Johani 6 - Bhaibheri Rakachena muChindau

Jesu Unopa Kudya Mazana Makumi Mashanu

¹ Ngesure kweizvi Jesu wakaambuka ruseri rwoRuandhle rweGarire, urwo ndirwo Ruandhle rweThibheriasi.

² Nembungano huru yakamuteera, ngokuti yaiya yaona mishamiso yaakaita kwavari vairwara.

³ Jesu wakakwira mudunhu, akagara pashi nevadzidzi vake.

⁴ Zvino Phasika, dhiri revaJudha, rakakwedzera.

⁵ Ndizvo Jesu amirudza madziso ake, aona kuti mbungano huru yaiya yechiuya kwaari, wakati kunaFiripu, “Tinozotenga pari zvingwa kuti ava vadye?”

⁶ Asi wakaereketa izvi kumuedza, ngokuti iye waizia chaanozoita.

⁷ Firipu wakamupingura echiti, “Zvingwa zvemazana mairi ezvigurwa zvesirivha azvivakwani kuti umwe ngaumwe atore kadoodoko.”

⁸ Umwe wevadzidzi vake, Andreu, munun'una waSimoni Petro, wakati kwaari,

⁹ “Uri pano murumbwana unezvingwa zvebhare zvishanu nezvihove zviiri; asi izvi zvingadetserenyi kuvanhu vazhinji vakadai?”

¹⁰ Jesu wakati, “Garisai vanhu pashi.” Kwaiyapo pandau iyo mwenje wakawanda; ndizvo vanhu vakagara pashi, vaida kuita makumi emazana mashanu kuwanda.

¹¹ Ndizvo Jesu wakatora zvingwa, naapo abonga, wakakoanisa kunaavo vaiya vakagara pashi; wakaitazve kudaro nezvihove, veshe vakadya kudai ngezvevaikona.

¹² Naapo vaguta wakati kuvadzidzi vake, “Unganidzai matsekeneswa asara, kuti kusarashwa chiro.”

¹³ Ndizvo vakaunganidza, vakazadza zvitundu gumi nazviiri ngematsekeneswa ezvingwa zvebhare zvishanu akasara kuneavo vaiya vadya.

¹⁴ Ndizvo vanhu avo vaona uyu mushamiso waakaita, vakati, “Ngegwinyiso uyu ndiye muprofeti uwo unouya munyika!”

¹⁵ Ndizvo apo Jesu echizia kuti vodo kuuya kuti vamutore ngesimba kuti vamuite mambo, wakabvapozve akaenda kumutunhu ari ega.

Jesu Unohamba padera peMvura

¹⁶ Naapo zuva rabira, vadzidzi vake vakadzaka kuruandhle,

¹⁷ vakakwira mungarava, vakatanga kuambuka ruandhle kuenda Khapernaume. Kwaiya kwasvipa, naJesu waiya asati aguma kwavari.

¹⁸ Nemafungu oruandhle akakwira ngendaa yedutu guru raivhuvhuta.

¹⁹ Naapo vaiya vahamba paida kuita makhiromitha mashanu nokuti matanhatu, vakaona Jesu echihamba padera peruandhle, echikwedzera kungarava, navo vakatyiswa.

²⁰ Asi wakati kwavari, “Ndini hangu; musatya.”

²¹ Naapo vakadakara kumutora mungarava, paripo ngarava yakaguma kunyika kwavaienda.

Vanhu Vanotsvaka Jesu

²² Nechimangwani mbungano iyo yaiya yakasara ruseri rworuandhle yakaona kuti paiya pasina ngarava imweni, yega imwe iyo yevaiya vapotera kweiri vadzidzi vake, nokuti Jesu aazi kukwira pamwepo nevadzidzi vake mungarava, asi kuti vadzidzi vake vaiya vaenda vari vega.

²³ Kwakauya ngarava dzimweni dzakabva Thibheriasi dzikaguma pasinde pendau apo pavakadya zvingwa ngesure Mambo azvibonga.

