Jer. 51 - Bhaibheri Rakachena muChindau

Kutongwa kweBhabhuroni kuChiri Mberi

¹ Mambo Mwari unoronza izvi: “Ringirai, ndinozomirudzira mweya womuparadzi kurwisa Bhabhuroni, nevanogara muKharadhea,

² neni ndinozotumira varudzi kuBhabhuroni navo vanozorirudza. Navo vanozobudisa zveshe kubva munyika yaro apo pevanouya koorirwisa, kubva kumarutii eshe; ngezuva rokutambudzika.

³ Unofura ngeuta asatenderwa kukwanya uta hwake nokuti, kupfeka bhachi rake resimbi. Musaponesa majaha aro; urayai yeshe hondo yaro.

⁴ Vanozowa pashi vaurawa munyika yevaKharadhea, nokubaiwa mumapato aro.

⁵ Ngokuti Isuraeri naJudha avazi kusiiwa ndiMwari wavo, Mambo Mwari wehondo, kunyazwi nyika yavo yakazadzwa ngokushaisha pamberi peUmwe Wakachena waIsuraeri.

⁶ Tizai mubude kubva pakati peBhabhuroni, nomunhu weshe ngaadziponese! Musaparadzwa ngendaa yokushata kwaro, ngokuti uyu mukuwo wokuunzidzira waMambo Mwari; unoriunzidzira zverakaita.

⁷ Bhabhuroni raiya tsani yomukore munyara yaMambo Mwari, yakaita kuti nyika yeshe iraradze; madzinza akamwa vhini raro, ndizvo madzinza anopenga.

⁸ Bhabhuroni rawa nokuparadzwa ngokukasira; boorerai ngendaa yaro! Unzai mutombo wokurapa maronda aro, pamweni ringaponeswa.

⁹ Takaedza kuponesa Bhabhuroni, asi aripori. Rirekerenyi, mutiendere umwe ngaumwe wedu aende kunenyika yake; ngokuti kutongwa kwaro kunoguma mudenga, nakwo kwamirudzwa kuguma mudenga mumakore.

¹⁰ “Mambo Mwari wabudisa kururama kwedu; uyai, ngatidaidzire muZioni mushando waMambo Mwari, Mwari wedu.

¹¹ “Rodzerai misee! Zadzai chikomwe! Mambo Mwari wamusa mweya wemadzimambo evaMedhe, ngokuti biningidzo rezano rake ngeBhabhuroni kuriparadza; ngokuti ndikwo kuunzidzira kwaMambo Mwari kuunzidzira ngendaa yetemperi rake.

¹² Emesai mujeki pamarukumbati eBhabhuroni, gwinyisai kurinda, emesai varindi, emesai vahwariri; ngokuti Mambo Mwari wakaita zveshe kuronga nokuita zvaakaereketa ngevanogara Bhabhuroni.

¹³ Iwewe unogara pamvura yakawanda, noupfumi hwakawanda, magumo ako aguma, tambo yokupona kwako yadamburwa.

¹⁴ Mambo Mwari wehondo wakadzipikira pachake echiti, ‘Ngegwinyiso ndinozokuzadza ngavarwi vehondo vakadai ngemutanda wendongwe, navo vanozomirudza kudaidzira kwokunyisa padera penyu.’

Nduyo yoKukudza kunaMwari

¹⁵ Ndiye wakasika nyika ngesimba rake, uwo wakaemesa nyika ngoungwaru hwake, nokuzwisisa kwake wakatambanudza matenga.

¹⁶ Naapo paanoereketa izwi rake, riripo bope rakadai ngeremvura mumatenga, naye unoita kuti mhute ipwititike kukwira kubva kumagumo enyika. Unonasira mheni dzemvura, echiunza dutu kubva mudura rake.

¹⁷ Munhu weshe ibenzi naye aana ruziyo; mupfuri womukore weshe unotsverudzwa ngomuedzaniso wake; ngokuti miedzaniso yake yakanyunguruswa ngeyokunyepera, nayo aifemi mukati mwayo.

¹⁸ Aina shwiro, mishando yokuchengedzera; pamukuwo wokuororwa kwayo inozoparadzwa.

¹⁹ Chikoaniswa chaJakobe achizi kudai ndiyo; ngokuti uwo ndiye muiti wezviro zveshe, naIsuraeri ndiro dzinza renhaka yake; Mambo Mwari wehondo ndiro zina rake.”

Hamera yaMambo Mwari

²⁰ Iwewe uri hamera yangu yokurwa ndiyo, nendonga yangu yehondo: ndiwe ndinoputsa madzinza kuita zvigurwa; ndiwe ndinoparadza umambo;

²¹ ndiwe ndinopwanya hachi nomugadhi waro; ndiwe ndinopwanya ngoro nomuhambisi wayo;

²² ndiwe ndinopwanya mwamuna nomukadzi; ndiwe ndinopwanya musharuka nomurumbwana; ndiwe ndinopwanya jaha nomusikana;

²³ ndiwe ndinopwanya muushi nomutanga wake; ndiwe ndinopwanya murimi nejoka rake ren'ombe; ndiwe ndinopwanya vatongi nevanoteera sure kwavo.

