Jer. 50 - Bhaibheri Rakachena muChindau

Kubatwa kweBhabhuroni

¹ Izwi raakaereketa Mambo Mwari ngendaa yeBhabhuroni, ngendaa yenyika yevaKharadhea kubudikidza ndiJeremia muprofeti:

² “Daidzirai pakati pevemadzinza, muteketese muemese mujeki; muteketese, musafisha. Ronzai kuti Bhabhuroni ratorwa, Bheri watsverudzwa, Merodhakhi wapedzwa simba. Miedzaniso yaro yokudira yatserudzwa; zvimwari zvaro zvapedzwa simba.

³ “Ngokuti dera kunouya dzinza koorwa naro, rinozoita kuti nyika yaro iite matongo, akuna naumwe unozogaramwo; zveshe vanhu nemhuka zvinozotizira kuretu.”

Kupetuka kwaIsuraeri

⁴ “Mumazuva awo nomunguva iyo,” unoronza Mambo Mwari, “Vanhu vaIsuraeri vanozouya, ivo nevanhu vaJudha pamwepo, vanozouya vechichema, apo vechitsvaka Mambo Mwari, Mwari wavo.

⁵ Vanozobvunza njira yeZioni nehope dzakaringireyo, vanozouya vechidzibatanidza pachavo munaMambo Mwari ngechitenderano chemhera nariini chisikazoriyarikanwi.

⁶ Vanhu vangu vaiya makwai akarashika; vaushi vawo vakaapausa, vakaatinhira kumitunhu, kuhamba kubva kudunhu kuenda kuchitunhu; variyarwa ndau yavo yokuzorora.

⁷ Veshe vakavaona vakavadya; nemagaa avo akati, ‘Atina ndaa, ngokuti vakashaishira Mambo Mwari, mafuro egwinyiso, Mambo Mwari, gonda remadzibaba avo.’

⁸ Tizai kubva muBhabhuroni, mubude kubva munyika yevaKharadhea, mudai ngemagotokoto anotungamirira mitanga.

⁹ Ngokuti, ringira, ndinozomirudza hondo, nokuiunza kuti irwise neBhabhuroni, chikwata chemadzinza makurutu anobva kunyika yedera; navo vanozofora pachavo kurwisa, kubva apo rinozotorwa. Misee yavo yakadai ngemisee yengwazi iyo isikapetuki isikazi kufura.

¹⁰ Kharadhea inozochakatwa; avo veshe vanoichakata vanozogutiswa,” unoronza Mambo Mwari.

Kuwa kweBhabhuroni

¹¹ “Kunyazwi munodakara, kunyazwi munodakadzwa, O vachakati venhaka yangu, kunyazwi munotomukira mudenga kudai ngetsiru rakora ngomwenje, nemwi munorira kudai ngemahachi akagwinya,

¹² mai venyu vanotsverudzwa kakurutu; iye wakamubara unozopera simba. Ringira, rinozoiita dzinza rokugumisira remadzinza, shango, nyika yakaoma, norubaya.

¹³ Ngendaa youshungu hwaMambo Mwari aizogarwi, asi inozoita matongo yeshe; weshe unozopinda ngepasinde peBhabhuroni unozoshamiswa, nokuridza murudzi ngemaronda aro eshe.

¹⁴ “Emai mundau dzenyu kutendenedza Bhabhuroni kurwa naro, imwimwi mweshe vakwanyi vouta; rifurei, musaposha, ngokuti rakashaishira Mambo Mwari.

¹⁵ Daidzirai kurwa naro kubva kumarutii eshe kuti, ‘Radzipira; matsikiro aro awa, marukumbati aro apwanyirwa pashi.’ Ngokuti uku ndikwo kuunzidzira kwaMambo Mwari: riunzidzirenyi; kudai ngezverakaita itai kudaro kweriri.

¹⁶ Gurai mukushi kubva muBhabhuroni, nouwo unoshandisa sikeyo panguva yokucheka; ngendaa yokutya shoti inoparadza veshe umwe ngaumwe unozopetuka kuvanhu vake, umwe ngaumwe unozotizira kunyika yake.

Kupetuka kwaIsuraeri

¹⁷ “VaIsuraeri vakadai ngegwai rinovhimwa rinorumbirirwa ngemhondoro. Pakutanga mambo weAsiria wakavadya, nepakugumisira Nebhukhadhineza mambo weBhabhuroni wakatsenga magodo avo.”

¹⁸ Ndizvo izvi zvinoronza Mambo Mwari wehondo, Mwari waIsuraeri: “Ringira, ndinozoorora mambo weBhabhuroni nenyika yake, kudai ngezvendakaorora mambo weAsiria.

¹⁹ Ndinozounzazve Isuraeri kumafuro ake, naye unozofura paKharmeri nomuBhashani, nomweya wake unozogutiswa padera pezvimitunhu zvaEfuremu nomuGireadhi.

²⁰ Mumazuva awo, nepamukuwo uwo,” unoronza Mambo Mwari, “Kushaisha kwaIsuraeri kunozotsvakiwa, napo apazooneki chiro, nezvishaishi zvaJudha, apana chiro chinozoonekapo; ngokuti ndinozovarekerera avo vendakasiya.

Kutonga kwaMambo Mwari padera peBhabhuroni

²¹ “Endai munyika yeMerathaimu, murwe nayo, murwise vagari vomuPhekodhi; muparadze, muuraye nowokugumisira wavo; muite zveshe kudai ngezvendakamupanga.

²² Bope rokurwa rinozwika munyika nokuparadzwa kukuru.

²³ Hamera yenyika yeshe yaita magurirwenyi nokuputswa! Bhabhuroni raita matongo ngenjiranyi pakati pemadzinza!

