Jona 2 - Bhaibheri Rakachena muChindau

Mukumbiro waJona

¹ Zvino Jona wakakumbira kunaMambo Mwari, Mwari wake, ari mundani mwehove,

² wakati, “Ndakadaidzira kunaMambo Mwari ngendaa yokutambudzika kwangu, naye wakandipingura; ndakachema ndiri mundani yeSheori, newe wakazwa izwi rangu.

³ Ngokuti wakandikandira muudzamu, mumwoyo woruandhle, nendambi yakanditendenedza; mafungo ako eshe nemavimbi ako akandifukidza.

⁴ Zvino ndakati, ‘Ndarashwa kubva pamberi pemadziso ako; ndinozoringirazve ngenjiranyi kutemperi rako rakachena?’

⁵ Mvura yakandimbonya; kudzama kwakanditendenedza; majekajeka akaputira soro rangu.

⁶ Panzinde dzemitunhu ndakadzaka pashi panyika nemipiningidzo yayo yakakonyeka padera pangu mhera nariini; asi wakabudisa kupona kwangu kubva murindi, O Mambo Mwari, Mwari wangu.

⁷ Apo mweya wangu wakademera mukati mwangu, ndakakarakadza Mambo Mwari; nomukumbiro wangu wakapotera kwouri, mutemperi rako rakachena.

⁸ Avo vanotenda miedzaniso isina shwiro vanoramba gwinyiso rokuitirwa kwavo nyasha.

⁹ Asi inini neizwi rokubonga ndinopira mudiro kwouri; ndinozoripa icho chendakapika. Ruponeso runobva kunaMambo Mwari.”

¹⁰ Zvino Mambo Mwari wakaereketa kuhove, nayo yakarutsira Jona pamavhu akaoma.