Josh. 17 - Bhaibheri Rakachena muChindau

KuMabirirazuva kwaManase

¹ Vakakoanisirwa nyika ngemabhigidha vedzinza raManase, ngokuti ndiye waiya dangwe raJosefa. Makhiri dangwe raManase, baba aGireadhi, wakapuwa Gireadhi naBashani ngokuti waiya munhu wehondo.

² Vakakoanisirwa mabhigidha vamweni vevana vaManase kudai ngokuteererana kwemhuri dzavo: Abhieza, Hereki, Asirieri, Shekhemu, Heferi naShemidha; ava ndivo vana vevamuna vaManase mukororo waJosefa kudai ngokuteererana kwemhuri dzavo.

³ Zvino Zerofehadhi mukororo waHeferi, mukororo waGireadhi, mukororo waMakhiri, mukororo waManase, waiya asina vana vevakomana, asi waiya nevanasikana vega; aya ndiwo mazina evanasikana vake, Mahla, Noa, Hogira, Mirikha naThiriza.

⁴ Navo vakauya pamberi paEreaza mupristi, nepamberi paJoshua mukororo waNuni, nepamberi pevatungamiriri vechiti, “Mambo Mwari wakapanga Mosi kuti atipe nhaka pakati pehama dzedu.” Ndizvo wakavapa nhaka pakati pehama dzababa avo kudai ngezvaakapanga Mambo Mwari.

⁵ Ndizvo Manase wakaashira zvikoaniswa gumi ngepabanze penyika yeGireadhi neyeBhashani, dzaiya ruseri rweJorodhani.

⁶ Ngokuti vanasikana vaManase vakagara nhaka pamwepo nevakororo vake. Vamweni vevakororo vaManase vakapuwa nyika yeGireadhi.

⁷ Nyika yaManase yaibvira Asha kuguma Mikhimethathi, iri kumabvazuva kweShekhemu; zvino mugano unoenda ngokubani metsa kuguma kuvagari veEnitapua.

⁸ Zvino Manase waiya nenyika yeTapua, asi dhorobha reTapua raiya pamugano waManase raiya revana vaEfuremu.

⁹ Zvino mugano waidzaka kuenda kubani reKhana. Ngokurutii rwekubani, rwemukova: aya madhorobha aEfuremu ari pakati pemadhorobha aManase. Mugano waManase waiya ngedera kwebani, nemagumo awo aiya oruandhle.

¹⁰ Ngokurutii rwokubani yaiya nyika yaEfuremu, nangokurutii rwedera rwaiya nyika yaManase, noruandhle rwaiya mugano wake navo; nayo yakashongana pamwepo ngedera muAsha, nomuIsakha ngokumabvazuva.

¹¹ Manase wakapuwa muIsakha nomuAsha Bhethisheani nemaguta aro, neIbhireamu nemaguta aro, nevagari veDhori, nemaguta aro, neveEnidhori nemaguta aro, nevagari veTaanakhi nemaguta aro, nevagari veMegidho nemaguta aro, (dhorobha rechitatu riri Nafathi.)

¹² Vana vaManase avazikukona kudzinga vagari vaaya madhorobha; asi vaKhenani vakaangira kugara munyika iyo.

¹³ Asi apo vaIsuraeri vaiya vaane simba vakaita vaKhenani hloko dzavo; asi avazi kuvadzinga yaamho.

Efuremu naManase wokuMabirirazuva Vanokumbira Kututsirwa Nyika

¹⁴ Vana vaJosefa vakaereketa kunaJoshua vechiti, “Ngenyi watipa chikoaniswa chimwe nenyika yedu kuita imwe yega, wechiona kuti tiri dzinza guru, kudai ngezvaakatifumisa Mambo Mwari metsa nazvino?”

¹⁵ NaJoshua wakati kwavari, “Kudai muri dzinza guru, endai kunyika yemakwasha, muteme makwasha munyika yevaPherizi, neyevaRefaimu ngokuti nyika yomutunhu yaEfuremu yakatsonga yaamho kwomuri.”

¹⁶ Vana vaJosefa vakati, “Nyika yemitunhu aitikwani: vaKhenani veshe vanogara munyika yebani vanengoro dzesimbi, veshe veBhethisheani nemaguta aro, naavo vanogara muBani raJezireeri.”

¹⁷ Zvino Joshua wakaereketa kunemhatso yaJosefa, kunevaEfuremu nokunavaManase, echiti, “Ngegwinyiso muri dzinza rakakura, munesimba guru; amuzoane chikoaniswa chimwe chega,

¹⁸ asi nyika yemitunhu inozoita yenyu; kunyazwi iri gwasha, munozoritemera pashi, naro rinozoita nhaka yenyu metsa kumigano yokuretu; ngokuti munozodzinga vaKhenani, kunyazwi vanengoro dzesimbi, vanesimba guru.”