Jobe 10 - Bhaibheri Rakachena muChindau

¹ Mweya wangu waremba ngokupona kwangu; ndinozoronza pamhene ngedambudziko rangu; ndinozoereketa ngokushononwa kwomweya wangu.

² “Ndinozoronza kuna Mwari kuti, Usandirasha; ndionese kuti ngenyi wechiphikisana neni.”

³ Unoona chakanaka here kutambudza, kushoora mushando wenyara dzako, nokuda mazano evakashata?

⁴ Unemadziso enyama here? Unoona here kudai ngezvaanoona munhu?

⁵ Mazuva ako akadai ngemazuva omunhu here nokuti makore ako akadai ngemakore omunhu here,

⁶ kuti iwewe unobvunzisisa kushata kwangu, nokutsvakisisa chishaishi changu,

⁷ kunyazwi wechizia kuti andina kushaisha, akuna naumwe ungandinunura kubva munyara yako?

⁸ Nyara dzako dzakandiumba nokundiita; nazvino unokunukuka iwewe kundiparadza.

⁹ Karakadza kuti iwewe wakandiumba kudai ngedongo; newe unozondihwirinzazve here mubukuta?

¹⁰ Auzi kundidurura here kudai ngomukaka nokundikoresa kudai ngomukaka wechiizi?

¹¹ Iwe wakandipfekesa ngeganda nenyama, wakandiruka ngemagodo nemidzira.

¹² Wakandipa kupona nenyasha dzinorudo, nokungwarira kwako kwakaponesa mweya wangu.

¹³ Izvi zviro wakazvifisha mumwoyo mwako; ndinozia kuti izvi zviri kuda kwako.

¹⁴ Kudai ndechishaisha, unondiona, newe auzondirekeri kubva mukushaisha kwangu.

¹⁵ Kudai ndiri wakashata, hezvo kwendiri! Kudai ndiri wakarurama, andingakoni kumirudza soro rangu, ngokuti ndakazara ngokutsverudzwa nokuringira padera pekutambudzika kwangu.

¹⁶ Kushinga kudai ngemhondoro iwewe unondivhima; unophindazve kuita mishamiso kundirwisa.

¹⁷ Newe unomusirira zvapupu zvako kundiitira ndaa, unowanza ushungu hwako kwendiri; unounza hondo itsva kundirwisa.

¹⁸ Ngenyi iwewe wakandibudisa kubva mundani? Ndingadai ndakafamwo, pasina nedziso raiya randiona,

¹⁹ ndaizodai ngouwo usikazi kutongoapo, wakatwarwa kubva mundani kuenda kuiba.

²⁰ Mazuva okupona kwangu aasiri mashomani here? Ndisiye ndega, kuti ndione kuembedzerwa kadoodoko

²¹ ndisati ndaenda apo pendisikazopetuki, kunyika yechidima neyebvute rokufa,

²² kunyika yechidima chakaita musheyareya, kusina zvakarongedzwa, apo kujeka kwakadai ngechidima.