Johani 11 - Bhaibheri Rakachena muChindau

Kufa kwaRazarusi

¹ Zvino munhu umweni wairwara, waizwi Razarusi weBhethani, guta raMaria nataita ake Maritha.

² Ndiye uyu Maria wakadzodza Mambo ngemafuta, akapukuta tsoka dzake ngebvudzi rake, mukoma wake Razarusi wairwara.

³ Ndizvo hanzvadzi dzake dzakatumira kwaari dzechiti, “Mambo, penya, uwo wounoda unorwara.”

⁴ Asi apo Jesu azvizwa wakati, “Uku kurwara andikwopi kworufu; asi ngokwokukurisa Mwari, kuti Mukororo waMwari akuriswe ndikwo.”

⁵ Zvino Jesu wakada Maritha nomunun'una wake naRazarusi.

⁶ Ndizvo apo azwa kuti wairwara, wakagara mazuva mairi pandau paaiyapo.

⁷ Ngesure kweizvi wakati kuvadzidzi vake, “Ngatihwirirezve Judhia.”

⁸ Vadzidzi vakati kwaari, “Rabhi, vaJudha vaitotsvaka kukuponda ngemapuwe, wohwirireyozve here?”

⁹ Jesu wakapingura akati, “Amuna maawa gumi namairi muzuva here? Kudai munhu echihamba masikati aapumhunwi, ngokuti unoona kujeka kwomunyika muno.

¹⁰ Asi kudai munhu echihamba usiku unopumhunwa, ngokuti kujeka amuna mukati mwake.”

¹¹ Wakaereketa izvi, naapo wakati kwavari, “Razarusi shamwari yedu waata, asi inini ndinoenda koomumusa.”

¹² Ndizvo vadzidzi vakati kwaari, “Mambo, kuti akaata, unozoitanane.”

¹³ Zvino Jesu waiya aereketa ngorufu rwake, asi ivo vaikarakadza kuti waiereketa ngokuzorora mukuata.

¹⁴ Naapo Jesu wakanasa kuvaronzera pamhene kuti, “Razarusi wafa;

¹⁵ neni ndinodakara ngepamusoro penyu ngokuti ndaiya ndisiriyo, kuti mutende. Asi ngatiende kwaari.”

¹⁶ Ndizvo Thomasi, uwo unozwi Munyambiri, wakati kuvadzidzi vangani vake, “Nesu ngatiendewo, kuti tife naye.”

Jesu ndiye Kumuka noKupona

¹⁷ Naapo Jesu aguma, wakaona kuti Razarusi waiya aanemazuva marongomuna muiba.

¹⁸ Bhethani raiya pasinde peJerusarema, pasikagumi makhiromitha matatu,

¹⁹ nevazhinji vevaJudha vaiya vaguma kunaMaritha naMaria, kuti vavaembedzere ngendaa yokufa kwomukoma wavo.

²⁰ Naapo Maritha, azwa kuti Jesu uri kuuya, wakaenda kooshongana naye, asi Maria wakasara akagara mumhatso.

²¹ Ndizvo Maritha wakati kunaJesu, “Mambo, kudai waiya pano, mukoma wangu waidai asikazi kufa.

²² Nazvino ndinozia kuti izvo zvounozokumbira kunaMwari, Mwari unozokupa.”

²³ Jesu wakati kwaari, “Mukoma wako unozomukazve.”

²⁴ Maritha wakati kwaari, “Ndinozia kuti unozomuka mukumuka kwezuva rokupera.”

²⁵ Jesu wakati kwaari, “Inini ndiri kumuka nokupona; uwo unonditenda kunyazwi afa, unozoponazve,

²⁶ nouwo unopona echinditenda, aatongozofi. Unotenda ichi here?”

²⁷ Wakati kwaari, “Eya, Mambo; inini ndinotenda kuti iwewe ndiwe Kristu, Mukororo waMwari, uwo unouya munyika.”

Jesu Unochema

²⁸ Naapo aronza izvi, wakaenda, akadaidza Maria munun'una wake ngokufishika, akati, “Mudzidzisi waapano, unokudaidza.”

²⁹ Naye azwa, wakakasira kumiruka, akaenda kwaari.

³⁰ Zvino Jesu waiya asati aguma muguta, asi waiya achipo paakashongana naMaritha.

³¹ Naapo vaJudha avo vaiya naye mumhatso vechimuembedzera, vaona kuti Maria wamiruka ngokukasira, akabuda kubanze, vakamuteera, vechikarakadza kuti unoenda kuiba koochemerapo.