²⁴ Ndizvo apo mbungano yaona kuti Jesu paiya pasina apapo nokuti vadzidzi vake, yakakwirawo mungarava yakauya muKhapernaume yechitsvaka Jesu.

Jesu Chingwa choKupona

²⁵ Naapo yaiya yamuona ruseri rworuandhle, yakati kwaari, “Rabhi, waguma pano riini?”

²⁶ Jesu wakaipingura, akati, “Ngegwinyiso ndinoti kwomuri, amunditsvaki ngokuti mwakaona mishamiso, asi ngokuti mwakadya zvingwa mukaguta.

²⁷ Musashandira kudya ukwo kunopera, asi kudya ukwo kunogara mhera nariini, kwaanozomupa Mukororo woMunhu; ngokuti padera pake Baba Mwari wakaisa chioniso chake.”

²⁸ Ndizvo vakati kwaari, “Tingaitenyi kuti tishande mishando yaMwari?”

²⁹ Jesu wakapingura, akati kwavari, “Uyu ndiwo mushando waMwari kuti mutende uwo waakatuma.”

³⁰ Ndizvo vakati kwaari, “Iwewe unoita muoniso wenyi kuti tione, titende kwouri? Unoshandenyi?

³¹ Madzibaba edu akadya mana mushango; kudai ngezvezvakanyorwa, ‘Wakavapa chingwa chakabva mudenga kuti vadye.’ ”

³² Naapo Jesu wakati kwavari, “Ngegwinyiso ndinoti kwomuri, andiyepi Mosi wakamupa chingwa chakabva mudenga, asi Baba angu ndivo vanomupa chingwa chegwinyiso chinobva mudenga.

³³ Ngokuti chingwa chaMwari chiri uwo wakadzaka kubva mudenga nokupa kupona kunyika.”

³⁴ Ndizvo vakati kwaari, “Mambo, tipei ichi chingwa nguva dzeshe.”

³⁵ Jesu wakati kwavari, “Inini ndiri chingwa chokupona; iye unouya kwendiri aatongozwi nzara, nouwo unotenda kwendiri aatongozwi nyota.

³⁶ Asi ndakati kwomuri mwakandiona asi amuzi kunditenda.

³⁷ Zveshe zvaanondipa Baba zvinozouya kwendiri; nouwo unouya kwendiri andizomurashi akadi.

³⁸ Ngokuti andizi kudzaka kubva mudenga kuti ndiite kuda kwangu, asi kuda kwouwo wakandituma;

³⁹ uku ndikwo kuda kwowakandituma, kuti andisisiri kurashikirwa nachimwe chazvo zveshe zvaakandipa, asi kuti ndichimuse ngezuva rokupera.

⁴⁰ Ngokuti uku ndikwo kuda kwaBaba angu, kuti munhu weshe unoringira Mukororo nokutenda kwaari unowanokupona kusikaperi; neni ndinozomumusa ngezuva rokupera.”

⁴¹ Ndizvo vaJudha vakavhuruvhuta ndiye, ngokuti wakati, “Inini ndiri chingwa chakadzaka kubva mudenga.”

⁴² Vakati, “Uyu andiyepi here Jesu, mukororo waJosefa, baba namai ake vetinozia? Zvino unoita maereketerenyi kuti, ‘Ndakadzaka kubva mudenga?’ ”

⁴³ Jesu wakapingura akati kwavari, “Musavhuruvhuta pakati penyu.

⁴⁴ Akuna naumwe unokona kuuya kwendiri, kudai Baba wakandituma asamukweya; neni ndinozomumusa ngezuva rokupera.

⁴⁵ Kwakanyorwa muvaprofeti kuti, ‘Veshe vanozodzidziswa ndiMwari.’ Ndizvo munhu weshe wakazwa, akadzidza kubva kunaBaba, unouya kwendiri.

⁴⁶ Andironzi kuti uripo wakaona Baba, kwega iye wakabva kunaMwari; ndiye wakamuona Baba.

