Jobe 5 - Bhaibheri Rakachena muChindau

¹ Daidzira zvino, uripo umwe unozokupingura here? Ngokuri kunoumwe waavo vakacheneswa kwounozokunukukira?

² Ngegwinyiso shungu dzinouraya benzi, nendurumwa dzinobaya usina ruziyo.

³ Ndaona benzi rechitsira nzinde, asi ngokukasira ndakatuka ugaro hwaro.

⁴ Vana vake vari kuretu kubva mukungwaririka, vanopwanywa pamusiwo, apana naumwe unovanunura.

⁵ Vanenzara vanodya hukuro yavo, navo vanozvitora, kunyazwi kubva muminzwa; unenyota unotangurira upfumi hwavo.

⁶ Ngokuti kutambudzika akubudi kubva mumavhu, nokuti madambudziko aabudi kubva mumavhu;

⁷ asi munhu unobarirwa kutambudzika, kudai ngetsatsi dzinokwira.

⁸ Asi kudai ndirini, ndaizotsvaka Mwari, nokunaMwari ndaizoisa ndaa yangu.

⁹ Uwo unoita zviro zvikuru zvisikatsvakiki, zviro zvinoshamisa zvisikaerengeki ngokuwanda.

¹⁰ Uwo unonaisa mvura padera penyika, nokunaisa mvura padera peminda;

¹¹ unomirudza avo vari pashi, naavo vanotsumba vakwidzwe mukungwaririka.

¹² Unokangaidza avo vakangwara vanoronga mazano, kuti nyara dzavo dzisakona kubudisa kuronga kwavo.

¹³ Unobata vakangwara muurimbwi hwavo; nokupanga kwevaradzikidzi kunozopera.

¹⁴ Vanogumirwa ngechidima achimasikati, nokuambamira masikati kudai ngousiku.

¹⁵ Asi unoponesa varombo kubva kushoti yemiromo yavo, nokubva kunyara younesimba.

¹⁶ Ndizvo varombo vanegonda, nokushata kunokonya muromo wakwo.

¹⁷ Unomuchena uwo munhu waanoorora Mwari; ndizvo usashoora kuorora kwoUne-simba-reshe.

¹⁸ Ngokuti unokuwadza, asi unosunga; unoremadza, asi nyara dzake dzinoponesa.

¹⁹ Unozokununura kubva kumadambudziko matanhatu; mumadambudziko manomwe akuna nechakashata chinozokugumira.

²⁰ Ngomukuwo wenzara unozokununura kubva mukufa, nomuhondo unozokununura kubva kusimba reshoti.

²¹ Iwewe unozofishwa kubva mukuchaiwa ngorurumi; usazotya kuparadzwa apo kunokugumira.

²² Unozosheka kuparadza nenzara; newe usazotya zvikara zvomunyika.

²³ Ngokuti unozoita chitenderano nemapuwe omushango nezvikara zvomushango zvichagara mukunyarara newe.

²⁴ Newe unozozia kuti tende rako rakangwaririka; unozoringira zvifuyo zvako auzorashikirwi ngechiro.

²⁵ Unozozia kuti mibarirwana yako inozowanda, dzinza rako rinozodai ngomwenje womunyika.

²⁶ Unozoguma kuiba rako waane makore akakwana, kudai ngemwonzora yekoroni yaguma nguva yayo yokupurwa.

²⁷ Ringira, izvi takazvitsvakisisa, igwinyiso. Zvizwe, uzvizie pachako.