunyika yaMambo Mwari, apo perinogara thabhenakeri raMambo Mwari, muashire nhaka yenyika pakati pedu: asi musamukira Mambo Mwari, nokuti kumukira isusu, ngokuaka arita ngepabanze pearita raMambo Mwari, Mwari wedu.

²⁰ Akhani mukororo waZera aazi kupauka here ngokutora zvezviro zvakatukwa, noushungu hwakadzaka padera pembungano yeshe yaIsuraeri? Nouwo munhu aazi kufa ega mukati mwokushata kwake!’ ”

²¹ Zvino vaRubheni, vaGadhi, norupande rwedzinza raManase vakapingura vechiti kunevakuru vemhuri dzaIsuraeri,

²² “Mambo Mwari, Mwari wezvimwari! Mambo Mwari Mwari wezvimwari! Unozia, nevaIsuraeri pachavo veshe vanozozia! Kudai kwaiya kumukira, nokuti kudai kwaiya kupauka kwokugonda kunaMambo Mwari, musatiponesa nyamashi.

²³ Kudai takadziakira arita rokupauka kubva kwokuteera Mambo Mwari, nokuti takaita kudaro kupira mudiro wokupisha wezviyo newokunyarara, Mambo Mwari emene ngaaunzidzire.

²⁴ Haiwa! Takachiita ngokutya kuti panguva ichauya vana venyu vanozoti kuvana vedu, ‘Munenyi imwimwi kunaMambo Mwari, Mwari waIsuraeri?’

²⁵ Ngokuti Mambo Mwari wakaita kuti Jorodhani riite mugano pakati pedu nemwi, imwimwi vaRubheni nevaGadhi; amuna chikoaniswa kunaMambo Mwari. Ndizvo vana venyu vanozoita kuti vana vedu vareke kudira Mambo Mwari.

²⁶ Ndizvo takati, ngatidziakire arita, haiwa rokupishira mudiro nokuti rokupira mubairo padera paro,

²⁷ asi kuti riite chapupu pakati pedu nemwi, nepakati pemibarirwana inozouya ngesure kwedu, kuti tiite mishando yaMambo Mwari pamberi pake ngemidiro yedu yokupisha, nemibairo yedu, nemidiro yedu yokunyarara; kuitira kuti vana venyu vasazoronza kunevana vedu panguva inouya vechiti, ‘Amuna chikoaniswa naMambo Mwari.’

²⁸ Ndizvo takati kudai vechironza kudaro kwetiri nokuti kumibarirwana yedu panguva inouya, isusu tingazotizve, ‘Ringirai chionero chearita raMambo Mwari, iro revakaita madzibaba edu, haiwa rokupira midiro yokupisha, nokuti mibairo; asi kuita chapupu pakati pedu nemwi.’

²⁹ Mwari asazotenda kuti isusu timukire Mambo Mwari, nokukunukuka nyamashi kuhwirira sure kubva kwokuteera Mambo Mwari, kuti tidziakire arita rokupira midiro yokupisha, midiro yezviyo, nokuti remibairo, ngepabanze pearita raMambo Mwari Mwari wedu riri pamberi pethabhenakeri.”

³⁰ Naapo Finehasi mupristi, nevatungamiriri vembungano, nevakuru vemhuri dzaIsuraeri, vaiya naye, apo vazwa mazwi awo, evakaereketa vaRubheni nevaGadhi, nevaManase, zvakavadakadza.

³¹ Mupristi Finehasi mukororo waEreaza wakati kunevaRubheni nevaGadhi nevaManase, “Nyamashi tinoona kuti Mambo Mwari uri pakati pedu, ngokuti amuzi kuita uku kupauka kurwisana naMambo Mwari; zvino mwaponesa vaIsuraeri kubva kunyara yaMambo Mwari.”

³² Zvino mupristi Finehasi mukororo waEreaza, nevatungamiriri vakahwirira kubva kunevaRubheni nevaGadhi, kubva kunyika yeGireadhi, kuenda kunyika yeKhenani, kuvaIsuraeri, navo vakavaunzirazve izwi.

³³ Izwi rakadakadza vaIsuraeri; nevana vaIsuraeri vakabonga Mwari, avazi kuchazoereketazve ngokukwira kuenda koorwa navo, kooparadza iyo nyika yaigarwa ngevaRubheni nevaGadhi.

³⁴ VaRubheni nevaGadhi vakadudza arita iro vechiti, “Chapupu, ngokuti rinoita chapupu pakati pedu kuti Mambo Mwari ndiye Mwari wedu.”