Kuororwa kweBhabhuroni

²⁴ “Ndinozohwirinzira Bhabhuroni navo veshe vagari veKharadhea, pamberi pemadziso ako emene ngokushata kwavo kweshe kwevakaita muZioni,” unoronza Mambo Mwari.

²⁵ “Ringira, ndinorwisana newe, O dunhu rinoparadza,” unoronza Mambo Mwari; “Iro rinoparadza nyika yeshe; ndinozotambanudza nyara kurwisana newe, ndikumburumbudze kubva kumapuwe, nokukuita kuti udai ngomutunhu wakapishwa.

²⁶ Apana buwe rinozotorwa kubva kwouri repakhona, apana buwe retsikiro; unozoita dongo mhera nariini,” unoronza Mambo Mwari.

²⁷ “Emesai mujeki munyika, ridzai gwama pakati pemadzinza; nasirirai madzinza kurwa naro, ridaidzirei umambo kurwa naro, Ararati, Mini, neAshikenazi; emesai nduna kurwa naro, unzai mahachi akwire akadai ngendongwe dzinoparadza.

²⁸ Nasirirai madzinza kurwa hondo naro, madzimambo eMedhe, nevanoteera sure kwavo, nenyika dzeshe dzoumambo hwavo.

²⁹ Nyika inohuta nokundengendeka, ngokuti biningidzo raMambo Mwari rokurwisa Bhabhuroni zvinozoitika, kuti nyika yeBhabhuroni iite matongo isina unogaramwo.

³⁰ Ngwazi dzeBhabhuroni dzarekera kurwa, dzagara mumarusvingo adzo; simba radzo rakapera; dzaita kudai ngevakadzi; mhatso dzaro dzapishwa ngomuriro, mipiningidzo yaro yaguka.

³¹ Murumbi umwe unorumba kooshongana noumweni, nomutumwa umwe kooshongana noumweni, kuziisa mambo weBhabhuroni kuti dhorobha rake ratorwa kubva kumagumo kuenda kumagumo:

³² mazambuko atorwa, tsanga vadzipisha ngomuriro, varwi vehondo vakarudzwa.”

³³ Ngokuti izvi ndizvo zvinoronza Mambo Mwari wehondo, Mwari waIsuraeri kuti, “Mwanasikana weBhabhuroni wadai ngembuwa ngomukuwo wokupura weinotsikwatsikwa, asi mukuwo mudoko nomukuwo wokucheka unozomugumira.”

³⁴ “Nebhukhadhineza mambo weBhabhuroni wandidya, wakandipwanya, wandiita kuti ndidai ngechidziyo chisina chiro, wandimedza kudai ngewamedzwa ngemhuka inotyisa kakurutu; wazadza ndani yake ngezvakanaka zvangu, wandirutsa.”

³⁵ Vagari veZioni vanozoti, “Kuremadzwa kwakaitwa kunyama yangu ngakuwe padera peBhabhuroni;” neveJerusarema vanozoti, “Ngazi yedu ngaiwe padera paavo vagari veKharadhea.”

Mambo Mwari Unozodetsera Isuraeri

³⁶ Ndizvo izvi zvinoronza Mambo Mwari: “Ringira, ndichakuereketera ndaa yako, nokukuunzidzira. Ndinozoomesa ruandhle rwake, nokuita kuti zvinyuka zvake zviome.

³⁷ NeBhabhuroni rinozoita murwi wematongo, nebako remakava, nokuita chiro chinoshamisa, nokushoorwa, nokuridzirwa murudzi risina unogaramwo.

³⁸ Veshe pamwepo vanorira kudai ngemhondoro; vanobhonga kudai ngevana vemhondoro.

³⁹ Naapo vamusirirwa ndinozovanasirira dhiri, nokuita kuti vararadze, kuti vadakare, vaate hope dzisikagumi, navo vasikamuki,” unoronza Mambo Mwari.

⁴⁰ “Ndinozovadzasa pashi kudai ngevana vemakwai, vanodzaswa koourawa, kudai ngemagondohwe nemagotokoto.

RaMangwani reBhabhuroni

⁴¹ “Sheshakhi raita matorerwenyi! Kukudzwa kwenyika dzeshe kwaita magumirenyi! Bhabhuroni raita chiro chinotyisa pakati pemadzinza ngenjiranyi!

⁴² Ruandhle rwafashukira padera peBhabhuroni; rwafukidzwa ngamafungo arwo akawanda.

⁴³ Madhorobha aro aita chiro chinotyisa, nyika yokuoma norubaya, nyika isikagarwi ngomunhu, akunazve naumwe wevakororo vevanhu unopindamwo.

⁴⁴ Ndinozoorora Bheri muBhabhuroni, ndechiita kuti abudise pamuromo wake izvo zvaakatangurira. Madzinza aachazounganizve pamwepo kwaari; rukumbati rweBhabhuroni rwawa.

