Jobe 9 - Bhaibheri Rakachena muChindau

Jobe

¹ Zvino Jobe wakapingura echiti,

² “Ngegwinyiso ndinozia kuti izvi ndizvo; asi munhu ungaita maruramirenyi pamberi paMwari?

³ Kudai umwe echida kuphikisana naye, akuna naumwe ungakona kumupingura munguva gumi remazana.

⁴ Wakangwara mumwoyo, nokugwinya musimba guru. Ndiani wakamboomesa mwoyo kumumukira, akabudirira?

⁵ Uwo unothutisa mitunhu nayo isikazvizii, naapo paanoipinduridza muushungu hwake;

⁶ uwo unozungunyisa nyika kubva pandau yayo, nesika dzayo dzinohuta.

⁷ Unopanga zuva naro aribudi; unositira nyeredzi;

⁸ uwo ega unotambanudza matenga, echihamba padera pemafungu oruandhle,

⁹ unoita nyeredzi dzinozwi Bheya, naOrioni, maPreiadhesi, norupande rwematenga okubani,

¹⁰ uwo unoita zviro zvikuru zvisikazwisisiki nezviro zvinoshamisa zvisikaerengeki ngouwandu.

¹¹ Ringira, unopinda ngependiri, neni andimuoni; unoangirira kupinda, asi andimuzwi.

¹² Unotora, ndiani ungamupinga? Ndiani ungaronza kwaari kuti, ‘Unoitenyi?’

¹³ Mwari aazopetudzi ushungu hwake, vadetseri vaRahabhi vanokotama pashi pake.

¹⁴ Zvino ndingamupingura ngenjiranyi, nditsanangure mazwi angu kupingurana naye?

¹⁵ Kunyazwi ndakanyarurama, andikoni kumupingura; ndinosisira kupota kuitirwa nyasha kunomutongi wangu.

¹⁶ Kudai ndakamudaidza, naye akandipingura, anditendi kuti waizopurutana izwi rangu.

¹⁷ Ngokuti unondipwanya ngomubvumo, nokuwanza maponje angu pasina ndaa.

¹⁸ Aazonditenderi kuti ndifeme, asi unondizadza ngokushononwa.

¹⁹ Kudai kuri kuphikisana ngesimba, ringira, iye unaro! Kuti iri ndaa yokutonga kwakarurama, ndiani unozomudaidza?

²⁰ Kunyazwi andina ndaa, muromo wangu wemene unozondiitira ndaa; kunyazwi ndakaperera, iye unokona kundionesa kupauka.

²¹ Ndakaperera; andidzizii inini pachangu; ndinoshoora kupona kwangu.

²² Ichi chiri chiro chimwe; ndizvo ndinoti, ‘Unoparadza veshe vakarurama nevakashata.’

²³ Naapo dambudziko rechiuraya ngokukasira, iye unozosheka mukutambudzika kwevasina ndaa.

²⁴ Nyika inopuwa munyara dzevakashata; unofukidza madziso evatongi vayo; kudai asiriye, ndiani zvino unodaro?

²⁵ Mazuva angu anokasira kupinda murumbi; anotiza, aaoni chakanaka.

²⁶ Anokasira kupinda kudai ngengarava dzetsanga, kudai ngedorambudzi rinokasira koobata nyama yaro.

²⁷ Kudai ndechiti, ‘Ndinozoriyarwa kugunun'una kwangu, ndinozorekera kudzimbirwa kwangu, ndidziembedzere,’

²⁸ ndinotya madambudziko angu eshe, ngokuti ndinozia kuti auzoerengi kuti ndiri usina ndaa.

²⁹ Ndinozoitirwa ndaa; ngenyi zvino ndechishandira zvisina shwiro?

³⁰ Kudai ndechishamba pachangu ngesipho, ndechichenesa nyara dzangu ngechando,

³¹ asi unozondinzvaidza mumatope, nemachira angu anozondinyenyesa.

³² Ngokuti iye aasiri munhupi kudai ndini, kuti ndipingurane naye, kuti tiunzwe pamwepo mukutongwa ndaa.

³³ Akuna muedzanisi ungagura ndaa pakati pedu, uwo ungaisa nyara dzake padera pedu teshe.

³⁴ Kudai adusa ndonga yake kwendiri, nokutyisa kwake kusandikarudza,

³⁵ zvino ndingazoereketa, ndisikamutyi; ngokuti ndinozia kuti andizi kudai ngezvendinopinimidzirwa.”