Jer. 49 - Bhaibheri Rakachena muChindau

Kutonga kwaMambo Mwari padera paAmoni

¹ Izvi ndizvo zvinoronza Mambo Mwari ngendaa yaAmoni: “Isuraeri aana vakororo here? Aana vanogara nhaka yake here? Ngenyi zvino Mirikhomu echigara nhaka yaGadhi, nevanhu vake vechigara nhaka mumadhorobha ake?

² Ndizvo, ringira, mazuva anouya,” unoronza Mambo Mwari, “Apo pendinozoridza kuti mhere yokurwa hondo nedhorobha reRabha revaAmoni; rinozoita murwi wezvakaparadzwa, nemaguta aro anozopishwa ngomuriro; naapo Isuraeri unozotora nhaka kubva kuneavo vakamutorera nhaka,” unoronza Mambo Mwari.

³ “Boorera, O Heshibhoni, ngokuti Ai raparadzwa. Chemai yaamho, O maguta aRabha! Pfekai machira emasaka; chemai, nokudzichaya ngemboma pachenyu! Ngokuti Mirikhomu unozopinda muubatwa, pamwepo nevapristi navatongi vake.

⁴ Ngenyi wechiganza mukugwinya kwako? Kugwinya kwako kunokorera, O mwanasikana usina gonda. Iwewe wakagonda upfumi hwako wechiti, ‘Ndiani unozondirwisa?’

⁵ Ringira, ndichaunza kutyisa padera penyu,” unoronza Mambo Mwari, Mwari wehondo, “Kubva kune veshe vanomutendenedza; nemwi muchaparadzwa mweshe umwe ngaumwe; akuna naumwe unozounganidza avo vanopepesheka.

⁶ “Asi ngesure kweizvi ndinozopetudzazve vakabatwa veAmoni,” unoronza Mambo Mwari.

Kutonga kwaMambo Mwari padera paEdhomu

⁷ Izvi ndizvo zvinoronza Mambo Mwari wehondo “Amuchina ungwaru here muThemani? Kupanga kwapera kubva kunevanemazano here? Ungwaru hwaro hwapera here?

⁸ Tizai, petukai, dzakai pashi, imwimwi vagari veDhedhani! Ngokuti ndinozounza kutambudzika kukuru kwaEsau padera pake, pamukuwo apo pendichamuorora.

⁹ Kudai vaunganidzi vemavhini vechiuya kwouri, avazosii hwarakwatwa here? Nokuti dai mbavha dzechiuya usiku, adzizotori zvakadzikwanira here?

¹⁰ Asi inini ndakaita kuti Esau ati buzu, ndakaduhumura ndau dzake dzakafishika, naye aakoni kudzihwadza pachake. Mibarirwana yake yaparadzwa, hama dzake nevaakirwana vake, naye emene apachina.

¹¹ Siya nherera dzako, ndinozodzirera; shirikadzi dzako ngadziise gonda radzo mwendiri.”

¹² Ngokuti izvi ndizvo zvinoronza Mambo Mwari: “Ringira, kudai avo vasikasisiri kumwa kutsani vechiimwa, newe ndiwe wega usikazoororwi here? Auzorekeri kuororwa, unosisira kuimwa.

¹³ Ngokuti inini pachangu ndakapika,” unoronza Mambo Mwari. “Kuti Bhozira rinozoita chishamiso, chishekedzo, nokuita matongo, nokutukwa; nemadhorobha aro eshe anozoangira kuita matongo.”

¹⁴ Ndakazwa mashoko akabva kunaMambo Mwari, nomutumwa watumwa pakati pemadzinza, echiti, “Unganai pamwepo pachenyu, muuye murwe navo; mirukai, murwe hondo.”

¹⁵ “Ngokuti, ringira, ndinozokuita mudoko pakati pemadzinza, unoshoorwa pakati pavanhu.

¹⁶ Kutyisa kwewakafemera, nokudzikudza kwomwoyo wako kwakuchengedzera, iwewe unogara mumawere emapuwe, wechigara padera pechimutunhu. Kunyazwi ukanyaaka chisaki chako pakakwirira kudai ngepegodzi, ndinozokudzasa kubvapo,” unoronza Mambo Mwari.

¹⁷ “Edhomu rinozoita chiro chinotyisa; munhu weshe unopinda ngepasinde paro unozotyiswa, nokuridza murudzi ngendaa yemadambudziko aro eshe.

¹⁸ Kudai ngokuparadzwa kweSodhoma neGomora namadhorobha ari pasinde paro,” unoronza Mambo Mwari, “Apana naumwe unozogarayo, haiwa naumwe unozogarisikamwo.

¹⁹ Ringira, unozokwira echiuya kudai ngemhondoro yechibva mugwasha reJorodhani kuuya koorwisa nyika yakasvipira; ndinozokasira kudzinga Edhomu kuenda kuretu kubva kweriri; neni ndinozoemesa padera payo kunyazwi ndiani uwo wendinotsanangura. Ngokuti ndiani wakadai ndini? Ndiani ungaphikisana neni? Ndiani muushi ungakona kuema pamberi pangu?

