Johani 8 - Bhaibheri Rakachena muChindau

¹ Asi Jesu wakaenda kuMutunhu wemaOrivhi.

² Mangwanani maishi wakauyazve muTemperi; vanhu veshe vakauya kwaari, naye wakagara pashi, akavadzidzisa.

³ Vanyori nevaFarisi vakaunza kwaari dzimai rakabatwa rechiomba; naapo vaiya vaita kuti rieme pakati pavo,

⁴ vakati kunaJesu, “Mudzidzisi, iri dzimai rabatwa rechiomba yaamho.

⁵ Zvino Mosi wakatipanga muMipango kuti madzimai akadaro apondwe ngamapuwe. Ndizvo iwewe unotinyi?”

⁶ Vakaereketa izvi vechimuedza, kuti vaone chokumuparisa ndaa ndicho. Asi Jesu wakakotama pashi, akanyora ngechinwe pamavhu.

⁷ Naapo vaangira kumubvunzisisa, wakatwasuka, akati kwavari, “Iye usina kushaisha pakati penyu, ngaatange kukandira buwe kumuponda.”

⁸ Wakakotamazve pashi, akanyora pamavhu.

⁹ Naapo vazvizwa, vakaenda umwe ngaumwe, kutanga ngevakurutu, metsa Jesu asara ari ega nedzimai rakaema pamberi pake.

¹⁰ Naapo Jesu wakatwasuka akati kweriri, “Dzimai, vari pari avo vakakuitira ndaa? Apana here wasara echikuitira ndaa?”

¹¹ Rakati, “Haiwa, apana naumwe, Mambowoe.” Jesu wakati kweriri, “Neni andikuitiri ndaa; enda usachazoshaishazve.”]

Jesu Kujeka kweNyika

¹² Ndizvo Jesu wakaereketazve kwavari echiti, “Inini ndiri kujeka kwenyika; uwo unonditeera aazohambi muchidima, asi unozoa nokujeka kwokupona.”

¹³ Ndizvo vaFarisi vakati kwaari, “Unodzipupurira; chapupu chako achina gwinyiso.”

¹⁴ Jesu wakapingura, akati kwavari, “Kunyazwi ndechidzipupurira pachangu, chapupu changu chinegwinyiso, ngokuti ndinozia pendakabva nependinoenda, asi imwimwi amuzii pendakabva nependinoenda.

¹⁵ Imwimwi munotonga ngokwenyama, inini anditongi naumwe.

¹⁶ Asi kunyazwi ndechinyatonga, kutonga kwangu kunegwinyiso, ngokuti andinipi ndega ndinotonga, asi inini naBaba vakandituma.

¹⁷ Kwakanyorwa muMipango yenyu kuti chapupu chavanhu vairi chinegwinyiso;

¹⁸ inini ndini ndinodzipupurira pachangu, naBaba avo vakandituma vanopupura ndini.”

¹⁹ Ndizvo vakati kwaari, “Vari pari Baba ako?” Jesu wakapingura, akati, “Imwimwi amundizii nokuti Baba angu; dai mwaindizia, mwaizoziazve Baba angu.”

²⁰ Jesu wakaereketa aya mazwi ari pasinde pebhokisi rinopirwa zvipo, echidzidzisa ari muTemperi; asi apana wakamubata, ngokuti awa rake raiya risati raguma.

Imwimwi Amukoni Kuuya peNdinoenda

²¹ Ndizvo wakatizve kwavari, “Inini ndinoenda, nemwi munozonditsvaka, nemwi munozofira muzvishaishi zvenyu. Pendinoenda, amukoni kuuyapo.”

²² Ndizvo vaJudha vakati, “Unozodziuraya here, ngokuti unoti, ‘Pendinoenda, imwimwi amukoni kuuyapo?’ ”

²³ Wakati kwavari, “Imwimwi muri vepashi, inini ndinobva mudenga; imwimwi muri venyika iyi, inini andisiri wenyika iyi akadi.

²⁴ Ndakamuronzera kuti munozofira muzvishaishi zvenyu, ngokuti kudai musikatendi kuti ndini aye, munozofira muzvishaishi zvenyu.”

²⁵ Ndizvo vakati kwaari, “Urianani iwewe?” Jesu wakati kwavari, “Ndini uwo wendakamuronzera pakutanga.

²⁶ Ndine zvakawanda zvokuereketa ndimwi nokutonga; asi uwo wakandituma uri gwinyiso, neni ndinoereketa kunyika izvo zvandakazwa kubva kwaari.”

²⁷ Avazi kuzwisisa kuti waiereketa kwavari ndiBaba.

²⁸ Ndizvo Jesu wakati kwavari, “Naapo mwazomirudza Mukororo woMunhu, naapo munozozia kuti inini ndini aye nokuti andiiti chiro ngesimba rangu remene, asi ndinoereketa kudai ngezvendakadzidziswa ndiBaba.

²⁹ Nouwo wakandituma undori neni; aazi kundisiya ndega, ngokuti ndinoita zvinomudakadza mukuwo weshe.”

³⁰ Achaereketa izvi, vazhinji vakatenda kwaari.

