Jobe 7 - Bhaibheri Rakachena muChindau

¹ Munhu aatambudziki ngomushando wakakonza padera penyika, nemazuva ake aazi kudai ngemazuva omunhu unobhadharwa here?

² Kudai ngehloko inodisisa mumvuri, nokudai ngounobhadharwa unoringira muthuso wake,

³ ndizvo inini ndinopuwa mwedzi isina shwiro, nousiku hunorembesa hwakaemeserwa kwendiri.

⁴ Apo ndechiata pashi, ndinoti, “Ndinozomuka riini?” Asi usiku hwakareba, neni ndinotambudzwa ngokutsanduridza mberi nesure metsa kuedze.

⁵ Nyama yangu yafukidzwa ngehonye netsvina yebukuta; ganda rangu rinooma nokugagazve.

⁶ Mazuva angu anokasira kupinda chirukiso chomuruki, nawo anopera pasina gonda.

⁷ A, karakadza kuti mazuva angu akadai ngefemero; madziso angu aachazombooni chakanaka.

⁸ Dziso iro rinondiona arichazondionizve; naapo madziso ako anondiringira, andichazoapopi.

⁹ Kudai ngegore rinotsakatika nokupera, ndizvo uwo unodzaka muSheori aachazouyizve.

¹⁰ Aachazopetuki kumhatso yake, nokuti ndau yake aichazomuzii.

¹¹ Ndizvo andizonyaradzi muromo wangu; ndinozoereketa mukurwadziwa kwomweya wangu; ndinozogunun'una mukushononwa kwomweya wangu.

¹² Ndiri ruandhle here nokuti chikara chomumvura, kuti iwewe unoemesa murindi padera pangu?

¹³ Naapo ndechiti, “Mubhedhi wangu unozondiembedzera, paugaro hwangu hunozoporesa kurwadziwa kwangu,”

¹⁴ zvino iwewe unondityisa ngokurota, nokundikarudza ngezvioniso.

¹⁵ Ndizvo mweya wangu unotsanangura kudzipwa nokufa kupinda muiri uyu.

¹⁶ Ndinonyenya kupona kwangu; andizoponi mhera nariini. Ndirekere ndiri ndega, ngokuti mazuva angu akadai ngokufema.

¹⁷ “Munhu chiinyi, kuti iwewe umukurise, kuti upinimidze ndiye,

¹⁸ nokuti umuhambire mangwanani eshe, nokumuedza mikuwo yeshe?

¹⁹ Unozoita mukuwo wakaitawani usikabvi kwendiri, nokuti kundirekera ndiri ndega metsa ndamedza mate angu?

²⁰ Kudai ndashaisha chiinyi chendinoita kwouri, A iwewe mungwariri wevanhu? Wakandiemesa ngenyi kuti ndiite chiro chokuitirwa ndaa ndiwe? Ndaita mutwaro kweuri ngenjiranyi?

²¹ Aurekereri ngenyi kupauka kwangu, uduse kushata kwangu? Ngokuti zvino ndinozoata mubukuta; newe unozonditsvaka, asi andizoapopi.”