Johani 18 - Bhaibheri Rakachena muChindau

Kupirwa noKusungwa kwaJesu

¹ Naapo Jesu aereketa mazwi aya, wakabuda nevadzidzi vake, vakaambuka ruseri rwebani reKedhironi, apo paiya nomunda, wakapotera mukati mwawo nevadzidzi vake.

² Zvino Judhasi, uwo wakamupira, waizia ngendau iyo, ngokuti Jesu waishonganamwo kazhinji nevadzidzi vake.

³ Ndizvo Judhasi wakatora chikwata chemasoja nevarindi vamweni vaibva kuvapristi vakuru nevaFarisi, vakaendapo vanezvibani nemasasi nezvokurwa ndizvo.

⁴ Zvino Jesu, echizia zveshe zvaizomugumira, wakabuda kwavari, akati, “Munotsvaka anani?”

⁵ Vakamupingura, vakati, “Jesu weNazaretha.” Wakati kwavari, “Ndini.” Judhasi, uwo wakamupira, waiya akaema navo.

⁶ Naapo avaronzera kuti, “Ndini,” vakaita fundamutete, vakawa pashi.

⁷ Ndizvo wakavabvunzazve, akati, “Munotsvaka anani?” Navo vakati, “Jesu weNazaretha.”

⁸ Jesu wakavapingura, akati, “Ndamuronzera kuti ndini. Ndizvo, kuti mwechitsvaka inini, rekerai vanhu ava vaende.”

⁹ Izvi kwaiya kuzadzisika kweizwi, iro raakaereketa rinoti, “Avo vomwakandipa andizi kurashikirwa naumwe wavo.”

¹⁰ Zvino Simoni Petro waiya aneshoti, wakaishwamura, akatema hloko yomupristi mukuru, akagura nzee yake yokumudyo. Zina rehloko iyo uwo raiya Marikusi.

¹¹ Ndizvo Jesu wakati kunaPetro, “Hwirinza shoti yako mumakara ayo! Tsani yaakandipa Baba andizoimwi here?”

Jesu Ari pamberi paAnasi

¹² Ndizvo chikwata chemajoni nenduna nevarindi vevaJudha vakabata Jesu, vakamusunga.

¹³ Navo vakamuunza kutanga kunaAnasi, ngokuti waiya muzvere waKaiafasi, uwo waiya mupristi mukuru ngegorero.

¹⁴ Ndiye Kaiafasi uwo wakanyowedza vaJudha kuti kwaidikanwa kuti munhu umwe afire vanhu.

Petro Unoramba Jesu

¹⁵ Simoni Petro wakateera Jesu, nomudzidzi umweni. Zvino uwo mudzidzi waiziikanwa kumupristi mukuru, wakapotera naJesu muruwanze rwomupristi mukuru,

¹⁶ asi Petro akaema pamusiwo kubanze. Ndizvo mudzidzi umweni, uwo waiziikanwa kumupristi mukuru, wakabuda pabanze, akaereketa kunouwo waingwarira musiwo, akapotedza Petro.

¹⁷ Ndizvo musikana uwo waingwarira musiwo wakati kunaPetro, “Newe auri umwe here wevadzidzi vouyu munhu?” Iye wakati, “Andinipi.”

¹⁸ Zvino varanda nevarindi vakabasira muriro wamasimbe, ngokuti kwaiya nechando, navo vaiya vakaema vechigota muriro pachavo. NaPetro wakaemawo navo, echigota pachake.

Mupristi Mukuru Unobvunza Jesu

¹⁹ Ndizvo mupristi mukuru wakabvunza Jesu ngendaa yevadzidzi vake nokudzidzisa kwake.

²⁰ Jesu wakamupingura, akati, “Inini ndakaereketa pamhene kuvanhu venyika; nguva dzeshe ndakadzidzisa mumhatso dzokudira nomuTemperi, apo paiungana veshe vaJudha. Andizi kuereketa chiro ngokufishika.

