Johani 4 - Bhaibheri Rakachena muChindau

Jesu neDzimai reSamaria

¹ Ndizvo apo Mambo azia kuti vaFarisi vaiya vazwa kuti Jesu waiita nokubhabhatidza vadzidzi vakawanda kupinda Johani,

² (kunyazwi Jesu emene aazi kubhabhatidza, asi vadzidzi vake),

³ wakabva Judhia, akaendazve Garire.

⁴ Waisisira kuti ahambe ngomuSamaria.

⁵ Ndizvo wakaguma muguta revaSamaria rinozwi Sikha, pasinde pomunda uwo waakapa Jakobe kuno mukororo wake Josefa.

⁶ Chinyuka chaJakobe chaiyapo, ndizvo Jesu aremba ngomuhambo wake, wakagara pashi parutii rwechinyuka. Rooda kuita awa rechitanhatu.

⁷ Kwakagumapo dzimai reSamaria koochera mvura. Jesu wakati kweriri, “Ndipewo mvura ndimwe.”

⁸ Ngokuti vadzidzi vake vaiya vaenda muguta kootenga zvokudya.

⁹ Ndizvo dzimai reSamaria rakati kwaari, “Ngenjiranyi kuti iwewe, uri muJudha, ukumbire mvura yokumwa kwendiri inini, dzimai reSamaria?” (Ngokuti vaJudha avaiyani nevaSamaria.)

¹⁰ Jesu wakapingura, akati kweriri, “Kudai waizia iwewe chipo chaMwari, nokuti ndiani uwo unokumbira kwouri kuti, ‘Ndipewo mvura, ndimwe’, iwewe waizokumbira kwaari, naye waizokupa mvura yokupona.”

¹¹ Dzimai rakati kwaari, “Mambo, auna chidziyo chokuchera ndicho, nechinyuka chakadzama. Ndizvo mvura yokupona unoiona pari?

¹² Uri mukuru here iwewe kupinda baba edu Jakobe, uwo wakatipa ichi chinyuka, naye wakamwa kwechiri emene, nevakororo vake nezvifuyo zvake?”

¹³ Jesu wakapingura akati kweriri, “Kunyazwi ndiani unomwa kuneiyi mvura unozozwazve nyota,

¹⁴ asi kunyazwi ndiani unomwa mvura yendinozomupa inini, aachazozwizve nyota mhera nariini. Mvura iyo yendinozomupa inozoita chinyuka chemvura mukati mwake, chechivherukira kupona kusikaperi.”

¹⁵ Dzimai rakati kwaari, “Mambo, ndipe mvurayo, kuti ndisachazozwa nyota nokuti ndisachazouya panozve koochera mvura.”

¹⁶ Wakati kweriri, “Enda, woodaidza mwamuna wako, muuye pano.”

¹⁷ Dzimai rakapingura rikati kwaari, “Andina mwamuna.” Jesu wakati kweriri, “Wanasa kupingura zvakanaka zvewati, ‘Andina mwamuna;’

¹⁸ ngokuti waimboiya nevamuna vashanu, nouwo woutori naye zvino aasiri mwamuna wakopi; ngeizvi waereketa gwinyiso.”

¹⁹ Dzimai rakati kwaari, “Mambo, ndinoona kuti imwimwi muri muprofeti.

²⁰ Madzibaba edu akadira kuneiri dunhu; nemwi munoti muJerusarema ndiyo ndau inosisira kudiriramwo.”

²¹ Jesu wakati kweriri, “Dzimai, nditende, nguva ichauya apo pemusikachazodiriri Baba kuneiri dunhu kunyazwi muJerusarema.

²² Imwimwi munodira chomusikazii; isusu tinodira chetinozia, ngokuti ruponeso runobva kuvaJudha.

²³ Asi awa rinouya, nazvino raapano, apo vadiri vegwinyiso vanozodira Baba muMweya nomugwinyiso, ngokuti Baba vanotsvaka vakadaro kumudira.

²⁴ Mwari ndiMweya, naavo vanomudira vanosisira kuti vamudire muMweya nomugwinyiso.”

²⁵ Dzimai rakati kwaari, “Ndinozia kuti Mesia unouya,” (uwo unozwi Kristu). “Naapo oouya, unozotironzera zviro zveshe.”

²⁶ Jesu wakati kweriri, “Inini unoereketa newe ndini ndemene.”

