Jer. 5 - Bhaibheri Rakachena muChindau

Chishaishi cheJerusarema

¹ “Rumbai imwimwi mberi nesure mumapato eJerusarema, ringirai peshe zvino, muzie! Mutsvake mundau dzaro dzakapamhama, kuti mungaona munhu umwe here unoita zvakanaka, echitsvaka gwinyiso, kuti ndirirekerere.

² Kunyazwi vanoti, ‘Kudai ngezvaanopona Mambo Mwari,’ asi vanopika ngokunyepa.”

³ O Mambo Mwari, madziso ako aatsvaki gwinyiso here? Wavachaya, asi avazi kuzwa kurwadziwa; iwewe wavapedza, asi vakaramba kupangwa. Vakaita kuti hope dzavo dzikonze kupinda buwe; varamba kupetuka sure.

⁴ Zvino ndakati, “Ava ndivo vega varombo, mapenzi; ngokuti avazii njira yaMambo Mwari, mupango waMwari wavo.

⁵ Ngandiende kuvakuru, ndierekete navo; ngegwinyiso vanozia njira yaMambo Mwari, mupango waMwari wavo.” Asi ava veshe vakatodzana vakagura joka, vakadambura zvisungo.

⁶ Ndiyo ndaa mhondoro inobva mugwasha inozovauraya, negava romushango rinozovaparadza. Khamba rinohwarira madhorobha avo; weshe unobudamwo unozobaurwa kuita zvigurwa, ngokuti zvishaishi zvavo zvakawanda, nokuhwirira kwavo sure kwakanyanya.

⁷ “Ndingakuita marekererenyi? Vana vako vandisiya, vechipika ndivo vasiri Mwari akadi. Naapo ndavagutisa yaamho, vakaomba, vechidziunganidza ngezvikwata mumhatso dzeuhure.

⁸ Vakanasa kugutiswa yaamho kudai ngemadhuna emahachi akakodzwa, umwe ngaumwe wavo echivevedza sure kwomukadzi womuakirwana wake.

⁹ Andizovaorori ngeizvi here?” Unoronza Mambo Mwari. “Mweya wangu auzounzidziri here kudzinza rakadai ngeiri?

¹⁰ Kwirai ngomumisara yemivhini mwechiriparadza yaamho asi musapedza reshe; dusai matai aro, ngokuti aasiri aMambo Mwari akadi.

¹¹ Ngokuti mhatso yaIsuraeri nemhatso yaJudha vakaita ngokusikagondeka kwendiri,” unoronza Mambo Mwari.

Mambo Mwari Unoramba Isuraeri

¹² Vakaereketa manyepo ndiMambo Mwari vechiti, “Aazoiti chiro. Kushata akuzouyi padera pedu, atizooni shoti nokuti nzara.”

¹³ Vaprofeti vanozodai ngedutu, ngokuti izwi ariri mwevari akadi. Izvi ndizvo zvinozoitika kwevari.

¹⁴ Ndizvo izvi zvinoronza Mambo Mwari wehondo, “Ngokuti vaereketa iri izwi, ringira, ndinoita zvino kuti mazwi angu ari mumuromo wako aite kudai ngomuriro, nevanhu ava kuti vadai ngehuni nomuriro unozovapisha.”

¹⁵ “Ringira, ndinounza padera pako dzinza rinobva kuretu, O mhatso yaIsuraeri” unoronza Mambo Mwari. “Idzinza rinogara, riri dzinza rekaretu, dzinza rousikazii rurumi rwaro, auzwi cherinoereketa.

¹⁶ Chikomwe chavo chakadai ngeiba rakabeuka; veshe ingwazi dzehondo.

¹⁷ Vanozodya zvakakukurwa zvako nechingwa chako, vanozodya vakororo vako nevanasikana vako; navo vanozodya makwai ako nen'ombe dzako; vanozodya mavhini ako nemaonde ako; vanozoparadza ngeshoti madhorobha ako akashosherwa, ounogonda ndiwo.

¹⁸ Asi kunyazwi mumazuva awo, andizomupedzi mweshe,” unoronza Mambo Mwari.

¹⁹ “Naapo vanhu vako vanozoti, ‘Ngenyi Mambo Mwari, Mwari wedu, echiita zviro zveshe izvi kwetiri?’ Ngouwo mukuwo unozoti kwevari, ‘Kudai ngezvemwakandisiya nokudira zvimwari zvipara munyika yenyu, ngokudaro munozoshandira vapara munyika isiri yenyu akadi.’ ”

Mambo Mwari Unonyowedza Vanhu Vake

²⁰ Ronza izvi mumhatso yaJakobe, udaidzire muJudha wechiti,

²¹ “Izwai izvi, O vanhu mapenzi, musina kuzwisisa, munemadziso, asi amuoni, munenzee, asi amuzwi.

²² Amundityi here?” Unoronza Mambo Mwari; “Amuhuti here pamberi pangu? Ndakaisa jecha kuti riite muganu woruandhle, ngechironzo chemhera nariini, kuti rusazoudarika; kunyazwi mafungu arwo anorichaya aanyisi, kunyazwi anotinhira, aakoni kudarika.

²³ Asi ava vanhu vanomwoyo wakaoma nokumukira; vakapauka, vaenda.

²⁴ Avaronzi mumwoyo mwavo kuti, ‘Ngatitye Mambo Mwari, Mwari wedu, uwo unonaisa mvura, yeshe yokutanga neyokuteerera ngenguva yayo; unotiemesera mavhiki okukukura.’

²⁵ Kushata kwenyu kwapetudza izvi kuretu, nezvishaishi zvenyu zvamurambidzira zviro zvakanaka.

²⁶ Ngokuti vakashata vanooneka pakati pevanhu vangu; vanotora zviro zvevamweni, vanoteya chirimbana vechibata vanhu.

²⁷ Kudai ngesekete rakazara ngeshiri, ngokudaro mhatso dzavo dzakazara ngokuchengedzera; ndizvo vaita vakuru, nokuita makurudza.

²⁸ Vaita vakakora, vanon'anikira, vanokurira vakawanda, avazii chipimo chemishando yakashata; avatongi ngokururamisa ndaa yenherera, kuti ibudirire, avarwiri maruramiro evarombo.

²⁹ “Andizovaorori ngeizvi here?” Unoronza Mambo Mwari. “Mweya wangu auzoshunguriri here dzinza rakadai?

³⁰ Chiro chinoshamisa nechinotyisa chaitwa munyika:

³¹ Vaprofeti vanoprofeta manyepo nevapristi vanotonga vechipangwa ngevaprofeti; navanhu vangu vanoda kuti zvidaro; asi munozoitenyi kumagumo azvo?”