Jobe 2 - Bhaibheri Rakachena muChindau

Sathani Unoedzazve Jobe

¹ Zuva rimweni ngirosi dzaMwari dzakauya koodzionisa kunaMambo Mwari, naSathani wakauyawo pakati padzo koodzionisawo kunaMambo Mwari.

² Mambo Mwari wakati kunaSathani, “Wabva kuri?” Sathani wakapingura Mambo Mwari, akati, “Kubva kuenda mberi nesure panyika, nokubva mukukwira nokudzaka padera payo.”

³ Mambo Mwari wakati kunaSathani, “Wakambokarakadza here ngomuranda wangu Jobe, kuti akuna naumwe wakadai ndiye panyika, munhu wakaperera nokururama, uwo unotya Mwari, nokufuratira kubva kunezvakashata? Uchabatisisa unaku hwake, kunyazwi iwewe wakandimusa kuti ndimuitire ndaa, kumuparadza pasina ndaa.”

⁴ Zvino Sathani wakapingura Mambo Mwari echiti, “Doo ngedoo! Munhu unozopa zveshe zvaanazvo ngendaa yendaramo yake.

⁵ Asi tambanudza nyara yako zvino ugwame magodo ake nenyama yake, naye unozokutuka pamberi pehope yako.”

⁶ Mambo Mwari wakati kunaSathani, “Zvakanaka, uri pashi pesimba rako; kwega ponesa ndaramo yake.”

⁷ Ndizvo Sathani wakabuda kubva pamberi paMambo Mwari, wakachaya Jobe ngezvironda zvemamota akashata kakurutu kubva pashi petsoka dzake metsa kunhobvuma yake.

⁸ Jobe wakatora chiwenda kuti adzikwene ndicho; naye wakagara pashi pakati pemarota.

⁹ Zvino mukadzi wake wakati kwaari, “Uchaangira kugwinyisira mukururama kwako here? Tuka Mwari, ufe.”

¹⁰ Asi iye wakati kwaari, “Iwewe unoereketa kudai ngoumwe wevakadzi vari mapenzi. Tinozoashira zvakanaka zvega kubva panyara yaMwari, tisikaashiri zvakashata here?” Muneizvi zveshe Jobe aazi kushaisha ngomuromo wake.

Vangani vaJobe

¹¹ Zvino apo vangani vatatu vaJobe vaiya vazwa ngemadambudziko aya eshe akamugumira, vakauya umwe ngaumwe wavo kubva kundau yake, Erifazi muThemani, Bhiridhadhi muShuhi naZofa muNaamathi. Vakashongana pamwepo kuti vaende vatsumbe naye nokumuembedzera.

¹² Naapo vamuona vachikuretu, avazi kumuzia, vakaboorera, vakachema; vakabaura umwe ngaumwe chokusimira chake, vakakandira bukuta mudenga padera pemasoro avo.

¹³ Vakagara pashi naye mazuva manomwe nousiku hunomwe; akuna naumwe wakaereketa izwi kwaari, ngokuti vakaona kuti kutambudzika kwake kwaiya kukurutu.