Jobe 8 - Bhaibheri Rakachena muChindau

Bhiridhadhi

¹ Zvino Bhiridhadhi muShuhi wakapingura echiti,

² “Unozoereketa zviro izvi mukuwo wakaitawani, nemazwi omuromo wako anozoita kudai ngedutu gurutu?

³ Mwari unopaukisa kutonga kwakarurama here? Nokuti Uwo Une-simba-reshe unokunukudza here kururama?

⁴ Kudai vana vako vakamushaishira wakavapira musimba rokupauka kwavo.

⁵ Kudai iwewe wechizotsvaka Mwari kakurutu, nokupota kunoUwo Une-simba-reshe,

⁶ kudai iwewe wakachena nokururama, ngegwinyiso zvino unozomiruka ngendaa yako, nokuita kuti ugaro hwako hwakarurama hubudirire.

⁷ Kunyazwi kutanga kwako kwaiya kudokodoko, kupedzisira kwako kuchaita kukurutu.

⁸ Ngokuti zvino bvunza kunomubarirwana wekare, upinimidze ngezvevakatsvakisisa madzibaba avo,

⁹ ngokuti isusu tichiri vezuro, atina chetinozia; ngokuti mazuva edu padera penyika akadai ngebvute.

¹⁰ Avazokudzidzisi here, nokukuronzera, nokuereketa mazwi kubva mukuzwisisa kwavo?

¹¹ Jekacheka ringakura here pasina madhaka? Rutsanga rungakura here pasina mvura?

¹² Naapo richiri mukusvipirika kwaro, risati ratemerwa pashi, rinofota ngokukasira kupinda zvisimwa zvimweni.

¹³ Ndizvo zvakaita njira dzeshe dzeavo vanoriyarwa Mwari; gonda revasikadiri Mwari rinozopera.

¹⁴ Gonda rake richadambuka, nemagondero ake anozodai ngemhatso yemadandemutande.

¹⁵ Kudai umwe echizotseama pamhatso yaro aizotsimi, kudai umwe echiibata aizotsimi.

¹⁶ Wakashata unoburukira pamberi pezuva, nematai ake anopararira padera pemunda.

¹⁷ Nzinde dzake dzinozotandira murwi wemapuwe, unogara mundutwe yemapuwe.

¹⁸ Nokudai echiparadzwa kubva pandau yake, zvino ndau yake inozomuramba yechiti, ‘Andizi kumbokuona.’

¹⁹ Ringira, uku ndikwo kudakara kwenjira yake, nevamweni vanozobuda kubva munyika.

²⁰ Ringira, Mwari aazorashi munhu wakaperera, nokuti kudetsera vaiti vezvakashata.

²¹ Unozozadza muromo wako ngokusheka, nemiromo yako ngokudaidzira kwokudakara.

²² Avo vanokuzonda vanozopfekeswa ngokutsveruka, nougaro hwevakashata ahuchazoapo.”