²⁷ Panguvayo vadzidzi vake vakauya. Vakashamiswa ngokuti waiereketa nedzimai, asi apana naumwe wakati kwaari, “Unotsvakenyi?” nokuti, “Unoereketa naro ngenyi?”

²⁸ Ndizvo dzimai rakasiya nhuvi yaro yemvura, rakahwirira kuguta, rikati kuvanhu,

²⁹ “Uyai, muone munhu uwo wandironzera zveshe zvendakaita. Uyu ungaita Kristu here?”

³⁰ Vakabuda kubva muguta vechiuya kwaari.

³¹ Panguva iyo vadzidzi vake vakamunyengerera vechiti, “Rabhi, idyai.”

³² Asi wakati kwavari, “Inini ndinakwo kudya kwomusikazii imwimwi.”

³³ Ndizvo vadzidzi vakati umwe kunoumweni, “Uripo here munhu wamuunzira chokudya?”

³⁴ Jesu wakati kwavari, “Kudya kwangu ndikwo kuita kuda kwouwo wakandituma nokupedza mushando wake.

³⁵ Amuronzi here kuti, ‘Kwasara mwedzi mirongomuna, naapo kukukura kwaguma?’ Ndinomuronzera, mirudzai madziso enyu, muringire muminda, ngokuti yachena zvino yoda kukukurwa.

³⁶ Uwo unokukura unoashira misharo, naye unounganidza michero yokupona kusikaperi, ndizvo uwo unosima naye unokukura vadakare veshe pamwepo.

³⁷ Ngokudaro chisana ichi chinegwinyiso chinoti, ‘Umwe unokusha noumweni unokukura.’

³⁸ Ndakamutuma kuti mukukure izvo zvomusikazi kushanda; vamweni vakashanda yaamho, nemwi mwapotera mumushando wavo.”

³⁹ Vanhu vazhinji vemuguta revaSamaria vakamutenda ngendaa yeizwi redzimai, rerakapupura rechiti, “Wandironzera zveshe zvendakaita.”

⁴⁰ Ndizvo apo vaSamaria vaguma kwaari, vakamunyengerera kuti agare navo; naye wakagarapo mazuva mairi.

⁴¹ Nevazhinji vamweni vakamutenda ngendaa yeizwi rake.

⁴² Navo vakati kunedzimai, “Zvino tinotenda, haiwa ngendaa yemazwi ako, asi ngokuti tadzizwira temene, nesu tinozia kuti uyu ngegwinyiso ndiye Muponesi wenyika.”

Jesu Unoponesa Mwana woMutongi

⁴³ Ngesure kwemazuva mairi wakabvapo, akaenda muGarire.

⁴⁴ (Ngokuti Jesu emene wakapupura kuti muprofeti aaremeredzwi munyika yake.)

⁴⁵ Ndizvo apo aguma muGarire, vaGarire vakamuashira, ngokuti veshe vaiya vakaona zveshe zvaakaita muJerusarema padhiri, ngokuti navowo vakaenda kudhiri.

⁴⁶ Ndizvo Jesu wakauyazve muKhana reGarire, apo paakapindudza mvura kuita vhini. Kwaiyapo nduna yaiya nomukororo wayo wairwara muKhapernaume.

⁴⁷ Naapo nduna iyi yazwa kuti Jesu waiya abva Judhia aguma muGarire, yakaenda kwaari, yakamunyengerera kuti adzake aponese mukororo wayo, ngokuti waiya ooda kufa.

⁴⁸ Ndizvo Jesu wakati kweiri, “Kuti musikaoni mioniso nemishamiso amuzotendi.”

⁴⁹ Nduna yakati kwaari, “Mambo, dzaka mwana wangu asati afa.”

⁵⁰ Jesu wakati kweiri, “Enda; mukororo wako unozopona.” Munhuwo wakagonda izwi rakaereketwa kwaari ndiJesu naye wakaenda.

⁵¹ Naapo achadzaka, varanda vake vakashongana naye, vakamuronzera kuti mwana wake wapona.

⁵² Ndizvo wakabvunza awa iro raakatanga kuitanane ndiro, navo vakati kwaari, “Zuro ngeawa rechinomwe mutsarara wakamusiya.”

⁵³ Ndizvo baba akazia kuti ndiro awa raakaereketa Jesu kwaari kuti, “Mukororo wako unozopona.” Naye pachake wakatenda nevemhatso yake yeshe.

⁵⁴ Uyu ndiwo muoniso wechipiri waakaita Jesu, abva Judhia apo aguma Garire.