Josh. 20 - Bhaibheri Rakachena muChindau

Madhorobha oKutizira

¹ Zvino Mambo Mwari wakaereketa kunaJoshua echiti,

² “Ereketa kunevaIsuraeri, wechiti, ‘Emesai madhorobha okutiziremwo, awo endakaereketa ndiwo kwomuri kubudikidza ndiMosi,

³ kuti muurayi uwo unouraya munhu asikazi kuita ngemabomo ungatiziremwo. Anozoita okutiziremwo kubva kumuunzidziri wengazi.

⁴ Muurayi unozotizira kunerimwe raaya madhorobha, naye unozoema ngepamusiwo wedhorobha nokuronza ndaa yake mukuzwa kwevakuru vedhorobha iro; naapo vanozomuashira kwavari mudhorobha, nokumupa ndau, yokuti agare pakati pavo.

⁵ Nokudai muunzidziri wengazi echimurumbirira, naapo vasazopira muurayi munyara dzomuunzidziri, ngokuti wakauraya muakirwana wake asikadi asikamunyenyi ngepamberi.

⁶ Muurayi unozogara mudhorobha iro, metsa azoema pamberi pembungano kuti ndaa yake itongwe, metsa kufa kwomupristi mukuru uwo unozoapo ngamazuva awo; zvino muurayi unozohwirira kanyi nokuuya kudhorobha rake, nokumhatso yake, kudhorobha umwo mwaakaurayira munhu.’ ”

⁷ Ndizvo vakaemesa Kedheshi muGarire, munyika yemitunhu weNafitari, naShekhemu munyika yemitunhu waEfuremu, naKiriathiabha, kuronza Hebroni, munyika yemitunhu waJudha.

⁸ Noruseri rweiyo rweJorodhani ngepasinde peJerikho ngokumabvazuva, vakaemesa Bheza riri mushango munyika yedzinza raRubheni, naRamothi muGireadhi munyika yedzinza raGadhi, naGorani muBhashani, kubva kudzinza raManase.

⁹ Aya madhorobha akaemeserwa vaIsuraeri veshe, nevapara vaiya zvigarandimo pakati pavo, kuti kunyazwi ndiani unouraya munhu asiri mabomo ungatiziremo, kuti asafa ngenyara yomuunzidziri wengazi, metsa aeme pamberi pembungano.