Jer. 9 - Bhaibheri Rakachena muChindau

¹ O kudai soro rangu raiya chinyuka chemvura, nemadziso angu aiya chinyuka chemasodzi, kuti ndichemere masikati nousiku vakaurawa vevanhu vangu varombo!

² O kudai ndaiya nendau yokugara yevahambi murubaya, kuti ndisiye vanhu vangu, ndibve kwevari! Ngokuti veshe vaombi nembungano yevachengedzeri.

³ “Vanokunga rurumi rwavo kudai ngouta kufura manyepo: haiwa ngegwinyiso revanonyisa ndiro munyika. Ngokuti vanobva mukushata kuenda mukushata, navo avandizii,” unoronza Mambo Mwari.

⁴ “Ngwarai, umwe ngaumwe, muakirwana wake, musagonda kunyazwi ngouri mukoma; ngokuti vakoma veshe vanozopambirana, nomuakirwana weshe unozohamba kudai ngomureyi.

⁵ Umwe ngaumwe unochengedzera muakirwana wake, apana naumwe unoereketa gwinyiso; vakadzidzisa ndimi dzavo kuereketa manyepo; vanoita zvakashata navo vakaremba yaamho kuti vatenderuke.

⁶ Ugaro hwenyu huri pakati pokuangiridzwa padera pokuangiridzwa, kuchengedzerwa padera pokuchengedzerwa. Vanoramba kundizia,” unoronza Mambo Mwari.

⁷ Ndizvo izvi zvinoronza, Mambo Mwari wehondo, “Ringira, ndinozovanyungurusa nokuvaedza, ngokuti ndingaitenyi ngendaa yevanhu vangu?

⁸ Rurumi rwavo rwakadai ngomusee unouraya; runoereketa manyepo kubudikidza ngomuromo. Umwe ngaumwe unoereketa mazwi akanaka kumuakirwana wake, asi mumwoyo mwake unoronga kumuhwarira.

⁹ Andizovaorori here ngendaa yeizvi zviro?” Unoronza Mambo Mwari. “Andizounzidziri here dzinza rakadai ngeiri?”

¹⁰ “Ndinozochema nokubonda ngendaa yemitunhu, nokutsumba ngendaa yemafuro omushango, ngokuti aparadzwa kuti pasaanomunhu ungahamba ndimwo, nokurira kwen'ombe akuzwiki; zveshe shiri dzomudenga nemhuka zvakatiza, zvaenda.”

¹¹ “Ndinozoita kuti Jerusarema riite murwi wematongo, nebako rezvikara zvinotyisa; ndinozoita kuti madhorobha aJudha aite rubaya, pasina unogaremwo.”

¹² “Ndiani wakangwara, ungazwisisa ichi? Ndiani zve uwo kwaari muromo waMambo Mwari wakaereketa kuti azvidaidzire? Ngenyi nyika yechipedzwa yechiitwa matongo kudai ngerubaya, kuti kusaapo naumwe unopinda ngoumwo?”

¹³ Mambo Mwari unoronza kuti, “Ngokuti vakasiya mipango yangu yendakavapa, avazi kupurutana izwi rangu; avazi kuhamba kudai ngokupanga kwangu.

¹⁴ Asi vakateera kukonza kwomwoyo yavo; vakateera vanaBhaari, izvo zvevakadzidziswa ngemadzibaba avo.”

¹⁵ Ndizvo izvi zvinoronza Mambo Mwari wehondo, Mwari waIsuraeri: “Ringira, ndinopa ava vanhu kudya kwechisimwa chinovava, ndechivapa mvura inoukaira kuti vamwe.

¹⁶ Ndinozovaparadzira pakati pemadzinza, awo asikazi kuziikanwa kwevari nokuti kumadzibaba avo; ndinozotumira shoti kuvateera metsa ndivapedze.”

Vanhu veJerusarema Vanochemera Kudetserwa

¹⁷ Ndizvo izvi zvinoronza Mambo Mwari wehondo, “Pinimidzai, mudaidze madzimai okuchema kuti auye; daidzai madzimai ngwazi dzokubonda kuti auye.”

¹⁸ “Ngavakasire kuuya kuti vatiitire chiriro, kuti masodzi awe kubva kumadziso edu, netsiyo dzedu dzipopome mvura.”

¹⁹ Ngokuti izwi rokuchema rinozwika richibva Zioni, “Kuparadzwa kwetaitirwa! Tatsverudzwa kakurutu, ngokuti takasiya nyika, ngokuti vapwanyira pashi ugaro hwedu.”

²⁰ “Izwai, O madzimai, izwi raMambo Mwari, nzee dzenyu ngadzizwe izwi romuromo wake; mudzidzise vanasikana venyu kubonda, neumwe ngaumwe ngaadzidzise muakirwana wake chiriro.

²¹ Rufu rwauya kumafasitera edu, kwapinda mungome dzedu, kugura vana kubva mumapato, nemajaha kubva kumadariro.

²² Ereketa! Izvi ndizvo zvinoronza Mambo Mwari kuti, ‘Miiri yevanhu inozowa yechifa kudai ngedisa murubaya, kudai ngemitsonzoti inosara sure kwomucheki, akuna unozoiunganidza.’ ”

²³ Izvi ndizvo zvinoronza Mambo Mwari, “Munhu wakangwara asadziganzisa ngoungwaru hwake, munhu unesimba asadziganzisa ngesimba rake, munhu mupfumi asadziganzisa ngoupfumi hwake.

²⁴ Asi iye unodziganzisa ngaadziganzise ngeizvi, kuti unozwisisa nokundizia, kuti ndini Mambo Mwari; ndinoita ngenyasha dzinorudo, kutonga kwakanaka nokururama munyika; ngokuti ndinodakara muneizvi zviro,” unoronza Mambo Mwari.

²⁵ “Ringirai, mazuva ngegwinyiso anouya,” unoronza Mambo Mwari, “Apo pendinozoorora avo veshe vakachekwa kwega ganda repamberi:

²⁶ Egipite, Judha, Edhomu, vana vaAmoni, Moabhi, naavo veshe vanoparwa masoro avo, naavo vanogara murubaya. Ngokuti madzinza aya eshe aazi kuchekwa, nemhatso yeshe yaIsuraeri aizi kuchekwa mumwoyo.”