Josh. 1 - Bhaibheri Rakachena muChindau

Mwari Unopanga Joshua Kunyisa Khenani

¹ Zvino ngesure kwokufa kwaMosi muranda waMambo Mwari, Mambo Mwari wakaereketa kunaJoshua mukororo waNuni, mudetseri waMosi echiti,

² “Muranda wangu Mosi wafa; zvino miruka, uambuke Jorodhani, iwewe navanhu ava veshe, kuenda kunyika yendinovapa vaIsuraeri.

³ Ndau dzeshe dzinozotsikwa ngetsoka dzenyu, ndapa kwomuri, kudai ngezvendakagondisa kunaMosi.

⁴ Kubvira kushango, nokuRebhanoni metsa kuguma kurwizi rukuru, Rwizi Yufratesi, yeshe nyika yevaHiti, nokuguma kuruandhle rukuru ngokumabirirazuva, ndiyo inozoita nyika yenyu.

⁵ Akuna nomunhu unozokona kuema pamberi pako eshe mazuva okupona kwako. Kudai ngezvendaiya naMosi, ngokudaro ndinozoa newe; andizokukoreresi, nokuti kukusiya.

⁶ Ita wakagwinya newakashinga; ngokuti ndiwe unozokoanisira ava vanhu nyika kuita nhaka, yendakapika ndiyo kumadzibaba avo kuti ndinozovapa.

⁷ Kwega ita wakagwinya, ushinge kakurutu, kuti ungwarire kuita yeshe mipango, yaakapanga Mosi muranda wangu usapauka kubva kweiri kuenda kumudyo nokuti kumuoshwe, kuti ubudirire kundau dzeshe dzounoenda.

⁸ Iri bhuku remipango risazobva pamuromo wako; asi unozopinimidza ndiro masikati nousiku, kuti ungwarire zveshe zvakanyorwa mukati mwaro. Ngokuti ngokudaro unozopfumiswa munjira yako, naapo unozonasa kubudirira.

⁹ Andizi kukupanga here? Ita wakagwinya, unase kushinga; usatya, usakaruka, ngokuti Mambo Mwari, Mwari wako unewe kundau dzeshe dzounozoenda.”

Joshua Unopa Mipango Vatungamiriri veVanhu

¹⁰ Ndizvo Joshua wakapanga vatungamiriri vevanhu echiti,

¹¹ “Darikai ngepakati pembungano, mupange vanhu mwechiti, ‘Dzinasirirei zvokudya; ngokuti mumazuva matatu munozoambuka Jorodhani, kuti mupotere kugara nhaka yenyika yaanozomupa Mambo Mwari, Mwari wenyu kuti muigare nhaka.’ ”

¹² Joshua wakaereketa kuvaRubheni, nokuvaGadhi, nokurupande rwaManase echiti,

¹³ “Cherechedzai izwi raakamupanga Mosi muranda waMambo Mwari echiti, ‘Mambo Mwari, Mwari wenyu unomupa ndau yokuzorora, naye unozomupa nyika iyi.’

¹⁴ Vakadzi venyu, nevana venyu, nezvifuyo zvenyu, zvinozosara munyika iyi yaakamupa Mosi ngouno kworuseri rweJorodhani; asi varwi veshe vari pakati penyu vanozoambuka vakapakatira zvokurwa ndizvo pamberi pehama dzenyu navo vanozovadetsera,

¹⁵ metsa Mambo Mwari apa hama dzenyu kuzorora, pamwepo nemwi, navowo vagare nhaka yenyika yaanopa Mambo Mwari, Mwari wenyu kwavari. Zvino munozopetuka kunyika iyi yenhaka yenyu, mudakare ndiyo, yemwakapuwa ndiMosi muranda waMambo Mwari, ngoruseri rwouno rweJorodhani, ngokumabvazuva.”

¹⁶ Navo vakapingura Joshua vechiti, “Zveshe zvewatipanga, tinozozviita, kunyazwi ngepari pounozotituma tinozoenda.

¹⁷ Kudai ngezvetakamupurutana Mosi ngezviro zveshe, ndizvo tinozokupurutanawo. Kwega kuti Mambo Mwari, Mwari wako aanewe, kudai ngezvaaia naMosi!

¹⁸ Kunyazwi ndiani unozomukira mipango yako, asikapurutani mazwi ako eshe ounomupanga, unozourawa. Kwega ita wakagwinya, ushinge.”