²⁰ Ndizvo izwai urongwa waMambo Mwari, waaronga kurwisa Edhomu, nemabiningidzo ake aaita ngendaa yevagari veThemani: Ngegwinyiso vadoko vomutanga vanozokweerwa kuretu; ngegwinyiso unozoita kuti ugaro hwavo huizwe hunotyisa ngendaa yavo.

²¹ Pakutinhira kwokuwa kwavo nyika inozohuta; bope rokuchema kwavo rinozozwika kuRuandhle Rwakatsvuka.

²² Ringira, unozokwira echimbururuka kudai ngegodzi, nokutambanudza maphaphiro ake padera peBhozira, nomwoyo yengwazi dzeEdhomu inozodai ngomwoyo womukadzi uri mukurwadziwa kwake ngokubereka ngeiro zuva.”

Kutonga kwaMambo Mwari padera peDhamasekusi

²³ “Ngendaa yeDhamasekusi: Hamathi neAriphadhi akangaidzwa, ngokuti vazwa mashoko akashata; vanyunguruka mukutya, vanotambudzika kudai ngeruandhle rusikakoni kunyarara.

²⁴ Dhamasekusi rapera simba, ratenderuka kutiza, kutyisa kwaribata; kurwadziwa kukuru nemadambudziko zvaribata, kudai ngomukadzi unorwadziwa mukubereka.

²⁵ Haiwa, dhorobha rinembiri rasiiwa ngenjiranyi, dhorobha rokudakara kwangu!

²⁶ Ndizvo majaha aro anozowa mumadariro, varwi varo veshe vehondo vanozoparadzwa ngeiro zuva,” unoronza Mambo Mwari wehondo.

²⁷ “Neni ndinozobasa muriro kumarukumbati eDhamasekusi, nawo unozopedza ngome dzeBhenihadhadhi.”

Kutongwa kweDzinza raKhedha nekweDhorobha raHazori

²⁸ Ngendaa yeKhedha noumambo hweHazori, uwo wakanyiswa ndiNebhukhadhineza mambo weBhabhuroni, izvi ndizvo zvinoronza Mambo Mwari: “Mirukai, mukwedzere kurwa naKhedha. Paradzai vanhu vokumabvazuva.

²⁹ Torai matende avo, zvifuyo zvavo, machira omukati mwematende, nezvidziyo zvavo zveshe, mangamera avo; nokuchema kunozodaidzirwa kwevari, vechiti, ‘Kutyisa kuri kumarutii eshe.’

³⁰ Tizai, muende kuretu, muhware mundau dzakadzama, O vagari vomuHazori,” unoronza Mambo Mwari; “Ngokuti Nebhukhadhineza mambo weBhabhuroni waita bangano rokurwa nemwi nokumurongera mazano akashata.

³¹ Mirukai mukwedzere kurwa nedzinza rakazorora, rakagarisika,” unoronza Mambo Mwari, “Iro risina zvivhayo nokuti mipiningidzo, iro rinogara rega.

³² “Mangamera avo anozochakatwa, nen'ombe dzavo dzakawanda dzinozopambiwa. Inini ndinozovaparadzira kudutu reshe avo vakaparwa bvudzi pamarutii ehuma dzavo, neni ndinozounza kutambudzika kukuru kubva kumarupande eshe,” unoronza Mambo Mwari.

³³ “Hazori rinozoita ugaro hwemakava nokuita matongo mhera nariini; akuna munhu unozogaramwo, nokuti umwe ungaakamwo.”

Kutonga kwaMambo Mwari padera paEramu

³⁴ Izwi raMambo Mwari iro rakauya kunaJeremia muprofeti, ngendaa yeEramu, pakutanga kwokutonga kwaZedhekia mambo waJudha rechiti,

³⁵ “Izvi ndizvo zvinoronza Mambo Mwari wehondo: Ringira, ndichavhuna uta waEramu, uwo uri sika huru yokugwinya kwavo;

³⁶ neni ndichaunza padera paEramu madutu marongomuna kubva kumarupande marongomuna omudenga; neni ndinozovaparadzira kumadutu aya eshe; akuzoapo dzinza narimwe pevasikazogumi avo vakarashwa veEramu.

³⁷ Ndinozokarudza vaEramu pamberi pemagaa avo, nepamberi paavo vanotsvaka kuvauraya; ndinozounza kushata padera pavo, ushungu hwangu hunotyisa,” unoronza Mambo Mwari. “Ndinozotumira shoti kuvarumbirira metsa ndivapedze;

³⁸ neni ndinozoemesa dendemaro rangu muEramu, nokuparadza mambo wavo nevatongi,” unoronza Mambo Mwari.

³⁹ “Asi mumazuva okugumisira ndinozohwirinza vakabatwa vaEramu,” unoronza Mambo Mwari.