Johani 2 - Bhaibheri Rakachena muChindau

Muchadho muKhana reGarire

¹ Ngezuva rechitatu kwaiyapo muchadho muKhana reGarire, namai aJesu vaiyapo.

² Jesu wakakokwawo nevadzidzi vake kumuchadho.

³ Naapo vhini rapera, mai aJesu vakati kwaari, “Avachina vhini.”

⁴ NaJesu wakati kwaari, “Chinenyi ichi kwendiri nokwouri, mai? Awa rangu arisati raguma.”

⁵ Mai ake vakati kuvashandi, “Kunyazwi chiinyi chaanoronza kwomuri, itai.”

⁶ Zvino aiyapo mabiya emapuwe matanhatu emvura kudai ngomuitiro wavaJudha wokushamba, rimwe ngarimwe raipinda nhuvi mbiri nokuti nhatu.

⁷ Jesu wakati kwavari, “Zadzai mabiya ngemvura.” Navo vakaazadza kuti penu.

⁸ Naye wakati kwavari, “Cherai zvino, muende nayo kunenhunge yomuchadho.” Navo vakatora vakaenda nayo.

⁹ Naapo nhunge yomuchadho yaraira mvura iyo yakapindudzwa kuita vhini, isikazi kuzia kuti rabva kuri (asi vashandi avo vakachera mvura vaizia), nhunge yomuchadho yakadaidza mukwambo

¹⁰ nayo yakati kwaari, “Munhu weshe unobudisa kutanga vhini rakanaka; naapo vanhu vamwa kakurutu, unobudisa iro risikazi kunasa kunaka; asi iwewe wakangwarira vhini rakanasa kunaka metsa zvino.”

¹¹ Jesu wakaita uyu, mushamiso wake wokutanga, muKhana reGarire, wakapangidzira uthende hwake; nevadzidzi vake vakatenda kwaari.

¹² Ngesure kweizvi wakadzaka kuenda Khapernaume, iye namai ake nevanun'una vake nevadzidzi vake; navo vakagarapo mazuva asikazi kuwanda.

Jesu Unochenesa Temperi

¹³ NePhasika revaJudha raiya raapasinde, naJesu wakakwira kuenda Jerusarema.

¹⁴ Naye wakaona muTemperi avo vaitengesa n'ombe, makwai nenjia, nevaitenganisana mare vakagaramwo.

¹⁵ Naapo aiya aita swepu, wakavadzinga veshe kubva muTemperi, zveshe makwai nen'ombe. Wakadurura pashi mare yavaitenganisana, akapinduridza matafura avo.

¹⁶ Naye wakati kuneavo vaitengesa njia, “Dusai izvi zviro kubva pano! Musaita mhatso yaBaba angu mhatso yokutengesira!”

¹⁷ Nevadzidzi vake vakakarakadza kuti kwakanyorwa kuti, “Kutsamwirira ngendaa yemhatso yako kuchandipedza.”

¹⁸ Ndizvo vaJudha vakamupingura, vakati kwaari, “Muoniso wenyi woungaita kutionisa kuti unesimba rokuita izvi zviro?”

¹⁹ Jesu wakapingura, akati kwavari, “Putsai iri Temperi, ndinozorimirudzazve ngemazuva matatu.”

²⁰ Ndizvo vaJudha vakati, “Temperi iri rakaakwa ngemakore makumi marongomuna namatanhatu, newe ungarimirudza here ngemazuva matatu?”

²¹ Asi iye wakaereketa ngendaa yetemperi romuiri wake.

²² Ndizvo apo amuswa kubva kwevakafa, vadzidzi vake vakakarakadza kuti waiya akaereketa ngeichi; navo vakatenda zvakanyorwa neizwi iro raakaereketa Jesu.

Kuzia kwaJesu ngeChibarirwe choMunhu

²³ Zvino apo aiya muJerusarema padhiri rePhasika, vazhinji vakatenda zina rake apo vaona mishamiso yaakaita.

²⁴ Asi Jesu aazi kudzipira kwavari, ngokuti iye waizia vanhu veshe,

²⁵ waiya asikatami naumwe kuti apupurire kwaari ngendaa yomunhu; ngokuti iye waizia emene izvo zviri mukati mwomunhu.