Johani 1 - Bhaibheri Rakachena muChindau

Izwi roKupona

¹ Pakutanga waiyapo Izwi, neIzwi waiya naMwari, neIzwi waiya Mwari.

² Waiyapo pakutanga naMwari.

³ Zviro zveshe zvakasikwa kubudikidza ndiye, ngepabanze pake paiya pasina chiro nachimwe chakasikwa cheizvo zvakasikwa.

⁴ Mwaari kwaiyamwo kupona nokupona kwaiya kujeka kwavanhu.

⁵ Kujeka kunojeka muchidima nechidima achizi kukudzima.

⁶ Kwaiyapo munhu wakatumwa ndiMwari, zina rake raiya Johani.

⁷ Wakauya kuita chapupu, kuti apupure ngokujeka, kuti vanhu veshe vatende kubudikidza ndiye.

⁸ Iye waiya asiriye kujeka, asi wakauya kuti apupure ngokujeka.

⁹ Kujeka ukwo kwaiya kujeka kwegwinyiso, ukwo kunojekisa vanhu veshe vanobarwa munyika.

¹⁰ Waiya munyika, nenyika yakasikwa kubudikidza ndiye, asi nyika aizi kumuzia.

¹¹ Wakauya munezvake, nevanhu vake avazi kumuashira.

¹² Asi kwavari veshe vakamuashira, avo vakatenda muzina rake, wakavapa simba rokuti vaite vana vaMwari;

¹³ avo vasikazi kubarwa ngengazi nokuti ngokuemura kwenyama nokuti ngokuemura kwomunhu, asi vakabarwa ndiMwari.

¹⁴ NeIzwi wakaita munhu, wakagara pakati pedu, nesu takaringira uthende hwake, uthende huri hwouwo wakabarwa ega ndiBaba, akazara ngenyasha negwinyiso.

¹⁵ (Johani wakaita chapupu ndiye, akadaidzira echiti, “Uyu ndiye wendakaereketa ndiye kuti, ‘Uwo unouya sure kwangu mukuru kupinda inini ngokuti waiyapo ndisati ndaapo.’ ”)

¹⁶ Kubva mukuzara kwake isusu teshe takaashira, nyasha padera penyasha.

¹⁷ Ngokuti mipango yakapuwa kubudikidza ndiMosi; asi nyasha negwinyiso zvakaapo kubudikidza ndiJesu Kristu.

¹⁸ Akuna naumwe wakamboona Mwari; Mukororo ega, uwo unogara paditi raBaba, ndiye wakamuita kuti aziikanwe.

Chapupu chaJohani Mubhabhatidzi

¹⁹ Neichi ndicho chapupu chaJohani, apo vaJudha vakatuma kwaari vapristi nevaRevhi kubva Jerusarema koomubvunza kuti, “Urianani iwewe?”

²⁰ Naye wakatenda, aazi kuramba, asi wakatenda echiti, “Inini andinipi Kristu akadi.”

²¹ Navo vakamubvunza vechiti, “Wati kudini? Uri Erija here?” Naye wakapingura echiti, “Andiriyepi.” “Uri muprofeti here?” Naye wakapingura echiti, “Haiwa.”

²² Ndizvo vakati kwaari zvino, “Urianani? Tipingure kuti tione chokoopingura avo vakatituma. Unotinyi iwewe pachako?”

²³ Wakati, “Inini ndini izwi rounodaidzira mushango echiti, ‘Ruramisai njira yaMambo,’ kudai ngezvaakaronza Isaya muprofeti.”

²⁴ Zvino vaiya vakatumwa kubva kuvaFarisi.

²⁵ Navo vakamubvunza, vakati kwaari, “Zvino ngenyi wechibhabhatidza, kuti usiri Kristu nokuti Erija nokuti uwo muprofeti?”

²⁶ Johani wakavapingura echiti, “Inini ndinobhabhatidza ngemvura; asi pakati penyu panoema uwo womusikazii,

²⁷ ndiye uwo unouya sure kwangu, wendisikasisiri inini kuti ndisunungure rusinga rwegwada rake.”

²⁸ Izvi zvakaitika muBhethani seri kweJorodhani, apo paaibhabhatidza Johani.