Vanhu Vakasunhurika neHloko

³¹ Ndizvo Jesu wakati kuneavo vaJudha vakatenda kwaari, “Kudai mwechigara mumazwi angu, ngegwinyiso muri vadzidzi vangu,

³² nemwi munozozia gwinyiso negwinyiso rinozomusunhura.”

³³ Vakamupingura vechiti, “Isusu tiri mibarirwana yaAbrahama, atizi kumboitwa varanda ngomunhu naumwe. Unodaro ngenyi kuti, ‘Munozosunhurwa?’ ”

³⁴ Jesu wakavapingura echiti, “Ngegwinyiso ndinoti kwomuri, kunyazwi ndiani unoita chishaishi, muranda wokushaisha.

³⁵ Muranda aagari mumhatso mhera nariini; mukororo unogaramwo mhera nariini.

³⁶ Ndizvo kudai Mukororo echizomusunhura, munozosunhurwa yaamho.

³⁷ Ndinozia kuti imwimwi muri mibarirwana yaAbrahama; asi munotsvaka kundiuraya, ngokuti izwi rangu arizi kuona ndau mukati mwenyu.

³⁸ Inini ndinoereketa izvo zvendakaona kunaBaba angu, nemwiwo munoita zvemwakazwa kubva kunababa enyu.”

³⁹ Vakamupingura, vakati kwaari, “Abrahama ndibaba edu.” Jesu wakati kwavari, “Kudai mwaiya vana vaAbrahama, mwaizoita mishando yaAbrahama,

⁴⁰ asi zvino munotsvaka kundiuraya, munhu wamuronzera gwinyiso, iro rendakazwa kubva kunaMwari; Abrahama aazi kuita zvakadai.

⁴¹ Imwimwi munoita mishando yababa enyu.” Vakati kwaari, “Isusu atizi kubarwa ngokuomba; tinaBaba umwe, ndiMwari.”

⁴² Jesu wakati kwavari, “Kudai Mwari aiya Baba enyu, mwaizondida, ngokuti ndakabuda ndechibva kunaMwari; andizi kuuya ngokuda kwangu, asi iye wakandituma.

⁴³ Amuzwisisi ngenyi zvendinoronza? Ngokuti amukoni kuzwisisa izwi rangu.

⁴⁴ Imwimwi muri vababa enyu Dhiabhorosi, nokudisisa kwenyu kuita kuda kwababa enyu. Uwo waiya muurayi kubvira pakutanga, naye aazi kuema mugwinyiso, ngokuti gwinyiso amuna mukati mwake. Naapo echinyepa, unoereketa kudai ngechibarirwe chake, ngokuti iye uri munyepi nababa emanyepo.

⁴⁵ Asi ngokuti inini ndinoronza gwinyiso, amunditendi.

⁴⁶ Ndiani kwomuri ungandionisa ndaa yendakashaisha? Kudai ndechironza gwinyiso, amunditendi ngenyi?

⁴⁷ Uwo uri waMwari unozwa mazwi aMwari; ngeiyi ndaa imwimwi amundizwi, ngokuti amuri vaMwari akadi.”

Jesu naAbrahama

⁴⁸ VaJudha vakapingura, vakati kwaari, “Atinasi kuronza here kuti uri muSamaria newe unedhimoni?”

⁴⁹ Jesu wakapingura echiti, “Inini andina dhimoni; asi ndinoremeredza Baba angu, nemwi amundiremeredzi.

⁵⁰ Asi inini anditsvaki kuirikidzwa kwangu; uripo umwe unokutsvaka, naye unoita mutongi.

⁵¹ Ngegwinyiso ndinoti kwomuri, kunyazwi ndiani unongwarira izwi rangu, aatongozooni rufu.”

⁵² VaJudha vakati kwaari, “Zvino tinozia kuti unedhimoni. Abrahama wakafa nevaprofeti ngokudaro; newe unoti, ‘Kunyazwi ndiani unongwarira izwi rangu, aatongozozwi rufu.’

⁵³ Iwewe uri mukuru here kupinda baba edu Abrahama, vakafa? Nevaprofeti vakafa. Unodziita anani?”

⁵⁴ Jesu wakapingura echiti, “Kudai ndechidziremeredza pachangu, kudziremeredza kwangu akuna shwiro; ndiBaba angu vanondiremeredza, vomunoti ndivo Mwari wenyu.

⁵⁵ Asi amuzi kuvazia; inini ndinovazia. Kudai ndechiti, andivazii, ndaita munyepi kudai ndimwi. Asi ndinovazia neni ndinongwarira izwi ravo.

⁵⁶ Abrahama baba enyu vakadakara ngokuti vaizoriona zuva rangu, navo vakariona, vakadakara.”

⁵⁷ Ndizvo vaJudha vakati kwaari, “Ausati waguma makore makumi mashanu, newe wakaona Abrahama here?”

⁵⁸ Jesu wakati kwavari, “Ngegwinyiso ndinoti kwomuri, Abrahama asati aapo, ndaiyapo.”

⁵⁹ Ndizvo vakatora mapuwe kuti vamuponde; asi Jesu wakadzifisha pachake, akabuda kubva muTemperi.