Joeri 3 - Bhaibheri Rakachena muChindau

Mwari Unozotonga Madzinza

¹ “Ngokuti zvino, ngaawo mazuva nepamukuwo uwo, apo ndinozopetudzazve vakachakatwa vaJudha neJerusarema,

² ndinozounganidza madzinza eshe nokuaunza muBani raJehoshafati; ndinozopinda mukutonga navo apo ngendaa yevanhu vangu nendaa yenhaka yangu Isuraeri, avo vevakaparadzira pakati pemadzinza. Vakagurirana nyika yangu,

³ nokuita mabhigidha ngevanhu vangu; vakatengesa varumbwana kuti vatenge mahure, nokutengesa vasikana kuti vapuwe vhini kuti vamwe.

⁴ “Muri chiinyi kwendiri, imwimwi Thire neSidhoni, nenharaunda dzeshe dzevaFiristia? Munozondiunzidzira ngechiro here? Mukandiunzidzira, ndinozopetudza zviito zvenyu padera pamasoro enyu zvinozvi ngokukasira.

⁵ Ngokuti mwatora sirivha yangu nomukore wangu, mwatwarazve zviro zvangu zvakanasa kunaka kuisa mumatemperi enyu.

⁶ Mwatengesa vanhu vaJudha neveJerusarema kuvaGiriki, kuti muvabvise kuvaisa kuretu kubva kumugano wavo.

⁷ Asi zvino ndinozovamusa kuti vabude kubva kundau yemwakavatengesa, neni ndinozopetudza zviito zvenyu padera pemasoro enyu.

⁸ Ndinozotengesa vakororo venyu nevanasikana venyu munyara yevanhu vaJudha, navo vanozovatengesa kuvaSabheani, kudzinza riri kuretu; ngokuti Mambo Mwari waereketa.

⁹ Teketesai ichi pakati pemadzinza; nasirirai kurwa hondo, musai ngwazi. Varwi veshe ngavakwedzere, ngavakwire.

¹⁰ Pfurai miromo yemapadza enyu kuita shoti, nemapanga enyu okutongora kuita mikhondo; usina simba ngaaronze kuti, ‘Ndiri ngwazi.’

¹¹ Uyai ngokukasira, imwimwi madzinza eshe kundau dzeshe, mudziunganidzepo. Dzasa pashi ngwazi dzako, O Mambo Mwari.

¹² Madzinza ngaadzimuse, auye kuBani raJehoshafati; ngokuti ndinozogarapo kutonga madzinza eshe anovatendenedza.

¹³ Unzai sikeyo, ngokuti zvokucheka zvaibva. Pindai, mutengese; ngokuti chisviniro chevhini chazara. Mabiya anofashukira, ngokuti kushata kwavo kwakakura.”

¹⁴ Mbungano, mbungano mubani rokugura! Ngokuti zuva raMambo Mwari riri pasinde mubani rokugura.

¹⁵ Zuva nomwedzi zvinosvipiswa, nenyeredzi dzinodzima kujeka kwadzo.

Mwari Unozofumisa Vanhu Vake

¹⁶ Mambo Mwari unozotinhira kubva Zioni, nokuereketa ngeizwi rake kubva Jerusarema; matenga nenyika zvinozozungunyika. Asi Mambo Mwari unozoita bako revanhu vake, norusvingo rwakagwinya rwavanhu vaIsuraeri.

¹⁷ “Ndizvo munozozia kuti inini Mambo Mwari, Mwari wenyu, ndinogara muZioni mutunhu wangu wakacheneswa. NeJerusarema rinozocheneswa, nevapara avachazombohambi kupinda ndimwo.

¹⁸ Muzuva iro, mitunhu inozodonha vhini idzva, zvimitunhu zvinozoerera ngomukaka, nendwizi dzeshe dzaJudha dzinozoerera ngemvura, nechinyuka chinozobuda mumhatso yaMambo Mwari, nokudiridzira Bani reShitimu.

¹⁹ Egipite rinozoita matongo, neEdhomu rinozoita shango risikagarwi, ngendaa yokugebenga kwakaitwa kuvanhu vaJudha, ngokuti vakaparadza ngazi isina ndaa munyika mwavo.

²⁰ Asi Judha unozogarwa mhera nariini, neJerusarema kumibarirwana yeshe.

²¹ Ndinozochenesa ngazi yavo yendisikazi kuchenesa, ngokuti Mambo Mwari unogara muZioni.”