Josh. 12 - Bhaibheri Rakachena muChindau

Madzimambo Akanyiswa ndiMosi

¹ Zvino aya ndiwo madzimambo enyika, avo vakanyiswa ngevaIsuraeri, nokugara nhaka yenyika yavo ngoruseri rwouno rweJorodhani ngokumabvazuva, kubvira mubani reArinoni metsa kuguma kuMutunhu weHermoni, nemabani eshe ari kumabvazuva:

² Sihoni mambo wevaAmori waigara muHeshibhoni, echitonga nyika inobvira Aroeri, riri kubandanda rebani Arinoni, nokubvira pakati pebani iro, nokubvira kurupande rweGireadhi, eya, metsa kuguma kurwizi Jabhoki, urwo ruri kumugano wevana vaAmoni parupande rweGireadhi,

³ nokubva mubani metsa kuguma kuruandhle rweKhinerothi ngokumabvazuva, ngenjira inoenda Bhethijeshimothi; kuenda kuruandhle rweArabha, Ruandhle Rwakafa, kubva kubani, ngepashi pemabandanda Phisiga;

⁴ naOgi mambo waBhashani, umwe wevakasara vevaRefaimu, waigara muAshitharothi nepaEdrei.

⁵ Naye wakatonga paMutunhu weHermoni, nomuSareka, nomuBhashani reshe, metsa kuguma kumigano yevaGeshuri neveMaakathi, nepadera porupande Gireadhi, mugano waSihoni mambo weHeshibhoni.

⁶ Mosi muranda waMambo Mwari nevaIsuraeri vakavanyisa naMosi muranda waMambo Mwari wakapa nyika yavo kuita nhaka vaRubheni, navaGadhi, nokurupande rwedzinza raManase kuita nhaka yavo.

Madzimambo Akanyiswa ndiJoshua

⁷ Naaya ndiwo madzimambo enyika aakauraya Joshua nevaIsuraeri ngoruseri rwouno rweJorodhani ngokumabirirazuva, kubvira Bhaarigadhi mubani reRebhanoni metsa kuguma kuMutunhu weHaraki, uwo unokwira kuguma Seira; nyika yaakapa Joshua kuvaIsuraeri kuita nhaka yavo kudai ngokukoanisirwa kwavo,

⁸ kunyika yemitunhu, mundau yakaterama, mumabani, mubandanda nomushango, munyika dzokubani, dzevaHiti, dzevaAmori, dzevaKhenani, dzevaPherizi, dzevaHivhi nedzevaJebhusi:

⁹ Mambo weJerikho, umwe, mambo weAi iro riri pasinde peBhetheri, umwe,

¹⁰ mambo weJerusarema, umwe, mambo weHebroni, umwe,

¹¹ mambo weJarimuthi, umwe, mambo weRakhishi, umwe,

¹² mambo weEgironi, umwe, mambo weGeza, umwe,

¹³ mambo weDhebhiri, umwe, mambo weGedha, umwe,

¹⁴ mambo weHorma, umwe, mambo waAradhi, umwe,

¹⁵ mambo weRibhina, umwe, mambo weAdhuramu, umwe,

¹⁶ mambo weMakedha, umwe, mambo weBhetheri, umwe;

¹⁷ mambo weTapua, umwe, mambo weHeferi, umwe,

¹⁸ mambo waAfeki, umwe, mambo weRasharoni, umwe,

¹⁹ mambo weMadhoni, umwe, mambo weHazori, umwe,

²⁰ mambo weShimuronimeroni, umwe, mambo weAkhishafi, umwe,

²¹ mambo weTaanakhi, umwe, mambo weMegidho, umwe,

²² mambo weKedheshi, umwe, mambo weJokineamu reKharmeri, umwe,

²³ mambo weDhori mumugano muNafathidhori, umwe, mambo weGoyimu muGarire, umwe,

²⁴ mambo weThiriza, umwe, madzimambo eshe aiya makumi matatu naumwe.