Jobe 12 - Bhaibheri Rakachena muChindau

Jobe

¹ Zvino Jobe wakapingura akati,

² “Ngegwinyiso imwimwi muri vanhu, noungwaru hunozofa nemwi.”

³ Asi inini ndinokuzwisisa kudai ndimwi; andisiri pashi penyu akadi. Ndiani uwo usikazii zviro zvakadai ngeizvi?

⁴ Ini ndiri chishekedzo kuvangani vangu; inini, uwo unodaidza kunaMwari, naye unondipingura, munhu wakarurama newakanaka ndiri chishekedzo.

⁵ Avo vanogara vakadakara vanoshoora avo vari mukutambudzika, asi chakagarira avo vanetsoka dzinotedzuka.

⁶ Ugaro hwemadzongoni hunokunyarara, naavo vanomutsenesa Mwari vari vakangwaririka, avo vanozounza zvimwari zvavo munyara dzavo.

⁷ Asi bvunza zvikara, nazvo zvinozokudzidzisa; neshiri dzomudenga dzinozokuronzera;

⁸ bvunza zvisimwa panyika, zvinozokudzidzisa; nehove dzomuruandhle dzinozoronza kwouri.

⁹ Ndiani usikazii mukati mweizvi zveshe kuti nyara yaMambo Mwari yaita izvi?

¹⁰ Munyara dzake munendaramo yezviro zveshe zvinopona, nokufema kwevanhu veshe.

¹¹ Nzee aiedzi mazwi kudai ngomuromo aurairi kudya here?

¹² Ungwaru unevasharuka, nokuti kuzwisisa muuwandu hwemazuva here?

¹³ PanaMwari paneungwaru nesimba, unakwo kupanga nokuzwisisa.

¹⁴ Kudai echipwanyira pashi, akuna naumwe ungazviakisa kudai echikonyera munhu, akuna naumwe ungamubeurira.

¹⁵ Kudai echirambidza mvura, nayo inopwa; kudai echiituma, nayo inoondomora nyika.

¹⁶ Paari panesimba noungwaru; unochengedzwa nomuchengedzi veshe ngevake.

¹⁷ Unotungamira makota kuenda asina chiro, unoita kuti vatongi vaite mapenzi.

¹⁸ Unosunhura zvisungo zvemadzimambo, nokusimidza zviunu zvavo ngebhande.

¹⁹ Unotungamira vapristi kuenda vasina chiro, nokunyisa vanesimba.

²⁰ Unonyaradza kuereketa kwevanogondeka, nokutora ungwaru hwevanhu vakuru.

²¹ Unodurura kushoorwa padera pevatongi, nokudusa bhande nevane simba revakagwinya.

²² Unobudisa zvakadzama kubva muchidima, echiunzazve chidima chakakura mukujeka.

²³ Unoita kuti madzinza awande, zvino unoaparadza; unowanza madzinza, unoaendesa kure.

²⁴ Unodusa kuzwisisa kubva kuvatungamiriri vevanhu venyika, nokuvaita kuti vanzerereke mushango apo pasina njira.

²⁵ Vanoambamira muchidima vasina kujeka; unovaita kuti vathethereke kudai ngechiradza.