⁴⁵ Budai kubva mukati mwaro, vanhu vangu. Mudziponese kubva kuushungu hunotyisa hwaMambo Mwari umwe ngaumwe wenyu.

⁴⁶ Mwoyo yenyu isademera, nokuti kutyiswa ngeshoko rinozwika munyika; gore rimwe shoko rimwe rinouya, gore rinoteera shoko rimweni, shoko rokugebenga munyika, neromutongi echirwa nomutongi.

⁴⁷ Ndizvo, ringira, mazuva anouya, apo pendinozoorora miedzaniso yakatsetswa yeBhabhuroni; nenyika yaro yeshe inozotsverudzwa, veshe vakaurawa varo vanozowa pakati paro.

⁴⁸ Zvino denga nenyika nazvo zveshe zviri mukati mwazvo zvinozoemba ngokudakara padera peBhabhuroni; ngokuti vaparadzi vanozouya koorirwisa vechibva dera,” unoronza Mambo Mwari.

⁴⁹ “Bhabhuroni rinosisira kuwa ngendaa yevakaurawa vaIsuraeri, kudai ngevakaurawa venyika yeshe vawa ngendaa yeBhabhuroni.

Izwi raMwari kuvaIsuraeri Vari muBhabhuroni

⁵⁰ “Imwimwi mwakapona shoti, endai, musazungaira! Karakadzai Mambo Mwari muri munyika kuretu, Jerusarema ngariuye kumikarakadzo yenyu.

⁵¹ Tatsveruka, ngokuti tazwa zvituko; kutsverudzwa kwafukidza hope dzedu, ngokuti vapara vaguma kundau dzakacheneswa dzemhatso yaMambo Mwari.

⁵² Ndizvo, ringira, mazuva anouya,” unoronza Mambo Mwari, “Apo ndinozoorora miedzaniso yaro; vakaremadzwa vanozogomera munyika mwaro mweshe.

⁵³ Kunyazwi Bhabhuroni rikanyakwira mudenga, nokunyazwi rikanyagwinyisa urebu hwepanesimba raro, kubva kwendiri vaparadzi vachauya kweriri,” unoronza Mambo Mwari.

Kuputswa Kuchauya zvekweBhabhuroni

⁵⁴ “Purutanai kuchema kunobva Bhabhuroni! Kuparadzwa kukuru kunobva kunyika yevaKharadhea!

⁵⁵ Ngokuti Mambo Mwari unoparadza Bhabhuroni, nokunyaradza izwi rokupota kwaro. Mafungo ayo anoungumira kudai ngemvura yakawanda nebope rokupota kwavo rinozwika.

⁵⁶ Ngokuti muparadzi waguma kurwa naro, kurwa neBhabhuroni; ngwazi dzaro dzatorwa, uta hwadzo hweshe hwagurwa; ngokuti Mambo Mwari ndiMwari wokuunzidzira, ngegwinyiso unozounzidzira.

⁵⁷ Ndinozoita kuti makota aro araradze, nevakangwara varo, vatongi varo, nduna dzaro, nengwazi dzaro; vanozoata hope dzisikagumi, avamuki,” unoronza Mambo, uwo zina rake ndiMambo Mwari wehondo.

⁵⁸ Izvi ndizvo zvinoronza Mambo Mwari wehondo: “Marukumbati akapamhama eBhabhuroni anozoputsirwa pashi, nemisiwo yaro yakareba inozopishwa ngomuriro. Vanhu vanozodzirembesa pachavo pasina chiro, nemadzinza anozodzirembesa pachawo kushandira muriro.”

Izwi raJeremia Rinotumirwa Bhabhuroni

⁵⁹ Izwi iro raakapanga Jeremia muprofeti kunaSeraia mukororo waNeria mukororo waMahiseia, apo paakaenda Bhabhuroni naZedhekia mambo waJudha mugore rechirongomuna rokutonga kwake. Seraia waiya nduna huru.

⁶⁰ Jeremia wakanyora mubhuku rinopetwa kweshe kushata kwaizouya padera peBhabhuroni, mazwi aya eshe akanyorwa ngendaa yeBhabhuroni.

⁶¹ NaJeremia wakati kunaSeraia, “Apo waguma Bhabhuroni, ona kuti wadzidza aya mazwi eshe,

⁶² newe unozoti, ‘O Mambo Mwari, iwewe pachako wakaereketa ngendaa yeiyi ndau, kuti uchaiparadza, kuti kusazoapo naumwe unosara kweiri, munhu nokuti mhuka, asi kuti inozoita matongo mhera nariini.’

⁶³ Naapo wapedza kudzidza iri bhuku unozosungira buwe kweiri nokuikandira pakati porwizi runozwi Yufratesi.

⁶⁴ Newe unozoti, ‘Izvi ndizvo zvinozoita Bhabhuroni rinozonzvaira kudai, arizomiruki, ngendaa yokushata kwendinounza padera paro. Vanozopera simba.’ ” Pano ndipo panogumira mazwi aJeremia.