Jobe 4 - Bhaibheri Rakachena muChindau

Kubhuirana kwoKutanga Erifazi

¹ Zvino Erifazi muThemani wakapingura echiti,

² “Kudai umwe echiedza kuereketa newe, unozokurudzwa ndizvo here? Asi ndiani ungakona unganyarara kuereketa?

³ Wona, iwewe wakapanga vazhinji, wakagwinyisa nyara dzakarembedzeka.

⁴ Mazwi ako akagwinyisa avo vaitetereka, newe wakagwinyisa mabvi aiya asina simba.

⁵ Asi zvino zvaguma peuri, newe auchakoni kutsengerera; zvakugwama, newe unotambudzika.

⁶ Kutya kwako Mwari akusiri gonda rako here, nokururama kwenjira dzako andiropi gonda rako here?

⁷ Karakadza zvino, ndiani wakaparadzwa, asina ndaa? Nokuti ngepari pavakagurwa vakarurama?

⁸ Kudai ngezvendaona, avo vanorima kushata, vechikusha zvakashata, vanokukura izvozvo.

⁹ Ngokufuridza kwaMwari vanopera, nokuvhuvhuta kwoushungu hwake vanopedzwa.

¹⁰ Kukwanga kwemhondoro, neizwi remhondoro rinotyisa, nemazino evana vemhondoro anoguka.

¹¹ Mhondoro yakagwinya inofa ngokutama zvokudya zvinobatwa, nematuhwa emhondoro yehadzi huru anoparara.

¹² Zvino izwi razwika kwendiri ngokufishika, nenzee dzangu dzakazwa vherevhere raro doko.

¹³ Pakati pezvioniso mukurota kwousiku, apo vanhu vakaata hope,

¹⁴ kutya kwakandigumira, nokuhuta kwakaita kuti magodo angu eshe agwedagwede.

¹⁵ Mweya wakauya pamberi pehope yangu; nebvudzi romuiri wangu rakanyangararika.

¹⁶ Wakaema apo, asi andizi kukona kuzia muemo wawo. Muemo waiya pamberi pemadziso angu; kwaiyapo kunyarara, zvino ndakazwa izwi rechiti,

¹⁷ ‘Munhu unofa unozoita wakarurama kupinda Mwari here? Munhu ungaita wakachena pamberi poMusiki wake here?

¹⁸ Kunyazwi nomuvaranda vake aavagondi; nengirosi dzake unodziitira ndaa,

¹⁹ kunozopinda kwakaitawani kwevari avo vanogara mumhatso dzedongo, idzo madzeyo adzo ibukuta, anopwanywa kudai ngezvitseketsu.

²⁰ Vanopedzwa pakati pemangwanani nemadeekoni; vanopera mhera nariini pasina naumwe unopinimidza ndizvo.

²¹ Bote retende ravo radamburwa mukati mwavo, vanofa vasina kungwara.’”