Josh. 18 - Bhaibheri Rakachena muChindau

Kugurwa kweNyika Yakasara

¹ Zvino mbungano yeshe yevaIsuraeri yakaungana muShiro, vakaemesa tende romushongano apo. Nyika yakanyiswa yaiya pamberi pavo.

² Kwakasara pakati peIsuraeri madzinza manomwe vaiya vasati vaashira chikoaniswa chenhaka yavo.

³ Ndizvo Joshua wakati kuvaIsuraeri, “Munodzirekeredza mukuwo wakaitawani musikaendi koogara nhaka yenyika yaakamupa Mambo Mwari, Mwari wemadzibaba enyu?

⁴ Tsarai vanhu vatatu kubva kudzinza rimwe ngarimwe, neni ndinozovatuma, vanozomiruka nokuhamba ngomunyika, nokuinyora kudai ngenhaka yavo. Vanozouyazve kwendiri.

⁵ Vanozoigura kuita marupande manomwe; vaJudha vanozogara munyika yavo, ngokurutii rwokubani, nevemhatso yaJosefa vanozogara nyika yavo yedera.

⁶ Ndizvo munozoguragura nyika kuita marupande manomwe, muuye muronze magurire acho kwendiri, kuti ndinozomuitira mabhigidha pamberi paMambo Mwari, Mwari wedu.

⁷ Asi vaRevhi avazoa nechikoaniswa pakati penyu, ngokuti upristi hwaMambo Mwari hunozoita chikoaniswa chenhaka yavo; nevaGadhi nevaRubheni, norupande rwedzinza raManase, vakapuwa chikoaniswa chenhaka yavo ngoruseri rweJorodhani ngokumabvazuva, chevakapuwa ndiMosi muranda waMambo Mwari.”

⁸ Ndizvo vamuna vakamiruka vakaenda; naJoshua wakapanga avo vakaenda koona migano yenyika echiti, “Endai muhambe ngomunyika, munyore mamiriro enyika, muuyezve kwendiri, kuti ndimuitire mabhigidha pamberi paMambo Mwari muShiro.”

⁹ Ndizvo vamuna vakaenda, vakahamba ngomunyika, vakaiguragura ngemadhorobha kuita zvikoaniswa zvinomwe, nokuzvinyora mubhuku; vakauyazve kunaJoshua kunembungano muShiro,

¹⁰ naJoshua wakaita mabhigidha muShiro pamberi paMambo Mwari; naapo Joshua wakakoanisa nyika kunevaIsuraeri kudai ngokuteererana kwemadzinza avo.

Nyika Yakapuwa Bhenjamini

¹¹ Chikoaniswa chenhaka yedzinza raBhenjamini chakagurwa kudai ngokuteererana kwemhuri dzavo, nenyika yechikoaniswa chenhaka yavo yaiya ngepakati pevana vaJudha nevaJosefa.

¹² Mugano wavo ngorutii rwedera waibvira Jorodhani; wechikwira ngorutii rwedera rweJerikho, nawo wakadarika kupotya mitunhu ngokumabirirazuva; nokubuda kwokuguma kwawo kwaiya kweshango reBhethiavheni.

¹³ Kubvapo mugano unodarika kuenda Ruzi, (iro riri Bhetheri,) ngorutii rwokubani; nomugano unodarika kudzaka Atarothiadha, ngepasinde pekamutunhu ako kari ngorutii rwokubani rweBhethihoroni rokubani.

¹⁴ Zvino unodarika kubva apo wakamonerera kumhiri kworuandhle rwokumabirirazuva ngokubani; kubva kukamutunhu ako kari pamberi peBhethihoroni ngokurutii rwokubani; nokubuda kwokuguma kwawo kwaiya kwokuKiriathibhaari, rinozwi Kiriathijearimu, dhorobha revana vaJudha. Uyu ndiwo mugano worutii rwokumabirirazuva.

¹⁵ Mugano worutii rwokubani waiya wechibvira kumugano weKiriathijearimu, nomugano unodarika kuenda ngokurutii rwokumabirirazuva, wechiguma kuchinyuka chemvura cheNefutoa.

¹⁶ Zvino mugano unodzaka kuenda kumugano womutunhu uri pamberi pebani romukororo waHinomu, uwo uri mubani reRefaimu ngorutii rwedera, nawo unodarika kudzaka kubani raHinomu, ngokurutii rwevaJebhusi ngokubani, wechidzaka kudarika kuenda Enirogeri.

¹⁷ Zvino nawo wakagurwa wechidarika kubva ngedera, wakapinda kuenda Enishemeshi, nokubapo unobuda kudarika kuenda Gerirothi, riri ngepamberi pokukwira kuenda Adhumimu, nawo unodarika kudzaka kuBuwe raBhohani mukororo waRubheni;

¹⁸ nokudarika kuenda wakaringirana neArabha ngokurutii rwedera, wechidzaka kuenda Arabha.

¹⁹ Zvino mugano unodarika kuenda ngokurutii rweBhethihogira ngokurutii rwedera nomugano unoguma kumugano kwaiya kuchiforo chedera choRuandhle rwoMunyu ngokurutii rwemagumo okubani eJorodhani: uyu waiya mugano wokubani.

²⁰ Jorodhani rinoita mugano ngokurutii rwokumabvazuva. Iyi ndiyo nhaka yenyika yevana vaBhenjamini, ngemigano yayo, yokutendenedza kumarutii eshe, kudai ngokuteererana kwemhuri dzavo.

²¹ Zvino madhorobha edzinza revana vaBhenjamini kudai ngokuteererana kwemhuri dzavo aiya Jerikho, Bhethihogira, Emekezizi,

²² Bhethiarabha, Zemaraimu, Bhetheri,

²³ Avhimu, Para, Ofira,

²⁴ Khefaramoni, Ofini naGebha; madhorobha ari gumi namairi nemaguta awo.

²⁵ Gibheoni, Rama, Bheerothi,

²⁶ Miziphe, Khefira, Moza,

²⁷ Rekemu, Iripeeri, Tarara,

²⁸ Zera, Haerefu, Jebhusi, (ndiro Jerusarema,) Gibhea, naKiriathi; madhorobha ari gumi namarongomuna nemaguta awo. Iyi ndiyo nhaka yenyika yavana vaBhenjamini kudai ngokuteererana kwemhuri dzavo.