³² Apo Maria aguma paiya naJesu, amuona wakawa pashi patsoka dzake, akati kwaari, “Mambo, kudai waiya pano, mukoma wangu waidai asikazi kufa.”

³³ Naapo Jesu amuona echichema, nevaJudha vechichema, avo vakauya naye, wakaita mahwema mumweya mwake nokutambudzika;

³⁴ naye wakati, “Mwakamuradzika pari?” Vakati kwaari, “Mambo, uyai muone.”

³⁵ Jesu wakachema masodzi.

³⁶ Ndizvo vaJudha vakati, “Wonai, kumudisisa kwake!”

³⁷ Asi vamweni vavo vakati, “Uyu munhu, wakasvinura madziso owaiya bofu, waiya asikakoni here kuita kuti uyu munhu asafa?”

Razarusi Unomuswa kubva muKufa

³⁸ Naapo Jesu, echitambudzika kakurutu mukati mwake, wakaguma kuiba; raiya bako nebuwe raiya rakadumaidza padera paro.

³⁹ Jesu wakati, “Dusai buwe.” Maritha, hanzvadzi youwo wakafa, wakati kwaari, “Mambo, zvino wotonuhwa, ngokuti waane mazuva marongomuna afa.”

⁴⁰ Jesu wakati kwaari, “Andizi kukuronzera here kuti dai wechitenda ungazoona uthende hwaMwari?”

⁴¹ Ndizvo vakadusa buwe. NaJesu wakaringira mudenga akati, “Baba, ndinomubonga ngokuti mwakandizwa.

⁴² Neni ndinozia kuti unondizwa ngenguva dzeshe. Asi ngepamusoro pembungano yakaema pasinde ndaronza kudaro, kuti itende kuti ndiwe wakandituma.”

⁴³ Naapo aronza izvi, wakadaidzira ngeizwi guru echiti, “Razarusi, buda.”

⁴⁴ Uwo waiya akafa wakabuda, akasungwa tsoka nenyara ngemachira okuikwa nawo, nehope yake yakasungwa ngejira doko. Jesu wakati kwavari, “Musunhurenyi, mumurekere aende.”

Bangano roKuda Kuuraya Jesu

⁴⁵ Ndizvo vazhinji vevaJudha avo vakauya kunaMaria, vechiona izvo zvaakaita Jesu, vakatenda;

⁴⁶ asi vamweni vavo vakaenda kuvaFarisi, vakavaronzera zvaaiya aita Jesu.

⁴⁷ Ndizvo vapristi vakuru nevaFarisi vakaungana pamwepo nevatongi kuita bangano, vakati, “Tinozoitenyi? Ngokuti uyu munhu unoita mioniso yakawanda.

⁴⁸ Kudai techimurekera echiangira kudaro, vanhu veshe vanozotenda kwaari, nevaRoma vanozouya vaparadze zveshe ndau yedu yakachena nedzinza redu.”

⁴⁹ Asi umwe wavo, Kaiafasi, uwo waiya mupristi mukuru ngegorero, wakati kwavari, “Amuzii chiro nachimwe.

⁵⁰ Amuzwisisi kuti zvirinane kwomuri kuti munhu umwe unosisira kufira vanhu vazhinji pane kuti dzinza reshe ripere.”

⁵¹ Aazi kuronza izvi ngokuda kwake, asi ngokuti waiya mupristi mukuru ngegorero, wakaprofeta kuti Jesu unozofira dzinzaro,

⁵² asi haiwa kufira dzinzaro kwega, asi kuti aunganidzewo pamwepo vana vaMwari avo vakapararira kunyika dzeshe, kuti vaite umwe.

⁵³ Ndizvo kubvira ngezuva iro vakaita bangano pamwepo kuti vamuuraye.

⁵⁴ Ndizvo Jesu aazi kuchahambazve pamhene pakati pevaJudha, asi kubva apo wakaenda kunyika iri pasinde norubaya, kudhorobha rinozwi Efuremu; naapo wakagara nevadzidzi vake.

⁵⁵ Zvino Phasika revaJudha raiya pasinde, vazhinji vakakwira Jerusarema vechibva munyika, Phasika risati raguma, kuti vadzichenese.

⁵⁶ Ndizvo vakatsvaka Jesu, vakaema muTemperi vechiti umwe kune umweni, “Munotinyi? Kuti aazouyi here kudhiri?”

⁵⁷ Ndizvo vapristi vakuru nevaFarisi vaiya vakaita mupango kuti kunyazwi ndiani unozia paari, ngaaronze, kuti vamubate.