Jobe 6 - Bhaibheri Rakachena muChindau

Jobe

¹ Zvino Jobe wakapingura akati,

² “Kudai kutambudzika kwangu kweshe kwaipimwa, nokurwadziwa kwangu kweshe kwaiiswa pazvipimo pamwepo!

³ Ngokuti zvino kwaizorema kupinda jecha roruandhle; ndizvo mazwi angu aiya okukasira.

⁴ Ngokuti misee yoUwo Une-simba-reshe iri mukati mwangu; mweya wangu unomwa ukaira hwayo; zvinotyisa zvaMwari zvinodzironga kunditendenedza kurwa neni.

⁵ Mbongoro yomushango inopheza here apo inemwenje nokuti kabi inokuma here pakudya kwayo?

⁶ Icho chisikanaki chingadyiwa here chisina munyu nokuti huripo here hunaku murupande rwakachena rwezanda?

⁷ Mwoyo wangu unoramba kuzvigwama, zvakadai ngokudya kunonyenyisa kwendiri.

⁸ A, kudai ndaipuwa zvendinokumbira; kudai Mwari aindipa chidisiso changu,

⁹ kuti kudai chaidakadza Mwari kuti andipwanye, kuti arekere nyara yake nokundiuraya!

¹⁰ Uku kungaita kuembedzerwa kwangu; ndaizodakara kakurutu mukurwadziwa kusina nyasha; ngokuti andizi kuramba mazwi oUwo Wakachena.

¹¹ Simba rangu chiinyi, kuti ndiemere? Nemagumo angu chiinyi, kuti nditsungirire?

¹² Simba rangu isimba remapuwe here? Nokuti nyama yangu ithusi here?

¹³ Mugwinyiso andina rudetsero mukati mwangu nesimba radzingwa kubva kwendiri.

¹⁴ Uwo usikaitiri nyasha mungani wake aatyi Uwo Une-simba-reshe.

¹⁵ Hama dzangu dzinoshanda ngourimbwi kudai ngomukova, kudai ngokuerera kwemikova inooma,

¹⁶ iyo yakasvipa ngendaa yechando, yakakora ngechando chinonyunguruka.

¹⁷ Ngomukuwo wokudzia, inongarangaka; apo kwoopisha, inopwa kubva mundau yayo.

¹⁸ Vahambi vanopauka kubva munjira yavo kuenda kurutii; vanokwira kusina chiro nokufa.

¹⁹ Zviunga zvaThema zvikaringira, zvikwata zvevahambi veShebha zvinogonda.

²⁰ Vakurudzwa ngokuti vaigonda; vakagumapo navo vakakangaidzwa.

²¹ Zvino imwimwiwo mwaonesa kuti amudetseri chiro; munoona dambudziko rangu, nemwi munotya.

²² Ndakati here, ‘Ndipei chipo?’ Nokuti, ‘Ndipei chitengero chinobva kupfuma yenyu?’

²³ Nokuti, ‘Ndiponese kubva munyara dzegaa?’ Nokuti, ‘Ndiripirenyi kubva munyara dzevatsikiriri?’

²⁴ Ndidzidzisenyi, neni ndinozonyarara; muite kuti ndinase kuzwisisa apo pendakashaisha.

²⁵ A, mazwi akarurama anesimba! Asi kutuka kwenyu kunoonesenyi?

²⁶ Munopinimidza here kuti mungatuka mazwi, kudai ngedutu ngokuereketa kwomunhu wagumirwa anodai ngedutu?

²⁷ Mungada kunyazwi kuita mabhigidha ngendaa yenherera, nemwi munotengesa mungani wenyu.

²⁸ Asi zvino dakarai kuringira padera pangu; ngokuti andizonyepi pamberi pehope dzenyu.

²⁹ Kunukukai, ndinomupota, musatendera kuti kushaisha kuitwe. Kunukukai zvino, kururama kwangu kuri mukati mweiyi ndaa.

³⁰ Kuripo here kushata parurumi rwangu? Kuraira kwangu akukoni kuzwa zviro zvakashata here? ”