Jona 3 - Bhaibheri Rakachena muChindau

Jona Unopurutana Mambo Mwari

¹ Izwi raMambo rakauya kunaJona ngokwechipiri rechiti,

² “Miruka, uende Ninevhe, iro dhorobha guru, uchumaire kweriri izwi rendinokuronzera.”

³ Ndizvo Jona wakamiruka, akaenda Ninevhe, kudai ngeizwi raMambo Mwari. Zvino Ninevhe raiya dhorobha guru yaamho, romuhambo wemazuva matatu.

⁴ Jona wakatanga kupotera mudhorobha muhambo wezuva rimwe. Naye wakadaidzira akati, “Achipo mazuva makumi marongomuna, Ninevhe rinozoparadzwa!”

⁵ Vanhu veNinevhe vakagonda Mwari; vakadaidzira kuera kudya, munhu weshe mukuru nomudoko wakapfeka machira emasaka.

⁶ Naapo mashoko akaguma kunamambo weNinevhe, wakamiruka kubva pedendemaro rake, akabvisa chokufuka chake, akapfeka machira emasaka, akagara mumarota.

⁷ Zvino wakaita kuti kuteketeswe muNinevhe mweshe: “Ngechironzo chamambo nevakuru vake, chokuti, ‘Akuna munhu nokuti mhuka, n'ombe nokuti makwai, zvinozoraira chiro. Zvisazodya nokuti kumwa mvura.

⁸ Asi vanhu nemhuka ngazvifukidzwe ngemachira emasaka, nazvo ngazvicheme ngesimba kunaMwari. Zveshe ngazvitenderuke kubva kunjira yazvo yakashata, nokubva mukugebenga kuri munyara dzazvo.

⁹ Ndiani unozia? Pamweni Mwari unozotenderuka nokukungurira, nokupauka kubva mukunyangadzwa kwake kunotyisa, kuti tisazofa.’ ”

¹⁰ Naapo Mwari aona mishando yavo, kuti vakatenderuka kubva kunjira dzavo dzakashata, Mwari wakafuratira kushata kwaakaronza kuti waizoita kwevari; naye aazi kukuita.