Joeri 1 - Bhaibheri Rakachena muChindau

¹ Izwi raMambo Mwari rakauya kunaJoeri mukororo waPhethueri.

Vanhu Vanochema Kuparadzwa kweZvisimwa

² Izwanyi ichi, O harahwa, mupurutane, mweshe vagari venyika! Chiro chakadaro chakamboitika kumazuva enyu here, nokuti kumazuva emadzibaba enyu?

³ Ronzerai vana venyu ndicho, nevana venyu ngavaronzere vana vavo, nevana vavo kumubarirwana umweni.

⁴ Icho chakasiiwa ngemakonye, ndongwe dzakadya. Chakasiiwa ngendongwe, gwata rakadya; neicho chakasiiwa ngegwata, mbunga dzakadya.

⁵ Mukai, imwimwi zviradza, mucheme; mwechiboorera, mweshe imwimwi vamwi vevhini, ngendaa yevhini idzva, ngokuti rabviswa pamiromo yenyu.

⁶ Ngokuti dzinza rapamba nyika yangu, rakagwinya, risikaerengeki; mazino aro mazino emhondoro, naro rinemazino emhondoro hadzi.

⁷ Rakahwanda mivhini yangu, rakamwesa ngepakati mionde yangu; rakakwamura mapande ayo nokukandira pashi; nematai ayo aita akachena.

⁸ Chemai kudai ngemhandwe yasimira jira remasaka ngendaa yokufirwa ngomwamuna woutsva hwayo.

⁹ Munikero wezviyo nomunikero wokumwa yabviswa kubva kumhatso yaMambo Mwari. Vapristi, vashandi vaMambo Mwari, vanobonda.

¹⁰ Minda yaparadzwa, nyika inochema; ngokuti zviyo zvaparadzwa, vhini idzva raomeswa, mafuta anopera.

¹¹ Perai simba, imwimwi varimi, boorerai, imwimwi vatonongori vemivhini, ngendaa yekoroni, nendaa yebhare; ngokuti zvisimwa zvomunda zvaparadzwa.

¹² Muvhini unozeketera, muonde unofota; muphomegraniti, mubvumo, muapura, nemiti yeshe yomumunda yaoma, ngegwinyiso kudakara kunofota pakati pevanhu.

¹³ Simirai machira emasaka, mucheme, imwimwi vapristi; boorerai, imwimwi vashandi vearita. Uyai, atai usiku hweshe muri mumachira emasaka, imwimwi vashandi vaMwari wangu! Munikero wezviyo nomunikero wokumwa azvichaunzwi kumhatso yaMwari wenyu.

¹⁴ Chenesai zuva rokuera kudya, mudaidzire mushongano wokudira. Unganidzai vakuru navo veshe vagari vomunyika kumhatso yaMambo Mwari, Mwari wenyu, mucheme kakurutu kunaMambo Mwari.

¹⁵ Ihehe ngezuva iro! Ngokuti zuva raMambo Mwari raa pasinde, rinouya kudai ngokuparadzwa kunobva kune Une-simba-reshe.

¹⁶ Kudya akuzi kubviswa mukuona kwedu here, kudakara nokudakadzwa kubva kumhatso yaMwari wedu?

¹⁷ Mbeu dzaora dziri pashi pamaondo adzo, matura aita matongo; tsapi dzaputswa, ngokuti zviyo zvakorera.

¹⁸ A kugomera kunoita mhuka! Mitanga yen'ombe inonzerereka ngokuti ayina mafuro; kunyazwi mitanga yemakwai yaparadzwa.

¹⁹ Kweuri, O Mambo Mwari, ndinozochema, ngokuti muriro wakapedza mafuro omushango, nomurazvu wapisha miti yeshe yomushango.

²⁰ Kunyazwi nemhuka dzomushango dzinochemawo kwouri, ngokuti ndwizi dzemvura dzaoma, nomuriro wapedza mafuro omushango.