Jona 4 - Bhaibheri Rakachena muChindau

Kunyangadzwa kwaJona neNyasha dzaMwari

¹ Asi zvakashisha Jona kakurutu, akanyangadzwa.

² Wakakumbira kunaMambo Mwari, akati, “Ndapota, O Mambo Mwari! Izvi andizvopi here zvendakaereketa, apo pendaiya munyika mwangu? Ndizvo zvakaita kuti nditizire Tharshishi kutanga; ngokuti ndakazia kuti uri Mwari unenyasha, wakazara ngokukungurira, unononoka kunyangadzwa, unowanza nyasha dzinorudo, unokunukuka kubva mukuorora.

³ Nazvino, O Mambo Mwari, ndapota, dusa kupona kwangu kubva kwendiri, ngokuti kwakapinda kunaka kwendiri kufa kuno kupona.”

⁴ NaMambo Mwari wakati, “Zvakanaka here kuti unyangadzwe?”

⁵ Zvino Jona wakabuda kubva mudhorobha, akagara kurupande rwokumabvazuva kwedhorobha, naye wakadziitirapo muchacha. Wakagara pashi pawo mubvute, echigarira kuti aone zvaizoitika kudhorobha.

⁶ Mambo Mwari, Mwari wakanasirira mupfuta, akaita kuti ukure padera paJona, kuti uite bvute padera pesoro rake, kumuembedzera mukutambudzika kwake. Ndizvo Jona wakadakara kakurutu ngomupfuta.

⁷ Asi apo mumambakwedza ezuva raiteera Mwari wakanasirira gonye, naro rakatema mupfuta, worowozeketera.

⁸ Naapo zuva rabuda, Mwari wakanasirira dutu rinopisha rokumabvazuva; nezuva rakapisha pasoro raJona, oroodemera, wakakumbira mukati mwake kuti afe. Wakati, “Kwakapinda kunaka kwendiri kufa kuno kupona.”

⁹ Asi Mwari wakati kunaJona, “Zvakanaka here kuti unyangadzwe ngendaa yomupfuta?” Naye wakati, “Eya, ndinonasa kunyangadzwa metsa kufa.”

¹⁰ Zvino Mambo Mwari wakati, “Wapinda kutambudzika ngendaa yomupfuta, wousikazi kushandira nokuti kuita kuti ukure; uwo wakamera usiku, ukafazve usiku.

¹¹ Akusisiri here kuti nditambudzikire Ninevhe, iro dhorobha guru, umwo munevanhu vanopinda zana nemakumi mairi emakumi emazana (120,000), avo vasikakoni kuparadzanisa pakati penyara yavo yokumudyo neyokumuoshwe, nezvifuyo zvakawanda?”