Johani 9 - Bhaibheri Rakachena muChindau

Jesu Unopembenudza Munhu Wakabarwa Ari Bofu

¹ Naapo echipinda, wakaona munhu waiya bofu kubvira pakubarwa kwake.

² Nevadzidzi vake vakamubvunza vechiti, “Rabhi, ndiani wakashaisha, uyu munhu nokuti vabari vake, kuti abarwe ari bofu?”

³ Jesu wakapingura akati, “Uyu munhu aazi kushaisha nokuti vabari vake, asi kuti mishando yaMwari ioniswe mwaari.

⁴ Kunosisira kuti tishande mishando youwo wakandituma achimasikati; ngokuti usiku hunouya, naapo apana ungakona kushanda.

⁵ Naapo ndichindorimwo munyika, ndiri kujeka kwenyika.”

⁶ Naapo aereketa izvi, wakapfira mata pamavhu, wakakanya matope ngemata, wakadzodza madziso aro ngedope.

⁷ Wakati kweriri, “Enda, ushambe muGandwa reSiroamu.” (Ngokukumuchwa kunoti Wakatumwa.) Ndizvo wakaenda, akashamba, wakauya oona.

⁸ Ndizvo vaakirwana vake naavo vaimuona kare, ari mupemhi, vakati, “Uyu andiyepi here munhu uwo waigara pashi echipemha?”

⁹ Vamweni vakati, “Ndiye.” Vamweni vakati, “Haiwa, asi unotodzana naye.” Naye wakati, “Ndini.”

¹⁰ Ndizvo vakati kwaari, “Madziso ako akaita mapembenudzirwenyi?”

¹¹ Wakapingura, akati, “Munhu unozwi Jesu wakaita matope, akadzodza madziso angu, akati kwendiri, ‘Enda Siroamu ushambe.’ Ndizvo ndakaenda ndikashamba, ndikaona.”

¹² Navo vakati kwaari, “Uri pari munhuwo?” Wakati, “Andizii.”

VaFarisi Vanotsvakisisa ngoKupembenudzwa kweBofu

¹³ Vakaunza kuvaFarisi munhu uwo waiya bofu.

¹⁴ Raiya zuva reSabatha apo Jesu paakaita matope akapembenudza madziso aro.

¹⁵ Ndizvo vaFarisi vakamubvunzazve kuti wakaita mapembenudzirwenyi. Naye wakati kwavari, “Wakaisa matope pamadziso angu; ndakashamba, neni ndinoona.”

¹⁶ Ndizvo vamweni vevaFarisi vakati, “Uyu munhu aabvi kunaMwari, ngokuti aangwariri Sabatha.” Asi vamweni vakati, “Munhu mushaishi ungaita maitirenyi iyi mioniso?” Kwakaapo kuparadzana pakati pavo.

¹⁷ Ndizvo vakatizve kunebofu, “Unotinyi ndiye iwewe, ngendaa yokuti wakapembenudza madziso ako?” Naye wakati, “Muprofeti.”

¹⁸ Ndizvo vaJudha avazi kutenda kuti ndiye waiya bofu nokuti wakapembenudzwa, metsa vakadaidza vabari vouwo wakapembenudzwa,

¹⁹ navo vakavabvunza vechiti, “Uyu mukororo wenyu here, uwo womunoti, wakabarwa ari bofu? Ndizvo zvino unoita maonerenyi?”

²⁰ Ndizvo vabari vake vakapingura vakati, “Chetinozia ngechokuti uyu mukororo wedu nokuti wakabarwa andori bofu;

²¹ asi kuti unoita maonerenyi atizii, nokuti ndiani wakapembenudza madziso ake, atizii. Mubvunzenyi; wabva muzero, unozodziereketera pachake.”

²² Vabari vake vakaronza izvi ngokuti vaitya vaJudha, ngokuti vaJudha vaiya vakatenderana kuti kunyazwi ndiani unozomutenda kuti iye ndiKristu, unozodzingwa kubva mumhatso yokudira.

²³ Ngeiyi ndaa vabari vake vakati, “Wabva muzero, mubvunzenyi.”

²⁴ Ndizvo vakamudaidza ngekwechipiri uwo waiya bofu, vakati kwaari, “Irikidza Mwari iwewe, isusu tinozia kuti uyu munhu mushaishi.”

²⁵ Ndizvo iye wakapingura, akati, “Kunyazwi mushaishi, andizii. Chiro chimwe chega chendinozia, ngechokuti inini ndaiya bofu, zvino ndinoona.”

²⁶ Ndizvo vakati kwaari, “Wakaitenyi kwouri? Wakaita mapembenudzirenyi madziso ako?”

²⁷ Wakavapingura echiti, “Ndatomuronzera nemwi amuzi kupurutana. Ngenyi mwechida kuzwazve? Nemwiwo munoda kuita vadzidzi vake here?”

²⁸ Vakamutuka vechiti, “Iwewe uri mudzidzi wake, asi isusu tiri vadzidzi vaMosi.

²⁹ Tinozia kuti Mwari wakaereketa kunaMosi, asi uyu munhu, atizii paanobva.”

³⁰ Munhu wakapingura, akati kwavari, “Iri igumo! Kuti amuzii paanobva, asi wakapembenudza madziso angu.

³¹ Tinozia kuti Mwari aapurutani vashaishi. Asi kunyazwi ndiani unomuremeredza nokuita kuda kwake, Mwari unomupurutana.

³² Kubvira pakutanga akuzi kumbozwika kuti munhu wakambopembenudza madziso owakabarwa ari bofu.

³³ Kudai uyu munhu asikabvi kunaMwari, aangakoni kuita chiro.”

³⁴ Vakamupingura vakati kwaari, “Iwewe wakabarirwa mukushaisha yaamho, newe wotidzidzisa here?” Vakamudzingira kubanze.

Ubofu hweZviro zvoMweya

³⁵ Jesu wakazwa kuti vaiya vamudzingira kubanze, amuona wakati, “Iwewe unotenda Mukororo woMunhu here?”

³⁶ Naye wakapingura akati, “Ndiani, Mambo, kuti nditende kwaari?”

³⁷ Jesu wakati kwaari, “Wamuona, ndiyezve unoereketa newe.”

³⁸ Wakati, “Mambo, ndinotenda.” Naye wakamudira.

³⁹ Jesu wakati, “Inini ndakauyira kutonga munyika muno, kuti vasikaoni vaone nevanoona vaitwe mapofu.”

⁴⁰ Vamweni vevaFarisi avo vaiya pasinde naye vakazwa izvi, vakati kwaari, “Nesuwo tiri mapofu here?”

⁴¹ Jesu wakati kwavari, “Kudai mwaiya mapofu, mwaizodai musina kushaisha. Asi zvino munoti, ‘Tinoona,’ kushaisha kwenyu kunondogara kuripo.