²⁴ Ndakakuteya ngomurau, newe watobatwa usati wazvizia, O Bhabhuroni; wakaoneka nokubatwa, ngokuti wakarwisana naMambo Mwari.

²⁵ Mambo Mwari wabeura ugaro hwendonga dzake dzokurwa, wabudisa ndonga dzoushungu hwake; ngokuti Mambo Mwari, Mwari wehondo, unawo mushando wokuita munyika yevaKharadhea.

²⁶ Uyai murwe naro kubva kumarutii aro eshe, beurai matura aro; muriunganidze kudai ngemirwi yezviyo, muparadze yaamho; musarisiira nachimwe charo.

²⁷ Urayai mikono yaro yeshe; ngaidzake koourawa. Ihehe kwevari! Zuva ravo raguma, mukuwo wokuunzidzirwa kwavo.

²⁸ “Izwai! Vanotiza nokupokonyoka kubva munyika yeBhabhuroni, kuuya koodaidzira mhere muZioni, yokuunzidzira kwaMambo Mwari, Mwari wedu, kuunzidzira temperi rake.

²⁹ “Unganidzai vanofura ngeuta kurwa neBhabhuroni, veshe vanokwanya. Akai matende kuritendenedza; musatendera naumwe kuti apokonyoke. Riunzidzirei kudai ngomushando waro; kudai ngezverakaita, itaiwo kudaro kweriri, ngokuti rakadzikudza pamberi paMambo Mwari, Wakachena waIsuraeri.

³⁰ Ndizvo majaha aro anozowa mumadariro, nevarwi vehondo varo veshe vanozoparadzwa ngeiro zuva,” unoronza Mambo Mwari.

³¹ “Ringirai, ndinorwisana newe, O unodzikudza,” unoronza Mambo Mwari, Mwari wehondo; “Ngokuti zuva rako raguma, nguva yendinozokuorora.

³² Unodzikudza unozopumhunwa nokuwa, akuna naumwe unozomumirudza; neni ndinozobasa muriro mumadhorobha ake, nawo unozopisha zveshe zvinomutendenedza.”

³³ Izvi ndizvo zvinoronza Mambo Mwari wehondo: “Vanhu vaIsuraeri nevanhu vaJudha vakatsikirirwa pamwepo; veshe vakavatora kuita hloko vakavabatisisa; vakaramba kuvasunhura.

³⁴ Muripiri wavo wakagwinya; Mambo Mwari wehondo ndiro zina rake. Unozonasa kupota ngendaa yavo, kuti azorodze nyika, asi kutambudza vanogara Bhabhuroni.”

³⁵ Shoti yaguma kurwisana nevaKharadhea, nokunaavo vanogara Bhabhuroni, nokumakota aro, nokuvanhu varo vakangwara, unoronza Mambo Mwari.

³⁶ Shoti kurwisa vanyepi, kuti vaite mapenzi! Shoti kurwisa ngwazi dzaro, kuitira kuti vaparadzwe!

³⁷ Shoti kurwisa mahachi aro, nokungoro dzaro, nokurwisa veshe varwi vevapara vanogara pakati paro; navo vanoita kudai ngavakadzi! Shoti kurwisa upfumi hwaro hweshe, kuitira kuti uchakatwe nokubiwa!

³⁸ Kuoma kurwisa ndwizi dzaro, kuitira kuti dziomeswe! Ngokuti inyika yemiedzaniso yakatsetswa, navo vanopenga ngendaa yemiedzaniso.

³⁹ “Ndizvo mhuka dzomushango dzinozogaramwo nemathika, nemhowani dzinozogaramwo; arichazogarwi mhera nariini, nokuti kugarwa ngemibarirwana yeshe.

⁴⁰ Kudai ngeapo Mwari paakapwanya Sodhoma neGomora nemadhorobha akatendenedza pasinde,” unoronza Mambo Mwari; “Ndizvo apana naumwe unozogaramwo, nokuti umwe ungauya kooakamwo.

⁴¹ Ringira, dzinza revanhu rinouya kubva dera, dzinza guru, nemadzimambo akawanda anomuswa kubva kumarupande enyika ari kuretu.

⁴² Vanofura ngeuta nemikhondo, vanoushungu, avana nyasha. Bope ravo rinoungumira kudai ngoruandhle, vanogadha mahachi, veshe vakadzinasirira umwe ngaumwe, kudai ngengwazi dzinoenda koorwa, kurwa newe, O mwanasikana weBhabhuroni.

⁴³ Mambo weBhabhuroni wakazwa mashoko ndivo nenyara dzake dzakapera simba; kurwadziwa kwakakura kwakamubata, kurwadziwa kwakadai ngekwomukadzi uri mukubereka.

⁴⁴ “Kudai ngemhondoro inouya yechibva mugwasha reJorodhani kuuya kumafuro akasvipira, ndinozokasira kuvadzinga kubva kweriri; neni ndinozoemesa padera paro kunyazwi ndiani wendingatsanangura. Ngokuti ndiani wakadai ndini? Ndiani ungandigurira mukuwo? Ndiani muushi uwo ungakona kuema pamberi pangu?

⁴⁵ Ndizvo izwai urongwa hwaMambo Mwari, uhwo hwaarongera Bhabhuroni, nemabiningidzo akaita kuti arongere nyika yevaKharadhea: Ngegwinyiso vadoko vomutanga vanozokweerwa kuretu; ngegwinyiso mafuro avo anozotyisa ngendaa yavo.

⁴⁶ Ngebope rokubatwa kweBhabhuroni nyika inozohuta, nokuchema kunozozwika pakati pemadzinza.”