Josh. 2 - Bhaibheri Rakachena muChindau

Joshua Unotuma Vanengeri muJerikho

¹ NaJoshua mukororo waNuni wakatuma vairi kubva Shitimu, kuenda koonengera ngokufishika echiti, “Endai, mwodongorera nyika, kakurutu Jerikho.” Ndizvo vakaenda, vakaguma kumhatso yechifebi, zina racho raiya Rahabhi, navo vakaatapo.

² Mambo weJerikho akaronzerwa kwechizwi, “Penya, vaIsuraeri vamweni vaguma muno usiku uhwu, kunengera nyika.”

³ Zvino mambo weJerikho wakatumira kunaRahabhi echiti, “Budisa vanhu vaguma kwouri, vapotera mumhatso yako, ngokuti vauya kunengera nyika yeshe.”

⁴ Asi mukadzi wakatora avo vamuna vairi, akavafisha. Zvino wakati, “Ngegwinyiso vamuna vauya kwendiri, asi andizi kuzia kuti vanobva pari.

⁵ Ngomukuwo wokukonywa kwomusiwo kwasvipa, ndizvo vamuna vabuda; andizii pevaenda. Kasirai kuvarumbirira, munovabata.”

⁶ Asi iye waiya avakwidza pachachungu chemhatso, wakavafisha mumazhonje orukangaza, aaiya akarongedza padera pechachungu chemhatso.

⁷ Ndizvo vamuna vakavarumbirira, kuteera njira inoenda Jorodhani kumazambuko. Ngesure vabuda vaivarumbirira, vakakonya musiwo.

⁸ Vasati vaata, uwo mukadzi wakauya kwavari padera pechachungu chemhatso,

⁹ naye wakati kwavari, “Ndinozia kuti Mambo Mwari wamupa iyi nyika, nokutyisa kwenyu kwawira padera pedu, nevagari veshe venyika vapera simba ngendaa yenyu.

¹⁰ Ngokuti takazwa ngenjira yaakaemesa ndiyo Mambo Mwari mvura yoRuandhle Rwakatsvuka, ngepamsoro penyu, apo mwakakwira kubva Egipite, neizvo zvemwakaita kumadzimambo mairi evaAmori, vaiya ngoruseri urwo rweJorodhani, Sihoni naOgi, vemwakauraya.

¹¹ Paripo tazwa izvi mwoyo yedu yakapera simba, akuzi kusara nokushinga mukati mwomunhu nokuti ngouri, ngendaa yenyu. Mambo Mwari, Mwari wenyu ngegwinyiso ndiye Mwari womudenga padera nomunyika nepashi.

¹² Ndizvo zvino ndinomupota, pikai kwendiri ndi Mambo Mwari, mwechiona kuti ndamuitira nyasha, kuti nemwi munozopangidzira nyasha kunevemhatso yababa angu, mundipe chioniso chinegwinyiso,

¹³ kuti munozoponesa baba angu, namai angu, nevakoma vangu, nemadziyaya angu, navo veshe vari vavo, nokuponesa ndaramo dzedu kubva mukufa.”

¹⁴ Vamuna avo vakamupingura vechiti, “Tinozofa isusu kuti imwimwi mupone, kudai musikazodudziri uyu mushando wedu. Naapo kunozoitika apo Mambo Mwari paanozopa nyika kwetiri ngegwinyiso tinozokuitira nyasha.”

¹⁵ Naapo wakavadzasa pashi ngebote ngepafasitera, ngokuti mhatso yake yaiya ngokurukumbati rwedhorobha, naye waigara parukumbati.

¹⁶ Wakati kwavari, “Tizirai kumitunhu, kuti musashongana naavo vanomurumbirira. Mudzifishe apo mazuva matatu, metsa avo vanomurumbira vapetuka; zvino ngesure kweizvo munozoenda henyu.”

¹⁷ Vamuna vakati kwaari, “Tinozoita vasina ndaa ngeiyi mhiko yewatipikisa ndiyo kwouri,

¹⁸ kudai, apo toguma munyika iyi, ukasasungira rungoyi urwu rwakatsvuka ngepafasitera apo pewatidzasa ndipo, newe usikaunganidzi mumhatso yako baba ako, mai ako, vakoma vako, navo veshe vemhuri yako.

¹⁹ Kudai umwe wenyu kunyazwi ndiani unozobuda kumisiwo yemhatso yako kuenda kubanze mupato, ngazi youwo inozoa padera pesoro rake, nesu tinozoita vasina ndaa; asi kudai nyara ikakuwadza kunyazwi ndiani unewe mumhatso mwako, tinozoa nendaa yokufa kwake.

²⁰ Asi kudai wechizodudzira uyu mushando wedu, naapo tinozosunhurwa kubva kumhiko iyi yewakatipikisa kwouri.”

²¹ Naye wakati, “Ngakuitike kudai ngokuereketa kwenyu.” Wakavaendesa, navo vakaenda. Zvino wakasungira rungoyi rwakatsvuka pafasitera iro.

²² Vakabva, vakaenda kumutunhu, vakagara apo mazuva matatu, metsa avo vaivarumbirira vapetuka. Varumbiriri vakatsvaka munjira yeshe, asi avazi kuvaona.

²³ Ndizvo vamuna vairi vakadzaka kubva kumutunhu. Vakaambuka, vakaguma kunaJoshua mukororo waNuni, vakamushumira zveshe zvaiya zvaitika kwavari.

²⁴ Navo vakati kunaJoshua, “Ngegwinyiso Mambo Mwari wapa nyika yeshe munyara dzedu; zve, vagari veshe venyika vanopera simba ngokutya pamberi pedu.”