Jer. 7 - Bhaibheri Rakachena muChindau

Jeremia Unochumaira muTemperi

¹ Izwi rakauya kunaJeremia rechibva kunaMambo Mwari rechiti,

² “Ema pamusiwo wemhatso yaMambo Mwari, udaidzire uripo izwi iri wechiti, ‘Izwai izwi raMambo Mwari, mweshe imwimwi vanhu vaJudha, imwimwi munopinda ngepamisiwo iyi koodira Mambo Mwari.’

³ Mambo Mwari wehondo, Mwari waIsuraeri, unoronza izvi, ‘Nasirisai njira dzenyu nezviito zvenyu, neni ndinozomuita kuti mugare pandau iyi.’

⁴ Musagonda aya mazwi okunyepa, anoti, ‘Iri ndiro temperi raMambo Mwari, temperi raMambo Mwari, temperi raMambo Mwari.’

⁵ Ngokuti kudai mwechinasira yaamho njira dzenyu nezviito zvenyu, ngegwinyiso kudai mwechiitirana zvakanaka umwe kuneumweni,

⁶ kudai musikatambudzi mupara, nherera neshirikadzi, nokuti kuparadza ngazi isina ndaa kundau iyi, nokuti kudai musikaateeri zvimwari zvimweni kudzikuwadza,

⁷ zvino ndinozogara nemwi mundau iyi, munyika yendakapa kumadzibaba enyu mhera nariini nariini.

⁸ Ringirai, munogonda mazwi okunyepa asikadetseri chiro.

⁹ Munozoba, kuuraya, kuomba, nokupika ngemanyepo, nokupishira midiro kunaBhaari mutombo unegwema rakanaka, nokuteera zvimwari zvimweni zvomusikazi kuzia,

¹⁰ nazvino munouya kooema pamberi pangu mumhatso iyi inodudzwa ngezina rangu mwechiti, ‘Takasunhurika’ kuti tiite izvi zveshe zvinonyangadza here?

¹¹ Iyi mhatso inodudzwa ngezina rangu yaita bako rembavha mukuona kwenyu here? Ringira, inini ndemene ndakazviona.” Unoronza Mambo Mwari.

¹² “Endai zvino kundau yangu yaiya muShiro, apo pendakaemesa zina rangu kuti rigare pakutanga, muone zvendakaita kweiri ngendaa yokushata kwevanhu vangu Isuraeri.

¹³ Zvino,” Mambo Mwari unoronza, “Ngokuti mwakaita izvi zviro zveshe, naapo pendakaereketa kwomuri ngokusikarekera, amuzi kundipurutana, naapo pendakamudaidza amuzi kupingura,

¹⁴ ndizvo ndinozoita kuiyi mhatso inodudzwa ngezina rangu, yomunogonda ndiyo, ndau yendakapa kwemuri nokumadzibaba enyu, kudai ngezvendakaita kuneShiro.

¹⁵ Neni ndinozomurasha kubva mukuona kwangu, kudai ngezvendakarasha hama dzenyu dzeshe, kunoti, mibarirwana yeshe yeEfuremu.

Kusikapurutana kweVanhu

¹⁶ “Asi iwewe, usakumbirira ava vanhu, usavachemera nokuti kuvakumbirira, usapota kwendiri, ngokuti andizokuzwi.

¹⁷ Auoni here izvo zvevanoita mumadhorobha aJudha nomumapato eJerusarema?

¹⁸ Vana vanotheza huni, madzibaba anobasa muriro nevakadzi vanokanya hlama kuita zvingwa kunavahosi vomudenga; navo vanodurura midiro yokumwa kunezvimwari zvimweni, kumusa ushungu hwangu.

¹⁹ Ndini here wevanomusira ushungu? Avadziitiri here kukangaidzwa kwavo?” Unoronza Mambo Mwari.

²⁰ Ndizvo izvi zvinoronza Mambo Mwari, Mwari kuti, “Ringirirai, kunyangadzwa kwangu noushungu hwangu zvinozodururwa padera peiyi ndau, padera pevanhu nepadera pemhuka, padera pemiti yomushango napadera pemichero yemavhu; hunozobaka, auzodzimwi.”

²¹ Unoronza izvi Mambo Mwari wehondo, Mwari weIsuraeri: “Tutsirai midiro yenyu yokupisha kumibairo yenyu, mudye nyama.

²² Ngokuti muzuva iro rendakaunza madzibaba enyu kubva munyika yeEgipite andizi kuereketa kwevari nokuti kuvapanga ngendaa yemidiro yokupisha nokuti yemibairo.

²³ Asi mupango uyu ndakavapanga ndechiti, ‘Purutanai izwi rangu, neni ndinozoita Mwari wenyu, nemwi munozoita vanhu vangu; muhambe kwega munjira yendinomupanga ndiyo, kuti zvimunakire.’

²⁴ Asi avazi kupurutana nokuti kukotamisa nzee dzavo, asi vakahamba mukuona kwemipinimidzo yemwoyo yavo yakashata, vakahwirira sure, avazi kuenda mberi.

²⁵ Kubvira zuva revakabuda madzibaba enyu kubva munyika yeEgipite metsa nyamashi, ndakatumira ngokuangira varanda vangu veshe, vaprofeti, kwevari mazuva eshe;

²⁶ asi avazi kupurutana nokuti kukotamisa nzee kwendiri, asi vakakonzisa mitsipa yavo. Vakaita zvakashata kupinda madzibaba avo.

²⁷ “Ndizvo unozoereketa aya mazwi eshe kwevari, asi avazopurutani kwouri. Unozodaidza kwevari asi avazokudairi.

²⁸ Unozoti kwevari, ‘Iri ndiro dzinza risikazikupurutana izwi raMambo Mwari, Mwari waro, naro arizi kuashira kupangirwa; gwinyiso rapera, ragurwa kubva kumiromo yaro.’

Zviito Zvakashata muBani reHinomu

²⁹ “Para bvudzi rako, urirashe kuretu; udzichemere uri pandau dziri padera, ngokuti Mambo Mwari wakaramba nokusiya mubarirwana unomusa ushungu hwake.

³⁰ Ngokuti vana vaJudha vakaita zvakashata mukuona kwangu,” unoronza Mambo Mwari; “Vakaemesa zvinyangadzo zvavo mumhatso yakadudzwa zina rangu, kuti vaisvipise.

³¹ Navo vanoangira kuaka ndau dzakakwirira dzeThofethi, iri mubani romukororo waHinomu, kuti vapishe vakororo nevanasikana vavo mumuriro; icho chendisikazi kupanga nokuti kupotera mumwoyo mwangu.

³² Ndizvo, ringirai, ngegwinyiso mazuva anozouya,” unoronza Mambo Mwari, “Apo peisikachazodudzwi kuti Thofethi, nokuti bani romukororo waHinomu, asi Bani roKuuraya, ngokuti vanozoikwa muThofethi, metsa kutamike nendau.

³³ Nemiiri yaava vanhu inozoita kudya kweshiri dzomudenga nekwezvikara zvomushango; pasina munhu unozodzityisa.

³⁴ Apapo ndizoita kuti izwi rokudakara neizwi rokudakadzwa, neizwi romukwambo, neizwi ramakhoti, zvipere mumadhorobha aJudha nomumapato eJerusarema, ngokuti nyika inozoita matongo.