Kagwai kaMwari

²⁹ Nechimangwani aona Jesu echiuya kwaari, wakati, “Ringirai, Kagwai kaMwari kanodusa kushaisha kwenyika!

³⁰ Uyu ndiye wendakaereketa ndiye kuti, ‘Sure kwangu kunouya munhu uri mukuru kupinda inini, ngokuti waiyapo ndisati ndaapo.’

³¹ Inini pachangu ndaiya ndisikamuzii; asi ngendaa iyi ndakauya ndechibhabhatidza ngemvura kuti apangidzirwe kuvaIsuraeri.”

³² NaJohani wakaita chapupu echiti, “Ndakaona Mweya wechidzaka kubva mudenga wakadai ngenjia, ukagara padera pake.

³³ Inini pachangu ndaiya ndisikamuzii; asi iye wakandituma kuti ndibhabhatidze ngemvura wakati kwendiri, ‘Uwo wounozoona Mweya wechidzaka nokugara padera pake, uyu ndiye unobhabhatidza ndiMweya Wakachena.’

³⁴ Neni ndakaona, ndakapupura kuti uyu ndiye Mukororo waMwari.”

Vadzidzi voKutanga vaJesu

³⁵ Nechimangwanizve Johani waiya akaema nevairi vevadzidzi vake;

³⁶ naye aona Jesu echihamba, wakati, “Ringirai, Kagwai kaMwari!”

³⁷ Vadzidzi vairi vakamuzwa echiereketa izvi, vakateera Jesu.

³⁸ Jesu wakakunukuka, akavaona vechimuteera, akati kwavari, “Munotsvakenyi?” Vakati kwaari, “Rabhi (ukwo kunoti ngokukumuchwa, Mudzidzisi,) unogara pari?”

³⁹ Wakati kwavari, “Uyai muone.” Ndizvo vakauya vakaona apo paaigara, navo vakagara naye zuvaro. Raiya rooda kuita awa rechigumi.

⁴⁰ Umwe wevairi avo vakazwa Johani echiereketa, akamuteera, waiya Andreu, munun'una waSimoni Petro.

⁴¹ Iye wakatanga kutsvaka mukoma wake Simoni, akati kwaari, “Tamuona Mesia” (ukwo kunoti ngokukumuchwa, Kristu.)

⁴² Naye wakamuunza kunaJesu. Naapo Jesu amuringira wakati, “Iwewe ndiwe Simoni mukororo waJohani. Unozodaidzwa kuti Khefasi” (ukwo kunoti ngokukumuchwa, Petro.)

Jesu Unodaidza Firipu naNathanaeri

⁴³ Nechimangwani wakada kuenda Garire, wakaona Firipu. NaJesu wakati kwaari, “Nditeere.”

⁴⁴ Zvino Firipu waibva Bhethisaidha, dhorobha revaigara Andreu naPetro.

⁴⁵ Firipu wakaona Nathanaeri, akati kwaari, “Tamuona uwo waakanyora ndiye Mosi muMipango nevaprofeti, Jesu weNazaretha, mukororo waJosefa.”

⁴⁶ Nathanaeri wakati kwaari, “Kungabvawo chakanaka muNazaretha here?” Firipu wakati kwaari, “Uya uone.”

⁴⁷ Jesu wakaona Nathanaeri echiuya kwaari, akati ndiye, “Ringirai muIsuraeri wegwinyiso, usina kuchengedza mukati mwake!”

⁴⁸ Nathanaeri wakati kwaari, “Wandiziira pari?” Jesu wakapingura akati kwaari, “Firipu asati akudaidza, uri pashi pomuonde, ndakakuona.”

⁴⁹ Nathanaeri wakapingura akati, “Rabhi, iwewe uri Mukororo waMwari! Uri Mambo waIsuraeri!”

⁵⁰ Jesu wakapingura, akati kwaari, “Ngokuti ndati kwouri, ndakakuona uripashi pomuonde, unotenda here? Unozoona zviro zvikuru kupinda izvi.”

⁵¹ Wakati kwaari, “Ngegwinyiso ndinoti kwomuri, munozoona denga rakabeuka nengirosi dzaMwari dzechikwira nokudzaka padera poMukororo woMunhu.”