Josh. 11 - Bhaibheri Rakachena muChindau

Joshua Unonyisa Jabhini

¹ Naapo Jabhini mambo weHazori azwa izvi, wakatuma kunaJobhabhi mambo weMadhoni, nokunamambo weShimuroni, nokunamambo weAkhishafi,

² nokunamadzimambo aiya ngedera, kunyika yemitunhu, naavo vaiya mumabani, ngokubani kweKhinerothi, nomubani, nomuNafothidhori ngokumabirirazuva,

³ nokuna vaKhenani vaiya ngokumabvazuva nokumabirirazuva, nokuvaAmori, nokuvaHiti, nokuvaPherizi, nokuvaJebhusi vaiya kunyika yemitunhu, nokuvaHivhi, vaigara ngepashi pomutunhu Hermoni munyika yeMizipha.

⁴ Vakabuda nehondo dzavo dzeshe, vanhu vazhinji, kudai ngouwandu hwejecha riri pahumbikumbi yoruandhle, vanemahachi nengoro zvakawanda kakurutu.

⁵ Madzimambo aya eshe aiya aungana pamwepo, vakauya, vakaemesa pamwepo matende avo kumvura yeMeromu, kuti varwe nevaIsuraeri.

⁶ Mambo Mwari wakati kunaJoshua, “Usatya ngendaa yavo, ngokuti mangwani ngouyu mukuwo ndinozovapira kuti vaurawe pamberi pevaIsuraeri; munozotematema mahachi avo, nokupisha ngoro dzavo ngomuriro.”

⁷ Ndizvo Joshua wakaguma, nevanhu veshe vehondo, vakavajuma vari kumvura yeMeromu; navo vakavabaya.

⁸ NaMambo Mwari wakavapira munyara dzevaIsuraeri, avo vakavauraya nokuvarumbirira metsa vakaguma Sidhoni guru, nokuMisirefothimaimu, nokumabani eMizipha ngokumabvazuva. Vakavauraya, metsa kusina naumwe waipona.

⁹ NaJoshua wakaita kwavari kudai ngezvaakapanga Mambo Mwari kwaari; wakatematema mahachi avo, wakapisha ngoro dzavo ngomuriro.

¹⁰ Joshua wakapetuka ngouwo mukuwo, akanyisa Hazori, wakauraya mambo waro ngeshoti. Nguva iyi isati yaguma Hazori raiya dhorobha guru roumambo uhwo hweshe.

¹¹ Navo vakauraya vanhu veshe vaigaremwo ngokupinza kweshoti, vechivapedza yaamho; akuzi kusara naumwe waipona; naye wakapisha Hazori ngomuriro.

¹² Joshua wakanyisa madhorobha eshe eawo madzimambo, nemadzimambo awo, wakaauraya ngokupinza kweshoti, naye wakaapedza yaamho, kudai ngezvaakapanga Mosi muranda waMambo Mwari.

¹³ Asi ngendaa yemadhorobha aiya mumitunhu, vaIsuraeri avazi kupisha narimwe rawo, kwega Hazori, iri rakapishwa ndiJoshua.

¹⁴ Nezvakachakatwa zveshe zvemadhorobha aya, nezvifuyo zvawo, vaIsuraeri vakazvichochota ngokwavo; asi vanhu veshe vakavabaya ngokupinza kweshoti, metsa vaiya vavapedza, navo avazi kusiya naumwe echipona.

¹⁵ Kudai ngezvaakapanga Mambo Mwari kunomuranda wake Mosi, ndizvo Mosi wakapanga Joshua, ndizvo Joshua wakaita; aazi kusiya chiro nachimwe chisikazi kuitwa cheizvo zveshe zvaakapanga Mambo Mwari kunaMosi.

Nyika Yakatorwa ndiJoshua

¹⁶ Ndizvo Joshua wakanyisa nyika iyo yeshe, nyika yemitunhu, nenyika yeshe yokubani, nenyika yeshe yeGosheni, nemabani, nemabandanda, nenyika yemitunhu yaIsuraeri, nemabani ayo,

¹⁷ kubva kuMutunhu Haraki, unokwira kuenda Seira, metsa kuguma kuBhaarigadhi mubani reRebhanoni ngepashi poMutunhu Hermoni. Madzimambo ayo eshe wakavatora, wakavabaya, akavauraya.

¹⁸ NaJoshua wakarwa nemadzimambo awo eshe mukuwo wakareba.

¹⁹ Akuna dhorobha rakaiyana nevaIsuraeri, ngepabanze pevaHivhi vega vagari veGibheoni; vamweni veshe vakavanyisa ngokurwa.

²⁰ Ngokuti kwaiya kuda kwaMambo Mwari kukonzisa mwoyo yavo, kuti vauye varwe nevaIsuraeri mukurwa, kuitira kuti avapedze yaamho, kuti asazovaitira nyasha, asi kuti avapedze kudai ngezvaakapanga Mambo Mwari kunaMosi.

²¹ Ngouwo mukuwo Joshua wakauya, akaparadza vaAnaki, kubva kunyika yemitunhu, kubva Hebroni, kubva Dhebhiri, kubva Anabhi, nokubva kunyika yeshe yemitunhu yeJudha, nokubva kumitunhu yenyika yeshe yeIsuraeri. Joshua wakavapedza veshe yaamho, nemadhorobha avo.

²² Akuna naumwe wevaAnaki wakasara munyika yevaIsuraeri; vamweni vakasara kwega muGaza, muGathi nomuAshidhodhi.

²³ Ndizvo Joshua wakatora nyika yeshe, kudai ndizvo zveshe zvaakaronza Mambo Mwari kunaMosi; naJoshua wakaipa kuvaIsuraeri kuita nhaka kudai ngokukoanisirwa kwavo kumadzinza avo. Nenyika yakazorora kubva kuhondo.