⁴⁷ Ngegwinyiso ndinoti kwomuri, iye unotenda waanokupona kusikaperi.

⁴⁸ Inini ndiri chingwa chokupona.

⁴⁹ Madzibaba enyu vakadya mana mushango, navo vakafa.

⁵⁰ Ichi ndicho chingwa chinodzaka kubva mudenga, kuti kunyazwi ndiani kwomuri unochidya, aachafi.

⁵¹ Inini ndiri chingwa chokupona chakadzaka kubva mudenga; kuti kunyazwi ndiani unodya ichi chingwa unozopona kusikaperi; nechingwa chendinozomupa chiri nyama yangu, yendinozopa kuita kupona kwenyika.”

⁵² Ndizvo vaJudha vakaitirana hasha pakati pavo vechiti, “Munhu uyu ungaita mapirenyi nyama yake kwetiri kuti tidye?”

⁵³ Ndizvo Jesu wakati kwavari, “Ngegwinyiso ndinoti kwomuri, kuti musikadyi nyama yoMukororo woMunhu, musikamwi ngazi yake, amuna kupona mukati mwenyu.

⁵⁴ Uwo unodya nyama yangu nounomwa ngazi yangu waanokupona kusikaperi, neni ndinozomumusa ngezuva rokupera.

⁵⁵ Ngokuti nyama yangu kudya yaamho nengazi yangu kumwa yaamho.

⁵⁶ Uwo unodya nyama yangu nounomwa ngazi yangu, unogara mukati mwangu neni ndinogara mukati mwake.

⁵⁷ Kudai ndiBaba vanopona vakandituma, neni ndinopona ndiBaba, ngokudaro uwo unondidya, ndiye unozopona ndini.

⁵⁸ Ichi ndicho chingwa chakadzaka kubva mudenga, chisikazi kudai ngechakadya madzibaba vakafa. Uwo unodya chingwa ichi unozopona mhera nariini.”

⁵⁹ Wakaereketa izvi echidzidzisa mumhatso yokudira muKhapernaume.

Mazwi oKupona Kusikaperi

⁶⁰ Ndizvo vazhinji vevadzidzi vake, apo vazwa, vakati, “Iri izwi rakakonza, ndiani unokona kurizwa?”

⁶¹ Asi Jesu, echizia mukati mwake kuti vadzidzi vake vakavhuruvhuta ngeizwi iro, wakati kwavari, “Ichi chinomupumhunisa here?

⁶² Mungaitenyi kudai mwechiona Mukororo woMunhu echikwira apo paaiya pakutanga?

⁶³ NdiMweya unopa kupona, nyama ainyuri chiro. Mazwi endakaereketa inini kwomuri ari mweya nokupona.

⁶⁴ Asi varipo vamweni pakati penyu vasikatendi.” Ngokuti kubvira pakutanga, Jesu waindozia kuti ndiani avo vasikatendi nokuti ndiani unozomupira.

⁶⁵ Naye wakati, “Ngeiyi ndaa ndakaereketa kwomuri ndechiti, apana unokona kuuya kwendiri kuti asikazi kutenderwa ndiBaba.”

⁶⁶ Ngesure kweizvi vazhinji vevadzidzi vake vakahwirira sure, avazi kuchazohamba naye.

⁶⁷ Ndizvo Jesu wakati kunegumi navairi, “Imwimwi munoda kuendawo here?”

⁶⁸ Simoni Petro wakamupingura akati, “Mambo, tingaenda kunani? Ndimwi munemazwi okupona kusikaperi;

⁶⁹ nesu takatenda, tikazia kuti iwewe uri Wakachena waMwari.”

⁷⁰ Jesu wakavapingura, akati, “Inini andizi kumutsanangura here murigumi navairi, noumwe wenyu uri dhiabhorosi?”

⁷¹ Wakaereketa ndiJudhasi, mukororo waSimoni Isikarioti, ngokuti Judhasi ndiye waizomupira, ari umwe wegumi navairi.