Jer. 8 - Bhaibheri Rakachena muChindau

¹ “Ngouwo mukuwo,” unoronza Mambo Mwari, “Vanozobudisa mumaiba magodo emadzimambo aJudha, magodo evatongi, evapristi, evaprofeti, neeavo vamweni vanogara Jerusarema.

² Anozoparadzirwa pamberi pezuva, nepemwedzi nepehondo yeshe yomudenga, izvo zvevakada nokushandira, zvevakateera, zvevakatsvaka, nezvevakadira; avazounganidzwi, nokuti kutsirwa; anozoita kudai ngemadisa padera pehope yenyika.

³ Rufu runozopinda kudikanwa kuno kupona ngaavo veshe vakasara, avo veiyi mhuri yakashata, varipo kundau dzeshe kwendakavadzingira kwedziri,” uronza Mambo Mwari wehondo.

Chishaishi noKuororwa

⁴ “Unozoti kwevari, unoronza izvi Mambo Mwari: Naapo vanhu vechiwa, avamiruki here? Kudai vechipauka, avapetuki here?

⁵ Zvino ngenyi ava vanhu veJerusarema vechihwirira sure mikuwo yeshe? Vanobatisisa kuchengedzera, vanoramba kupetuka.

⁶ Ndakapurutana ndikazwa, avaereketi zvakarurama; apana watenderuka kubva mukushata kwake echiti, ‘Ndakaitenyi?’ Umwe ngaumwe waenda kunjira yake kudai ngehachi rinorumba kupinda muhondo.

⁷ Kunyazwi usore unozia mukuwo wawo wakaemeswa; nenjia, konjana nemherepere dzinozia mukuwo wokuuya kwadzo; asi vanhu vangu avazii chiemeso chaMambo Mwari.

⁸ Munoita maronzerenyi kuti, ‘Takangwara, nomupango waMambo Mwari unesu?’ Ringira, apo chokwadi peni rokunyepera revanyori rakanyora manyepo.

⁹ Vanhu vakangwara vanozotsverudzwa, vanozopera simba nokutorwa; ringira vakaramba izwi raMambo Mwari; kungwaranyi kuri mukati mwavo?

¹⁰ Ndizvo ndinozopa vakadzi vavo kunevamweni, neminda yavo kune vanyisi, ngokuti umwe ngaumwe kubvira kumudoko metsa kunomukuru vakadzipira mukuemura; kubvira kumuprofeti metsa kumupristi, umwe ngaumwe unoita ngokuchengedzera.

¹¹ Ngokuti varapa ronda revanhu vangu ngokurekeredza vechiti, ‘Kunyarara, kunyarara,’ apo pasina kunyarara.

¹² Vakatseruka here, apo vakaita zvinyangadzo? Haiwa, avazi kutsveruka napadoko, avana kuzia kutsveruka. Ndizvo vanozowa pakati peavo vanowa; ngomukuwo wokuhambirwa kwavo vanozorigwa pashi,” unoronza Mambo Mwari.

¹³ “Naapo ndechida kuvaunganidza pamwepo,” unoronza Mambo Mwari: “Akuzoapo mavhini pamuvhini, nokuti maonde pamuonde, shakani rinozofota; neizvo zvendakavapa zvinozoparara kubva kwevari.”

¹⁴ “Tinogara takanyarara ngenyi? Unganidzanai pamwepo, ngatipotere mumadhorobha akashosherwa, tipereremwo; ngokuti Mambo Mwari, Mwari wedu, wakatitongera rufu, wakatipa mvura inoukaira kuti timwe, ngokuti takashaishira Mambo Mwari.

¹⁵ Takaringirira kunyarara, asi akuna chakanaka chakauya; mukuwo wokuporeswa, asi ringira, kutyisa kukurutu.

¹⁶ Kupheza kwemahachi kunozwika kubva Dhani; nyika yeshe inozungunyika ngebope rokupheza kwemikono yemahachi awo anesimba. Anouya kooparadza nyika nezveshe zviri mukati mwayo, dhorobha naavo vanogaramwo.”

¹⁷ “Ringira, ndinozotumira nyoka dzinoukaira pakati penyu, mabuura asikapeteki, dzinozomuruma,” Mambo Mwari unoronza.

Jeremia Unotambudzikira Vanhu vake

¹⁸ Kudakara kwangu kwapera, kutambudzika kwaa padera pangu, mwoyo wangu unodemera mukati mwangu.

¹⁹ Izwai, kuchema kwevanhu vangu varombo kubva munyika yakapamhama iri kuretu: “Mambo Mwari urimwo here mukati mweZioni? Mambo wake aarimwopi mukati mwake here?” “Vakanditsenesa ngenyi ngemiedzaniso yavo yakatsetswa, nezvimwari zvazvo zvipara zvisina shwiro?”

²⁰ “Kukukura kwapinda, zienza rapera, nesu atizi kuponeswa.”

²¹ Ngendaa yokuremadzwa kwevanhu vangu varombo, neni ndaremadzwa; ndinosvipa mwoyo; kushamiswa kwandibata.

²² Akuna mutombo wokuporesa here muGireadhi? Akuna murapi here apo? Ndizvo zvino vanhu vangu varombo avazi kutambiswa ngenyi?