Jobe 3 - Bhaibheri Rakachena muChindau

Jobe Unogunun'unira Mwari

¹ Ngesure kweizvi Jobe wakabeura muromo wake, akatuka zuva rokubarwa kwake.

² Jobe wakaereketa akati,

³ “Ngaripere zuva rendakabarwa ndiro, nousiku uhwo hwakazwi, Kwaano ukosha hwomwana womurumbwana.

⁴ Zuva iro ngariite chidima! Mwari wokudenga asaritsvaka nokuti kujeka kusajeka padera paro.

⁵ Chidima chakadzama nebvute rakasvipa ngazvirifukidze. Gore ngarigare padera paro; kusvipiswa kwezuva ngakurityise.

⁶ Usiku uhwo, chidima chakakora ngachiribate! Risadakara pakati pemazuva egore, risaerengwa pakati pemazuva omwedzi.

⁷ Eya, usiku uhwo ngahuite husina chiro, kusabuda izwi rokudakara kwohuri.

⁸ Ngavahutuke avo vanotuka ruandhle, avo vari ngwazi dzokumusa chikara chinozwi Revhiathani.

⁹ Nyeredzi dzemadeekoni ahwo ngadziitwe chidima; ngahutsvake kujeka husikakuoni; husatongoona kuedza kwemangwanani.

¹⁰ Ngokuti ahuzi kukonya misiwo yendani yamai angu, nokuti kufisha kutambudzika kubva kumadziso angu.

¹¹ “Ngenyi ndisikazi kufa pakubarwa, kufa ndabarwa?

¹² Ngenyi akaapo mabvi kundiashira nokuti mazamo okuti ndiamwe?

¹³ Ngokuti zvino ndaizoata pashi ndinyarare, ndaizodai ndakazorora

¹⁴ pamwepo nemadzimambo nevatongi venyika, avo vakadziakisira matongo pachavo,

¹⁵ nokuti vatongi vanomukore, avo vakazadza mhatso dzavo ngesirivha.

¹⁶ Nokuti ngenyi ndisikazi kutsirwa kudai ngevakabarwa vakafa, chiya dzisikazi kuona kujeka?

¹⁷ Apo vakashata vanorekera kutambudza kwavo; naapo vakaremba vanozorora.

¹⁸ Apo mabhanditi anozorora pamwepo; avazwi izwi romutambudzi.

¹⁹ Vadoko nevakuru variyo, nehloko yasunhurika kubva kunamambo wayo.

²⁰ “Ngenyi kujeka kwechipuwa kunouwo unotambudzika, nokupona kwechipuwa kuneunomwoyo unotambudzika,

²¹ uwo unechidisiso chokufa, asi akuuyi; echikutsvaka kupinda upfumi hwakafishwa,

²² uwo unodakara kakurutu, unodakadzwa apo aguma kuiba?

²³ Kujeka kunopirwenyi kunomunhu uwo usikakoni kuona njira uwo Mwari waakashoshera mukati?

²⁴ Ngokuti kugomera kwangu kunouya kudai ngechingwa changu, nokuboorera kwangu kwadururwa kudai ngemvura.

²⁵ Ngegwinyiso icho chendakatya kakurutu chinouya padera pangu, nechendakatya chinondisvikira.

²⁶ Andizi kusunhurika nokuti kunyarara; andina kuzorora; asi kutambudzika kunouya.”