Johani 21 - Bhaibheri Rakachena muChindau

Jesu Unodzionisa kuVadzidzi Vanomwe

¹ Ngesure kweizvi Jesu wakadzionisazve kuvadzidzi vake paRuandhle rweThibheriasi; naye wakadzionisa ngenjira iyi.

² Vaiya vari pamwepo Simoni Petro naThomasi, unozwi Manyambiri, naNathanaeri, uwo waibva Khana reGarire, nevana vaZebedhi, nevamweni vairi vevadzidzi vake.

³ Simoni Petro wakati kwavari, “Ndinoenda koobata hove.” Vakati kwaari, “Nesu tinoendawo newe.” Vakaenda, vakakwira mungarava, asi usikuhwo avazi kubata chiro.

⁴ Asi apo kwooita mambakwedza, Jesu wakaema pahumbikumbi, asi vadzidzi avazi kuzia kuti ndiJesu.

⁵ Ndizvo Jesu wakati kwavari, “Vana, mwabata hove here?” Vakamupingura vechiti, “Haiwa.”

⁶ Wakati kwavari, “Kandirai rutaa ngokurutii rwokumudyo rwengarava, nemwi munozoona.” Ndizvo vakarukandira, vaiya vasina simba rokurukweya ngendaa yokuwanda kwehove.

⁷ Ndizvo mudzidzi uwo waaida Jesu wakati kunaPetro, “NdiMambo!” Naapo Simoni Petro azwa kuti ndiMambo, wakasimira jira rake, ngokuti waiya mupunu, wakadzikandira muruandhle.

⁸ Asi vadzidzi vamweni vakauya vari mungarava, vechikweya rutaa rwakazara ngehove ngokuti vaiya vasiri kuretu nenyika, asi paida kuita zana remamitha.

⁹ Naapo vaguma kuhumbikumbi, vakaona apo muriro wemasimbe, nehove yakaiswa padera pomuriro, nechingwa.

¹⁰ Jesu wakati kwavari, “Unzai dzimweni dzehove dzemwabata zvino.”

¹¹ Simoni Petro wakakwiramwo akakweyera rutaa kuhumbikumbi, rwakazara ngehove huru dzaiya zana nemakumi mashanu nenhatu; kunyazwi dzaiya zhinji kudaro, rutaa aruzi kubauka.

¹² Jesu wakati kwavari, “Uyai mudye.” Apana naumwe wevadzidzi waishinga kumubvunza kuti, “Urianani?” Vaizia kuti ndiMambo.

¹³ Jesu wakauya, akatora chingwa, akavapa, nehove ngokudaro.

¹⁴ Zvino iyi yaiya yaanguva yechitatu yaakadzipangidza Jesu kuvadzidzi, ngesure kwokumuka kwake kwevakafa.

Jesu naPetro

¹⁵ Naapo vapedza kudya kwemangwanani, Jesu wakati kunaSimoni Petro, “Simoni, mukororo waJohani, unondida kupinda ava here?” Wakati kwaari, “Eya, Mambo, unozia kuti ndinokuda.” Wakati kwaari, “Usha vana vemakwai angu.”

¹⁶ Wakati kwaarizve ngokwechipiri, “Simoni, mukororo waJohani, unondida yaamho here?” Wakati kwaari, “Eya, Mambo, unozia kuti ndinokuda.” Wakati kwaari, “Ngwarira makwai angu.”

¹⁷ Wakati kwaari ngokwechitatu, “Simoni, mukororo waJohani, unondida here?” Petro wakarwadziwa mwoyo ngokuti wakati kwaari ngokwechitatu, “Unondida here?” Naye wakati kwaari, “Mambo, iwewe unozia zveshe; unozia kuti ndinokuda.” Jesu wakati kwaari, “Usha makwai angu.

¹⁸ Ngegwinyiso ndinoti kwouri, apo uchiri mutsva, waidzisimidza, wechihamba kuenda powaida. Asi apo waa musharuka, unozotambanudza nyara dzako, noumweni unozokusimidza nokukuendesa pousikadi.”

¹⁹ (Wakaereketa izvi echionisa kuti injira yakaitawani yaizofa ndiyo kuti airikidze Mwari.) Apo aereketa izvi, wakati kwaari, “Nditeere.”

Jesu noMudzidzi Waaida

²⁰ Ndizvo Petro echikunukukira sure, wakaona mudzidzi uwo waaida Jesu echimuteera, aye waiya akatseama paditi rake pakudya kwemadeekoni, uwozve wakati, “Mambo, ndiani unozokupira?”

²¹ Naapo Petro echimuona wakati kunaJesu, “Mambo, uyukee, unozoitenyi?”

²² Jesu wakati kwaari, “Kudai ndechida kuti agare metsa ndiuye, unenyi nazvo iwewe? Nditeere iwewe!”

²³ Ndizvo iri izwi rakapararira pakati pevakoma rokuti uyu mudzidzi aazofi. Asi Jesu aazi kuronza kwaari kuti aazofi, asi kuti, “Kudai ndechida kuti agare metsa ndiuye, unenyi nazvo iwewe?”

²⁴ Uyu ndiye mudzidzi uwo unopupura ngeizvi zviro, nowakanyora izvi zviro, nesu tinozia kuti chapupu chake ngechegwinyiso.

Mazwi oKugumisira

²⁵ Asi zviripo zvimweni zvizhinji zvaakaita Jesu; kudai zvakanyorwa chimwe ngachimwe chazvo, ndinoti pamweni nenyika yemene aingaeneri tsamba dzinganyorwa.