Jona 1 - Bhaibheri Rakachena muChindau

Jona Aapurutani Mambo Mwari

¹ Zvino izwi raMambo Mwari rakauya kunaJona mukororo waAmithai rechiti:

² “Miruka, uende Ninevhe, iro dhorobha guru, udaidzire kweriri kuriitira ndaa; ngokuti kushata kwavo kwaguma pamberi pangu.”

³ Asi Jona wakamiruka kutizira Tharshishi kubva pamberi paMambo Mwari. Wakadzaka Jopa, akaona ngarava yaienda Tharshishi; ndizvo wakabhadhara mare yokuhamba ndiyo, akakwira mukati mwayo, kuenda navo Tharshishi kubva pamberi paMambo Mwari.

⁴ Asi Mambo Mwari wakatuma dutu guru muruandhle, mubvumo mukuru wakabuda padera peruandhle, ngarava yaiya yooda kupwanyika.

⁵ Zvino vahluzi vakatya, vakadaidzira veshe umwe ngaumwe kunechimwari chake. Vakarasha muruandhle mitwaro yaiya mungarava kuirerusa. Asi Jona waiya adzaka kumarupande omukati engarava, naye waiya aata pashi, akabatwa ngehope.

⁶ Mukuru wengarava wakauya, akati kwaari, “Unoitenyi, iwewe muati? Miruka, udaidze kunamwari wako! Pamweni mwari unozopinimidza tisu, kuti tisazofa.”

⁷ Vakati umwe kuneumweni wake, “Uyai, ngatiite mabhigidha, kuti tizie kuti ndaa ngeyani yaita kuti uku kushata kwauya padera pedu.” Ndizvo vakaita mabhigidha, akabata Jona.

⁸ Zvino vakati kwaari, “Tironzere, tapota, ndaa ngeyani yaita kuti uku kushata kwauya padera pedu. Mushando wako ngowenyi? Unobva kuri? Nyika yako ngeyokuri? Unobva kuvanhu vakadini?”

⁹ Wakati kwevari, “Ndiri muHebheru; ndinodira Mambo Mwari, Mwari womudenga, uwo wakasika ruandhle nenyika yakaoma.”

¹⁰ Zvino vanhu vakatya kakurutu, vakati kwaari, “Wakaitirenyi ichi?” Ngokuti vanhu vakazia kuti waitiza kubva pamberi paMambo Mwari, ngokuti wakavaronzera.

¹¹ Zvino vakati kwaari, “Tinozoitenyi kwouri, kuti ruandhle runyarare kwetiri?” Ngokuti ruandhle rwakaangirira kukwira nokukwira.

¹² Wakati kwevari, “Nditorei, mundikandire muruandhle; mwadaro ruandhle runozonyarara kwomuri; ngokuti ndinozia kuti indaa yangu yaita kuti mubvumo mukuru uyu ugume padera penyu.”

¹³ Zvakanyadaro vanhu vakahluza ngesimba kuhwirira kunyika; asi vakakorera, ngokuti ruandhle rwakaangirira kukwira kurwisana navo.

¹⁴ Zvino vakadaidzira kunaMambo Mwari, vakati, “Tapota, Mambo Mwari, tapota, tisazofa ngendaa yokupona kwomunhu uyu. Usatiitira ndaa ngengazi isina ndaa; ngokuti ndiwe, O Mambo Mwari, waita kudai ngezvaisisira kwouri.”

¹⁵ Ndizvo vakatora Jona, vakamukandira muruandhle; noruandhle rwakanyarara.

¹⁶ Zvino vanhu vakatya Mambo Mwari kakurutu, vakapira mubairo kunaMambo Mwari nokupika mhiko.

¹⁷ Zvino Mambo Mwari wakanasirira hove huru kuti imedze Jona; naJona waiya mundani mwehove mazuva matatu nousiku hutatu.