²¹ Unondibvunzirenyi? Bvunza avo vakazwa zvendakaereketa kwavari; vanozia zvendakaereketa inini.”

²² Naapo aiya aereketa izvi, umwe wevarindi vaiya vakaema apo wakamakaya Jesu ngepama echiti, “Unopingura mupristi mukuru kudaro here?”

²³ Jesu wakamupingura echiti, “Kudai ndaereketa zvakashata, pupura ngezvakashata. Asi kudai ndaereketa zvakanaka, unondimakairenyi?”

²⁴ Ndizvo Anasi wakamutumira akasungwa kunaKaiafasi mupristi mukuru.

Petro Unorambazve Jesu

²⁵ Zvino Simoni Petro wakaema echigota muriro. Ndizvo vakati kwaari, “Newe auri umwe here wevadzidzi vake?” Iye wakavapingura, akati, “Inini andisiri umwe wavo.”

²⁶ Umwe wevaranda vomupristi mukuru, waiya hama youwo waakatema nzee Petro, wakati, “Andizi kukuona unaye mumunda here?”

²⁷ Ndizvo Petro wakarambazve; paripo jongwe rakarira.

Jesu Ari pamberi paPiratu

²⁸ Ndizvo vakakweya Jesu kubva kunaKaiafasi vechienda naye kumhatso yokutongera. Kwaiya achimangwanani. Ivo vemene avazi kupotera mumhatso yokutongera, kuti vasazosvipiswa, asi kuti vadye Phasika.

²⁹ Ndizvo Piratu wakabuda kwavari, akati, “Indaa yenyi yomunoitira uyu munhu?”

³⁰ Vakapingura, vakati kwaari, “Kudai uyu munhu asiri muiti wezvakashata, taidai tisikazi kumupira kwouri.”

³¹ Ndizvo Piratu wakati kwavari, “Mutorenyi imwimwi pachenyu mumutonge kudai ngemipango yenyu.” VaJudha vakati kwaari, “Akutenderwi kuti isusu tiuraye munhu nokuti ngouri.”

³² Uku kwaiya kuti rizadzisike izwi iro raakaereketa Jesu echionisa kuti injiranyi yaaizofa ndiyo.

³³ Ndizvo Piratu wakapoterazve mumhatso yokutongera, adaidza Jesu, akati kwaari, “Iwewe uri mambo wavaJudha here?”

³⁴ Jesu wakapingura echiti, “Unoereketa izvi pachako here nokuti wazvironzerwa ngevamweni ngendaa yangu?”

³⁵ Piratu wakapingura, akati, “Inini ndiri muJudha here? Dzinza rako nevapristi vakuru vakakupira kwendiri. Chiinyi chowakamboita?”

³⁶ Jesu wakapingura, akati, “Umambo hwangu angohwomunyika muno akadi. Kudai umambo hwangu hwaiya hwomunyika muno, varanda vangu vangadai vakandirwira, kuti ndisapirwa kuvaJudha. Asi zvino umambo hwangu auhuri hwomuno akadi.”

³⁷ Ndizvo Piratu wakati kwaari, “Ndizvo uri mambo here?” Jesu wakapingura akati, “Iwewe unoronza kuti ndiri mambo. Ngeiyi ndaa ndakabarwa, ngeiyi ndaa ndakauya munyika, kuti ndipupurire gwinyiso. Kunyazwi ndiani uri wegwinyiso unozwa izwi rangu.”

³⁸ Piratu wakati kwaari, “Gwinyiso chiinyi?” Aereketa izvi, wakabudazve kuvaJudha, akati kwavari, “Andioni ndaa kwaari.

Jesu Unotongerwa Rufu

³⁹ Asi imwimwi muno mutoo wokuti ndisunhure umwe kwomuri ngePhasika. Ndizvo munoda here kuti ndisunhure kwomuri mambo wevaJudha?”

⁴⁰ Ndizvo vakazhambararazve vechiti, “Haiwa uyu munhu, asi Bharabhasi!” Zvino Bharabhasi waiya dzongoni.